អន្តរជាតិ
នយោបាយអន្តរជាតិ
សំឡេងក្រុមប្រឹក្សាសន្តិសុខមិនមានឥទ្ធិពលលើការដោះលែងចំណាប់ខ្មាំងជនជាតិជប៉ុន
×
ស្ថាប័នក្រុមប្រឹក្សាសន្តិសុខអង្គការសហប្រជាជាតិកាលពីម្សិលមិញនេះបានថ្កោលទោសការសម្លាប់ចំណាប់ខ្មាំងជនជាតិជប៉ុនដោយក្រុមភេរវជនរដ្ឋឥស្លាម និងទាមទារអោយក្រុមភេរវជនដោះលែងចំណាប់ខ្មាំងម្នាក់ទៀតដែលនៅមានជីវិត។ ក្រុមភេរវជនរដ្ឋឥសា្លមទាមទារអោយមានគេដោះលែងគ្នីគ្នារបស់ពួកគេដែលស្ថិតក្នុងការចាប់ខ្លួនក្នុងប្រទេសហ្សកដង់ ហើយគេមិនរំពឹងថាសំឡេងក្រុមប្រឹក្សាសន្តិសុខមានឥទ្ធិពលលើក្រុមភេរវជនរដ្ឋឥស្លាមឡើយ។
កញ្ញា ខន ចំប៉ា លម្អិតព័ត៌មាននេះ
ក្រុមប្រឹក្សាសន្តិសុខអង្គការសហប្រជាជាតិ បានប្រកាសថ្កោលទោសការសម្លាប់ចំណាប់ខ្មាំងជនជាតិជប៉ុន ដោយក្រុមភេរវជនរដ្ឋឥស្លាម និងទាមទារអោយមានការដោះលែងចំណាប់ខ្មាំងម្នាក់ទៀតដែលរស់រានមានជីវិត កាលពីថ្ងៃអាទិត្យម្សិលមិញ។
ក្នុងសេចក្តីថ្លែងការណ៍ដែលចេញដោយសមាជិកទាំង១៥របស់ក្រុមប្រឹក្សាសន្តិសុខ បានបង្ហាញការប្រឆាំងនឹងទង្វើព្រៃផ្សៃរបស់ក្រុមភេរវជនរដ្ឋឥស្លាម ដែលបានកាត់កចំណាប់ខ្មាំងជនជាតិជប៉ុនម្នាក់ គឺលោក Haruna Yukawa និបានថ្កោលទោសចំពោះ ទង្វើដ៏កំសាកនិងឃោរឃៅរបស់ក្រុមភេរវជនរដ្ឋឥស្លាម។ ក្រុមភេរវជនរដ្ឋឥស្លាម បានសម្លាប់រង្គាលនិងរំលោភបំពានសិទ្ធិមនុស្សនៅក្នុងប្រទេសស៊ីរី និងអ៊ីរ៉ាក់ ហើយក្រុមនេះបន្តសម្លាប់រង្គាលជនស៊ីវិលរួមទាំងអ្នកសារព័ត៌មានផងដែរជារៀងរាល់ថ្ងៃ។
បណ្តាប្រទេសទាំង ១៥ បានប្រកាសទាមទារអោយក្រុមភេរវជនរដ្ឋឥស្លាម ដោះលែងចំណាប់ខ្មាំងម្នាក់ទៀត គឺលោក Kenji Goto និងចំណាប់ខ្មាំងដទៃផ្សេងទៀតដែលត្រូវបានក្រុមភេរវជនរដ្ឋឥស្លាមនេះចាប់ខ្លួន។ ក្រៅពីទាមទារអោយដោះលែងចំណាប់ខ្មាំងក្រុមប្រឹក្សាសន្តិសុខ ក៏បានសង្កត់ធ្ងន់ថា សហគមន៍អន្តរជាតិនឹងយកឈ្នះក្រុមភេរវជននេះ ហើយគ្មានការអន់អោនឡើយ ចំពោះទង្វើដ៏ព្រៃផ្សៃ រំលោភបំពាន ឃោរឃៅ អមនុស្សធម៌ និងគួរអោយស្អប់ខ្ពើមជាបំផុតនោះ។
សកម្មភាពក្រុមភេរវជនរដ្ឋឥស្លាមដែលសម្លាប់ជនជាតិជប៉ុន ត្រូវបានគេចាត់ទុកថាជាទង្វើបង្ករឿងមួយ ហើយក្រុមនេះសម្រេចសម្លាប់ចំណាប់ខ្មាំងម្នាក់ ក្រោយបរាជ័យក្នុងការទាមទារអោយរដ្ឋាភិបាលជប៉ុនបង់លុយលោះចំនួន ២រយលានដុលា្លរ។ ក្រោយពីបង្ហោះវីដេអូដែលមានចំណាប់ខ្មាំងម្នាក់នៅមានជីវិតកាន់រូបថតចំណាប់ខ្មាំងដែលត្រូវក្រុមភេរវជនកាត់ក ក្រុមរដ្ឋឥស្លាមនេះបានទាមទារអោយមានការដោះលែងស្ត្រីភេរវជនម្នាក់ ដែលត្រូវចាប់ខ្លួនតាំងពីឆ្នាំ ២០០៦ នៅក្នុងប្រទេសហ្សកដង់ជាថ្នូរនឹងការដោះលែងចំណាប់ខ្មាំងដែលនៅរស់។
យ៉ាងណាក៏ដោយរដ្ឋាភិបាលក្រុងតូក្យូបានប្រកាសថា ខ្លួននឹងមិនធ្វើតាមការទាមទាររបស់ក្រុមភេរវជនឡើយ ប៉ុន្តែរដ្ឋាភិបាលនេះបានប្រកាសថា ខ្លួននឹងបន្តប្រើប្រាស់គ្រប់វិធីសាស្ត្រ រួមទាំងមធ្យោបាយការទូតផង ដើម្បីអោយមានការដោះលែងចំណាប់ខ្មាំងម្នាក់ដែលនៅមានជីវិត។ ប៉ុន្តែបើទោះជាមានការលើកឡើងយ៉ាងនេះក្តី វាហាក់បីដូចជាពិបាកសន្និដ្ឋាន និងរំពឹងថា រដ្ឋាភិបាលលោក ស៊ីនហ្សូអាបេ មានលទ្ធភាពដោះស្រាយវិបត្តិចំណាប់ខ្មាំងនេះ ហើយលោក អាបេ ក៏កំពុងស្ថិតក្រោមសម្ពាធនិងការរិះគន់ខ្លាំងថែមទៀតផង។
ប្រសិនបើគ្មានការដោះលែងឧក្រិដ្ឋជនជាស្ត្រីតាមការទាមទាររបស់ក្រុមភេរវជនរដ្ឋឥស្លាមទេនោះ ជោគវាសនារបស់ចំណាប់ខ្មាំងទី ២ មិនខុសអ្វីពីចំណាប់ខ្មាំងដែលត្រូវក្រុមនេះសម្លាប់ចោលឡើយ ដ្បិតការទាមទារនិងការថ្កោលទោសរបស់សហគមន៍អន្តរជាតិនោះគ្មានឥទ្ធិពលអ្វីលើការសម្រេចចិត្តរបស់ក្រុមភេរវជនរដ្ឋឥស្លាមឡើយ៕
© រក្សាសិទ្ធិដោយ thmeythmey.com