ជាតិ
សង្គមជាតិ
សហព័ន្ធនិស្សិតបញ្ញវន្តកម្ពុជា ស្នើឲ្យសភាបញ្ឈប់ការចរាចរណ៍ក្រដាសប្រាក់១០០រៀលថ្មី
×![]()
ដោយ: ខន ចំប៉ា
សហព័ន្ធនិស្សិតបញ្ញវន្តកម្ពុជា បានចេញសេចក្តីថ្លែងការណ៍មួយ ដោយបានស្នើសុំឲ្យរដ្ឋាភិបាលពិចារណា និងសម្រចចិត្តសារជាថ្មី ចំពោះការអនុញាតឲ្យធ្វើការបោះពុម្ពក្រដាសប្រាក់មួយរយរៀល ដែលបានដាក់រូបព្រះពុទ្ធ និងរូបព្រះសង្ឃតំណាងដោយអតីតព្រះមហាក្សត្រនរោត្តម សីហនុ។ ក្រដាសប្រាក់មួយរយរៀល នេះនឹងចរាចរនៅលើទីផ្សា នាពេលឆាប់។
នៅក្នុងខ្លឹមសារនៃសេចក្តីថ្លែងការណ៍ ចុះថ្ងៃទី១៦ខែមករា សហព័ន្ធនិស្សិតបញ្ញវន្តកម្ពុជាសរសេរថា ព្រះពុទ្ធសាសនាជាសាសនារបស់រដ្ឋ ដែលប្រជាជនខ្មែរគោរពបូជា រហូតមានការសាងសង់ទីវត្តអារាម សម្រាប់តម្កល់ព្រះពុទ្ធរូប ព្រះធម៌ និងព្រះសង្ឃ ដើម្បីរម្លឹកគុណដល់ពុទ្ធសាសនា។
លើសពីនេះ ព្រះពុទ្ធរូបក៏ត្រូវប្រជាពលរដ្ឋខ្មែរទូទៅដាក់តម្កល់ថ្វាយ ទៀន ធូប ផ្កា និងថ្វាយបង្គំ បួងសួងសុំសេចក្តីសុខ ចម្រើនតាមផ្ទះផងដែរ។ សហព័ន្ធនិស្សិតបញ្ញវន្តកម្ពុជា បានចោទជាសំណួរថា ចុះបើពេលនេះ ព្រះពុទ្ធរូប ត្រូវបានដាក់នៅលើក្រដាសលុបបែបនេះ តើតម្លៃព្រះពុទ្ធសាសនា នឹងទៅជាយ៉ាងណា? ហើយនេះក៏ជារូបភាពមួយហាក់ដូចជាមិនឲ្យតម្លៃព្រះពុទ្ធរូប ព្រះសង្ឃ ហើយធ្វើឲ្យប្រជាជនខ្មែរ ប្រមាថព្រះពុទ្ធសាសនា ដែលជាហេតុនាំឲ្យមានអំពើបាបដោយមិនដឹងខ្លួន។
សហព័ន្ធនិស្សិតបញ្ញវន្តកម្ពុជា ក៏បានអំពាវនាវទៅកាន់សភាជាតិ ចាត់វិធានការណាមួយ ដើម្បីបញ្ឈប់កុំឲ្យមានក្រដាសប្រាក់មួយរយរៀលនេះ ចរាចរណ៍នៅលើទីផ្សាជាដាច់ខាត ប្រសិនបើនៅចាត់ទុកព្រះពុទ្ធសាសនា ជាសាសនារបស់រដ្ឋតទៅទៀត៕
© រក្សាសិទ្ធិដោយ thmeythmey.com
