ជាតិ
សង្គមជាតិ
១៣៦នាក់ស្លាប់ដោយសារគ្រោះមហន្តរាយធម្មជាតិនៅឆ្នាំ២០១៤
× គ្រោះមហន្តរាយធម្មជាតិ ដូចជាគ្រោះទឹកជំនន់ ខ្យល់ព្យុះ រន្ទះបាញ់ បាក់ច្រាំង នឹងគ្រោះរាំងស្ងួតជាដើម បានឆក់យកជីវិតមនុស្សចំនួន១៣៦នាក់ កាលពីឆ្នាំ២០១៤កន្លងទៅ។ តួលេខនេះ បានថយចុះប្រមាណ៧០ភាគរយបើធៀបទៅនឹងឆ្នាំ២០១៣ ដែលមានអ្នកស្លាប់ជាង៣០០នាក់។
បើតាមប្រភពព័ត៌មានពីមន្ត្រីគណៈកម្មាធិការគ្រប់គ្រងគ្រោះមហន្តរាយ បានឲ្យដឹងថា ក្នុងឆ្នាំ២០១៤ គ្រោះទឹកជំនន់ បានបណ្តាលឲ្យមនុស្សចំនួន៤៩នាក់បានស្លាប់ ខណៈកាលពីឆ្នាំ២០១៣មានចំនួន១៥២នាក់។ ទឹកជំនន់ កាលពីឆ្នាំ២០១៤ បានប៉ះពាល់ដល់ ពលរដ្ឋចំនួន១៦៥,៥១៦គ្រួសារ ប្រជាពលរដ្ឋដែលបានភៀសខ្លួនទៅទីទូលមានសុវត្ថិភាពចំនួន១១,៦៧៥គ្រួសារ ផ្ទះដែលមានទឹកលិចមានចំនួន៨៧,៣៣៣ខ្នង ហើយផ្ទះដែលខូចខាតទាំងស្រុងដោយសារទឹកជំនន់ មានចំនួន១៨៥ ខ្នង។ រីឯសាលារៀនចំនួន៣៩៧កន្លែង វត្ត១៥៤កន្លែង និងមន្ទីរពេទ្យ៣២កន្លែង ត្រូវទឹកលិច។
ចំណែកឯខ្យល់ព្យុះ បានកើតឡើងចំនួន១៦០លើក ដែលបណ្តាលឲ្យមនុស្ស៩នាក់ ស្លាប់ របួសចំនួន៨៧នាក់ សាលារៀនជិត៤០អគារ និងផ្ទះប្រជាពលរដ្ឋជិត៦ពាន់ខ្នងរងការខូចខាត។ ដោយឡែក ករណីរន្ទះបាញ់វិញ បានកើតឡើងចំនួន៨៤លើក បណ្តាលឲ្យមនុស្ស ៧៥នាក់ ស្លាប់ ៥៥នាក់របួស និងងាប់គោក្របីចំនួន៥៨ក្បាល។
ប្រភពដដែលបានឲ្យដឹងទៀតថា គ្រោះបាក់ច្រាំងទន្លេ បានកើតឡើងរហូតដល់ចំនួន២៤លើក ដែលបណ្តាល មនុស្សចំនួន៣នាក់ បានស្លាប់ ខូចខាត់ផ្ទះប្រជាពលរដ្ឋចំនួន៣៤៣ខ្នង ហើយបាក់ទាំងស្រុងចំនួន១៨ខ្នង។ រីឯគ្រោះរាំងស្ងួតក៏បានកើតឡើងផងដែរ មិនបានបណ្តាលឲ្យមានអ្នកស្លាប់ទេ ប៉ុន្តែ បណ្តាលឲ្យខួចខាតនូវ ស្រែរបស់ប្រជាពលរដ្ឋ រហូតដល់ជាងមួយម៉ឺនហិកតា៕
© រក្សាសិទ្ធិដោយ thmeythmey.com