ជាតិ
សង្គមជាតិ
តំបន់អង្គរមានម៉ាស៊ីនសម្រាប់វាស់កម្រិតផ្សែងពុលចេញពីយានយន្ត
× សៀមរាប៖ ចាប់ពីពេលនេះទៅ នៅក្នុងបរិវេណនៃតំបន់អង្គរ នឹងមានការត្រួតពិនិត្យកម្រិតផ្សែងពុល ដែលបង្កឡើងដោយផ្សែងយានយន្ត និងផ្សែងដែលកើតចេញពីការដុតសំរាម។ ឧបករណីវាស់កម្រិតផ្សែងពុល នឹងតាមដាន រាល់កម្រិតផ្សែងពុលនានា ដែលកំពុងមាននៅក្នុងតំបន់អង្គរ។ នេះបើយោងតាមសេចក្តីជួនដំណឹងរបស់អាជ្ញាធរអប្សរា កាលពីថ្ងៃទី១៤ ខែមករា។
ឧបករណ៍វាស់កម្រិតផ្សែងពុលចំនួន២ប្រភេទ ត្រូវបានផ្តល់ដោយក្រុមហ៊ុនរបស់ប្រទេសបារាំង ផ្តល់ជូនអាជ្ញាធរអប្សរា ដើម្បីអនុវត្តន៍ផែនការគ្រប់គ្រងរមណីយដ្ឋានទេសចរណ៍របស់ខ្លួន។ តំណាងក្រុមហ៊ុន Bollere របស់ប្រទេសបារាំង បាននិយាយថា ឧបករណ៍វាស់កម្រិតផ្សែងពុល ដែលខ្លួនបានឲ្យនៅពេលនេះ មានចំនួន២ប្រភេទ គឺម៉ាស៊ីនសម្រាប់វាស់កម្រិតផ្សែងពុលក្នុងបរិយាកាសទូទៅដែលកើតពីការដុតសំរាម ឫព្រៃឈើ និងមួយប្រភេទទៀត គឺជាម៉ាស៊ីន សម្រាប់វាស់កម្រិតផ្សែងពុលដែលចេញពីយានយន្តគ្រប់ប្រភេទ។
ប្រធានក្រុមការងារអនុវត្តន៍ផែនការគ្រប់គ្រងទេសចរណ៍អង្គរ និងជាប្រធានក្រុមការងារសិក្សា និងលើកវិធានការចំពោះការបំពុលបរិយាកាសតំបន់អង្គរ លោក សុខ សង្វា បានទទួលយកម៉ាស៊ីនខាងលើពីតំណាងក្រុមហ៊ុន និងបាននិយាយថា ឧបករណ៍នេះមានសារៈសំខាន់ណាស់ ក្នុងការវាស់កម្រិតផ្សែងពុលនានា ក្នុងទិសដៅការពារតុល្យភាពបរិស្ថាន ក្នុងរមណីយដ្ឋានអង្គរ៕
© រក្សាសិទ្ធិដោយ thmeythmey.com