ជាតិ
សង្គមជាតិ
អ្នកបឹងកក់បន្តទាមទាររកដំណោះស្រាយដីធ្លី ខណៈសកម្មជននឹងត្រូវឡើងតុលាការ
× ភ្នំពេញ៖ បើទោះបីជាស្ត្រីសកម្មជនដីធ្លីបឹងកក់ចំនួន ១០នាក់នឹងត្រូវឡើងតុលាការ នាថ្ងៃទី២២ ខែមករា ខាងមុខនេះក៏ដោយ ពលរដ្ឋតំបន់បឹងកក់នឹងមិនបញ្ឍប់ការទាមទារជាដាច់ខាត។ ពួកគេបានបន្តដាក់ញត្តិដល់អាជ្ញាធរសាលារាជធានីភ្នំពេញ និងគណកម្មការទី១នៃរដ្ឋសភា ដើម្បីរកដំណោះស្រាយលើបញ្ហាដីធ្លីដ៏រ៉ាំរ៉ៃក្នុងតំបន់បឹងកក់ដដែល។
ពលរដ្ឋមកពីសហគមន៍បឹងកក់និងបុរីកីឡាប្រមាណ ៥០ នាក់ នៅតែបន្តដាក់ញត្តិទាមទាររកដំណោះស្រាយពី អាជ្ញាធរសាលារាជធានីភ្នំពេញ និងស្វែងរកការជួយអន្តរាគមន៍ពីគណៈកម្មការទីមួយ នៃរដ្ឋសភា នៅថ្ងៃទី១៩ ខែមករានេះ។ តំណាងពលរដ្ឋបឹងកក់ដែលបានផ្តិតមេដៃទាមទាររកដំណោះស្រាយ លោក ចាន់ ពុទ្ធិស័ក្ក ប្រាប់ឲ្យដឹងនៅមុខសាលារាជធានីភ្នំពេញថា បច្ចុប្បន្ននេះ សហគមន៍បឹងកក់សរុបជាង ១៥ គ្រួសារ ពុំទាន់ទទួលបានដំណោះស្រាយណាមួយពីអាជ្ញាធរនៅឡើយ។ លោកថា៖«ដីផ្ទះ របស់យើងត្រូវបានរដ្ឋាភិបាលផ្តល់ទៅឲ្យអោយក្រុមហ៊ុនសម្រាប់ធ្វើការអភិវឌ្ឍន៍»។
ទោះបីជាសកម្មជនដីធ្លីតំបន់បឹងកក់ចំនួន ១០នាក់ ត្រូវជាប់ក្នុងពន្ធនាគារព្រៃស ហើយនឹងត្រូវ ឡើងសាលាឧទ្ធណ៍ នាថ្ងៃ២២ ខែមករា ខាងមុខនេះក្តី តំណាងសហគមន៍បឹងកក់ផ្សេងទៀត នឹងមិនបញ្ឈប់ការទាមទាររកដំណោះស្រាយឡើយ។
លោក ចាន់ ពុទ្ធិស័ក្ក បន្ថែមយ៉ាងនេះថា៖«យើងហ៊ានយកជីវិតមកបន្តទាមទារទំហំដីចំនួន ១២,៤៤ ហិចតា ដែលរដ្ឋាភិបាលបានកាត់ឲ្យក្រុមហ៊ុនអភិវឌ្ឍន៍ក្នុងតំបន់បឹងកក់»។ បើតាមតំណាង បឹងកក់រូបនេះពលរដ្ឋជាង ១៥គ្រួសារដែលមិនទាន់ទទួលបានសំណងចង់ឲ្យរដ្ឋាភិបាលផ្តល់ ដីឲ្យពលរដ្ឋសម្រាប់ការអភិវឌ្ឍន៍នៅនឹងកន្លែង។
ដើម្បីដោះស្រាយបញ្ហាដីធ្លីក្នុងសហគមន៍បឹងកក់ និងសហគមន៍បូរីកីឡានេះដែរ នៅថ្ងៃទី១៩ មករានេះ អាជ្ញាធររាជធានីភ្នំពេញបានហៅឲ្យតំណាងពលរដ្ឋទាំងនោះចូលរួមប្រជុំរកដំណោះ ស្រាយភ្លាមៗផងដែរ។
គួររម្លឹកថា នៅក្នុងសកម្មភាពព្យាយាមតវ៉ាទាមទាររកដំណោះស្រាយរំដោះទឹកស្អុយចេញពីភូមិ ដោយមានការបិទផ្លូវធ្វើដំណើរនៅមុខសាលារាជធានីភ្នំពេញកាលពីថ្ងៃទី១០ ខែវិច្ឆិកា ឆ្នាំ២០១៤ផងនោះ អាជ្ញាធរររាជធានីបានចាប់ខ្លួនស្ត្រីសកម្មជនដីធ្លីចំនួន ១០នាក់ រួមមាន លោកស្រី ទេព វន្នី លោកស្រី ផាន់ ឈុនរ៉េត លោកស្រី គង់ ចន្ថា កញ្ញា សុង ស្រីលាភ លោកស្រី បូ ឆវី លោកស្រី ង៉ែត ឃុន លោកស្រី ណង ស្រេង លោកស្រី អ៊ឹម ស្រីទូច លោកស្រី ភូង ស្រីភាព និងលោកស្រី ភួង ពេជ្រ។ ពួកគេត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារម្នាក់ ១ឆ្នាំ និងពិន័យជាប្រាក់ម្នាក់ ២លានរៀល។ ស្រី្តទាំង១០នាក់នោះ នឹងត្រូវឡើងសាលាឧទ្ធរណ៍សាជាថ្មី នៅរសៀលថ្ងៃទី២២ ខែមករា ឆ្នាំ២០១៥ខាងមុខនេះ ដើម្បីសុំនៅក្រៅឃុំផងដែរ៕
© រក្សាសិទ្ធិដោយ thmeythmey.com