ជាតិ
នយោបាយជាតិ
លោក ហ៊ុន សែន អះអាងប្រាប់មេដឹកនាំពិភពលោកពីកិច្ចប្រឹងប្រែងនានារបស់កម្ពុជា លោកនាយករដ្ឋមន្ត្រី ហ៊ុន សែន នាវេទិកាសេដ្ឋកិច្ចពិភពលោក។ រូបថត ហ្វេសប៊ុក Kem Gunawadh
× វេទិកាសេដ្ឋកិច្ចពិភពលោក (WEF) លើកទី៤៥ នៅក្នុងទីក្រុងដាវ៉ូស ក្លូស្ទឺរ ប្រទេសស្វីស បានបើកកិច្ចប្រជុំរបស់ខ្លួនកាលពីថ្ងៃទី២៣ ខែមករា ឆ្នាំ២០១៥ ។ នៅកិច្ចប្រជុំនេះ លោកនាយករដ្ឋមន្ត្រី ហ៊ុន សែន បានអះអាងពីការវិវត្តទៅមុខរបស់កម្ពុជាលើគ្រប់វិស័យក្នុងនាមជាសមាជិកនៅតំបន់អាស៊ាន ជាពិសេសការសម្រេចបាននូវកំណើនសេដ្ឋកិច្ចខ្ពស់ប្រកបដោយចីរភាព ក្នុងរយៈ ពេលជាងពីរទសវត្សកន្លងមក។ នេះតាមការឲ្យដឹងពីសំណាក់អ្នករាយការណ៍ពិសេសនៃទូរទស្សន៍ជាតិកម្ពុជា។
វេទិកាសេដ្ឋកិច្ចពិភពលោក (WEF) លើកទី៤៥ មានការចូលរួមពីមេដឹកនាំ ពិភពលោកប្រមាណ៤០ប្រទេស បណ្តាវិជ្ជាករ សង្គមស៊ីវិល បណ្ឌិតសភា ជ័យលាភីរង្វាន់ណូប៊ែល ថ្នាក់ដឹកនាំវ័យក្មេង អ្នកសារព័ត៌មាន និងធុរៈជនសំខាន់ៗសរុបប្រមាណជាង ២ពាន់៥០០នាក់ មកពី១៤០ប្រទេស។ ប្រធានបទនៃកិច្ចប្រជុំ គឺសំដៅលើគោលដៅអភិវឌ្ឍន៍ប្រកបដោយចីរភាពឆ្នាំ២០១៥ ។ អ្នកចូលរួមទាំងអស់បានដាក់ចេញរបៀបវារៈជាច្រើនដោយនាំគ្នាផ្តោតការយកចិត្តទុកដាក់លើការ ដោះស្រាយបញ្ហាប្រឈមផ្នែកនយោបាយ សេដ្ឋកិច្ច សង្គម និងបញ្ហាផ្សេងទៀត ដែលពាក់ព័ន្ធនឹងការផ្ទេរបច្ចេកវិទ្យា សម្រាប់ជាមូលដ្ឋានក្នុងការសម្រេចចិត្តនាពេលអនាគត។
បើតាមអ្នករាយការណ៍ពិសេសរបស់ទូរទស្សន៍ជាតិ លោកនាយករដ្ឋមន្ត្រី ហ៊ុន សែន បានលើកឡើងពីបញ្ហាគ្រោះធម្មជាតិយ៉ាងធ្ងន់ធ្ងរដូចជា គ្រោះរាំងស្ងួត និងទឹកជំនន់ ដោយលោកបានបញ្ជាក់ថាការដោះស្រាយបញ្ហាសន្តិសុខស្បៀង នឹងអាស្រ័យជាសំខាន់ទៅលើសមត្ថភាពរបស់យើង ក្នុងការគ្រប់គ្រង និងការកាត់បន្ថយនូវផលប៉ះពាល់ជាអវិជ្ជមាន ពីការប្រែប្រួលអាកាសធាតុ និងការបន្ស៊ាំប្រព័ន្ធ កសិកម្ម ទៅនឹងគ្រោះធម្មជាតិដ៏ធ្ងន់ធ្ងរនោះ។
ប្រមុខរដ្ឋាភិបាលកម្ពុជា បានគូសបញ្ជាក់អំពីការបង្កើតឡើង នូវសហគមន៍សេដ្ឋកិច្ចអាស៊ាន ដែលមានគោលដៅសំរេចឲ្យបាននូវ សក្តានុពលនៃលំហូដោយសេរីនូវទំនញ មូលធន និងពលករជំនាញ និងផ្តល់ជាឱកាសដ៏ធំធេងសម្រាប់អាស៊ាន ប្រែខ្លួនឲ្យទៅជាមជ្ឈមណ្ឌលផលិតកម្មនៃពិភពលោក និងជាទីផ្សារតំបន់ដ៏ធំមួយ និងប្រកបដោយភាពប្រកួតប្រជែង។
លោក ហ៊ុន សែន សង្កត់ធ្ងន់ថា តាមរយៈការ ពង្រឹងតួមាទីស្នូលរបស់ខ្លួន អាស៊ាននឹងអាចទាញយកផលចំណេញជាច្រើន ពីនិន្នាការស្ទុះឡើងជាប្រចាំ នៃសេដ្ឋកិច្ចចិន ការបង្កើតឡើងនិងបើកចំហជាបណ្តើរៗនៃសេដ្ឋកិច្ចឥណ្ឌា និងចលនាការប្រែប្រួលថ្មីនៃ សេដ្ឋកិច្ចជប៉ុន និងសាធារណរដ្ឋកូរ៉េ ដែលនឹងបើកឡើងនូវឱកាសពាណិជ្ជកម្ម និងវិនិយោគដ៏ច្រើនបន្ថែម លើទីផ្សារប្រពៃណីរបស់ខ្លួន រួមមានទីផ្សារសហរដ្ឋអាមេរិក និងសហភាពអឺរ៉ុប។
លោកគូសបញ្ជាក់ផងដែរថា កម្ពុជាគឺជាប្រទេសបើកចំហរនៅតំបន់អាស៊ី និងអាស៊ាន ប្រកបដោយជវភាពខ្ពស់ មានអំណោយផលពី ផលលាភប្រជារាស្ត្រ និងជាប្រទេសដែលសំរេចបាននូវ កំណើនសេដ្ឋកិច្ចខ្ពស់ប្រកបដោយចិរភាព ក្នុងរយៈ ពេលជាងពីរទសវត្សកន្លងមក ក៏ដូចជាសម្រេចបាននូវការកាត់បន្ថយភាពក្រីក្រយ៉ាងឆាប់រហ័ស ហើយថែមទាំងមានសក្តានុពលឈានទៅជាប្រទេស មានជំណូលមធ្យមមួយរឹងមាំ។
លោក ហ៊ុន សែន បានអះអាងបន្ថែមថា ក្រៅពីការគ្រោងដាក់ចេញនូវ គោលនយោបាយអភិវឌ្ឍន៍វិស័យឧស្សាហកម្ម កម្ពុជានឹងបន្តជម្រុញ ការវិនិយោគលើហេដ្ឋារចនាសម្ព័ន្ធ ពង្រឹងការតភ្ជាប់ការដឹកជញ្ជូន និង ប្រព័ន្ធឡូជីស្ទីក ដើម្បីធ្វើឲ្យប្រសើរឡើងនូវក្របខណ្ឌនិយ័តកម្ម និងកិច្ចសម្របសម្រួលពាណិជ្ជកម្ម ការកែ លម្អច្បាប់វិនិយោគ និងប្រព័ន្ធលើកទឹកចិត្ត បណ្តុះបណ្តាលជំនាញ ក៏ដូចជាអភិវឌ្ឍន៍សេវា និងប្រព័ន្ធគាំពារ សង្គមចាំបាច់នានា ក្នុងគោលបំណងចែករំលែកស្ថានភាពឈ្នះ ឈ្នះ។
វេទិកាសេដ្ឋកិច្ចពិភពលោក (WEF) គឺជាស្ថាប័នមិនរកប្រាក់ចំណេញ ដែលត្រូវបានបង្កើតឡើងនៅ ឆ្នាំ១៩៧១ ដែលមានការិយាល័យកណ្តាលនៅទីក្រុងហ្សឺណែវ ប្រទេសស្វីស៕
© រក្សាសិទ្ធិដោយ thmeythmey.com