ជាតិ
សង្គមជាតិ
អ្នករត់រ៉ឺម៉កមានទឹកមាត់លេបវិញនៅខែសម្បូរភ្ញៀវ
× សៀមរាប៖ អ្នករត់រ៉ឺម៉កនៅខេត្តសៀមរាប សុទ្ធតែនិយាយដូចៗគ្នាថា មមាញឹកនឹងការដឹកភ្ញៀវ។ ទាំំងអ្នករត់រ៉ឺម៉កប្រចាំនៅតាមសណ្ឋាគារ និងអ្នករត់រាយធម្មតា គឺមានភ្ញៀវដឹកច្រើនដូចគ្នា ដែលធ្វើឲ្យពួកគេ មានទឹកមាត់លេបឡើងវិញ បន្ទាប់ពីខែភ្ញៀវឡើង បានចាប់ផ្តើមសម្រុកខ្លាំងចាប់ពីខែ១២មក។
ក្រុមអ្នករត់រ៉ឺម៉កបាននិយាយថា ក្នុងខែមករានេះ ពួកគេអាចរកប្រាក់បានច្រើនជាងខែផ្សេងៗ ។ ដោយសារជាខែសម្បូរភ្ញៀវនៅក្នុងឆ្នាំ ធ្វើឲ្យអ្នករត់រ៉ឺម៉កខ្លះ ត្រូវក្រោកពីព្រឹកព្រលឹម ដើម្បីដឹកភ្ញៀវទៅកាន់គោលដៅផ្សេងៗ ជាពិសេសមើលថ្ងៃរះនៅប្រាសាទអង្គរវត្ត។
លោក ស៊ឹម ចន្ថា កំពុងអង្គុយលើរ៉ឺម៉កនៅប្រាសាទបាយ័ន បាននិយាយថា ក្នុងខែនេះ អ្នករត់រ៉ឺម៉កមួយចំនួន មានភាពមមាញឹកច្រើន។ សម្រាប់លោក ចន្ថា មួយថ្ងៃលោកដឹកភ្ញៀវពីតាមសណ្ឋាគារ ដើរមើលប្រាសាទសំខាន់ៗ ដែលរកចំណូលបានពី១៥ដុល្លារឡើងទៅ។ លោកបន្ថែមថា ថ្ងៃខ្លះលោកអាចរកបានចន្លោះពី៣០ ទៅ៥០ដុល្លារឯណោះ ប្រសិនបើលោកបន្តដឹកភ្ញៀវរាយខាងក្រៅបន្ថែមទៀត។ លោក ចន្ថា ពន្យល់ថា៖« ដឹកភ្ញៀវវេនដូចខ្ញុំចឹង មួយវេន១៥ដុល្លារ តែបើភ្ញៀវចង់មើលថ្ងៃរះ យើងគិត១០ដុល្លារបន្ថែម។ ពេលខ្លះប៉ះភ្ញៀវទូលាយ គាត់ឲ្យខាងក្រៅទៀត។ ខ្ញុំចប់ភ្ញៀវម៉ោង៤ ចឹងខ្ញុំមានពេលដឹកនៅតាមផ្សារ ឫទីប្រជុំជនផ្សេងទៀតបាន»។
យើងចេញពីប្រាសាទបាយ័ន មកប្រាសាទអង្គរវត្តវិញម្តង។ នៅមុខប្រាសាទអង្គរវត្ត លោក សុផល ទើបនឹងទម្លាក់ភ្ញៀវជនជាតិកូរ៉េរបស់លោក ហើយក៏កំពុងយកថ្លៃដឹកពីក្រុមមគ្គុទ្ទេសក៍ ដែលជួលមកផងដែរ។ លោក សុផល បាននិយាយថា តាមដែលរកបានច្រើននៅខែនេះ គឺជាភ្ញៀវជាក្រុម ដោយឡែកភ្ញៀវរាយមិនសូវសម្បូរទេ។ បន្ថែមពីដឹកភ្ញៀវមួយជើងបាន៧ដុល្លារ លោក សុផល បញ្ជាក់ថា ជាមធ្យមលោករកពីភ្ញៀវរាយបាន១៥ដុល្លារក្នុងមួយថ្ងៃ។
ចាប់ពីខែតុលា ដល់ខែមេសា ជាខែភ្ញៀវឡើង (សម្បូរភ្ញៀវ) ដោយសារជារដូវប្រាំង។ ដោយឡែកចាប់ពីខែឧសភា ដល់ខែកញ្ញា គឺភ្ញៀវចាប់ផ្តើមធ្លាក់ចុះ ព្រោះជាខែភ្លៀង ដូច្នេះការធ្វើដំណើរកម្សាន្ត មានការថយចុះ។ មិនថាតែអ្នករត់រ៉ឺម៉ក់នោះទេ អ្នករកស៊ីជាច្រើននៅខេត្តសៀមរាប គឺពឹងលើចំនួនភ្ញៀវ ប្រសិនណាបើភ្ញៀវស្ងាត់ នោះការលក់ដូររបស់ពួកគេ ក៏ទៅតាមហ្នឹងដែរ។
គួររំលឹកថា ភ្ញៀវទេសចរចិន និងកូរ៉េ គឺឈរនៅកំពូល ជាភ្ញៀវដែលមកកម្សាន្តខេត្តសៀមរាបច្រើនជាងគេ បើប្រៀបនឹងភ្ញៀវវៀតណាម ថៃ អង់គ្លេស រុស្ស៊ី បារាំង។ល។ នោះ។ បើទោះជារបាយការណ៍មន្ទីរទេសចរណ៍ខេត្តសៀមរាបអះអាងថា ចំនួនភ្ញៀវក្នុងឆ្នាំ២០១៤ មានការកើនឡើងយ៉ាងណាក្តី តែតាមការអះអាងពីអ្នកធ្វើការលើវិស័យនេះ បញ្ជាក់ថា មានការធ្លាក់ចុះច្រើន មូលហេតុមាន ការធ្លាក់យន្តហោះ បញ្ហានយោបាយ និងជម្លោះប្រទេសជិតខាងជាដើម៕
© រក្សាសិទ្ធិដោយ thmeythmey.com