ជាតិ
×![]()
សៀមរាប៖ បន្ទាប់ពីធ្វើការស្រាវជ្រាវរយៈពេញមួយសប្តាហ៍រួចមក អាជ្ញាធរអប្សរា មានតម្រុយខ្លះៗ ដែលអាចបញ្ជាក់ថា រូបភាពអាក្រាតល្វែងខាងលើ ដែលអះអាងថា ជាស្ត្រីជនជាតិចិននោះ ទំនងជារូបភាពកាត់ត។ ព្រោះថា តាមការស្រាវជ្រាវ រូបស្ត្រីដូចគ្នានោះ មានថតនៅតាមតំបន់ប្រវត្តិសាស្ត្រសំខាន់ជាច្រើននៅលើពិភពលោក ក្នុងនោះ មានមហាកំពែងរបស់ប្រទេសចិនជាដើម។
អ្នកនាំពាក្យអាជ្ញាធរអប្សរា លោកស្រី ចៅ ស៊ុនកិរិយា បាននិយាយថាតម្រុយពីការពិនិត្យ រូបថតស្ត្រីអាក្រាតនៅតំបន់អង្គរដែលល្បីពេញទំព័រហ្វេសប៊ុក (ផ្សាយចេញពីវេបសាយអាសអាភាស Wanimalរបស់ចិន) កាលពីសប្តាហ៍មុន ភាគច្រើនអាចជារូបភាពប្រឌិត។ ក្នុងន័យនេះ អ្នកនាំពាក្យអាជ្ញាធរអប្សរា ចង់បញ្ជាក់ថា រូបភាពទាំងនោះ អាចជារូបភាពកាត់ត ដោយក្រុមអ្នកជំនាញ។
យ៉ាងណាម៉ិញ អាជ្ញាធរអប្សរា មិនទាន់បញ្ជាក់ច្បាស់នៅឡើយទេ ថារូបភាពទាំងនោះ ជារូបភាពពិត ឫមិនពិតនោះ ដោយបញ្ជាក់ថា អ្នកជំនាញកំពុងសិក្សាបន្ត។ តែយ៉ាងណា អាជ្ញាធរ ហាក់ពិបាកបន្តិច ក្នុងការរកមុខអ្នកប្រព្រឹត្តិ ប្រសិនណារូបភាពទាំងនោះជារូបពិតនោះ។
ចំពោះចំណាត់ការទៅថ្ងៃក្រោយ ដើម្បីបង្ការកុំឲ្យកើតមានហេតុការណ៍ដូចខាងលើនេះទៀត អាជ្ញាធរអប្សរា បានពង្រឹងការគ្រប់គ្រងរបស់ខ្លួន ក្នុងនោះ ក៏មានការចុះផ្សាយព័ត៌មាន និងបទបញ្ជាផ្សេងៗ និងការហាមថតរូបភាពអាក្រាតផ្សេងៗ ដែលភ្ញៀវបរទេសមួយចំនួន មិនទាន់ដឹងនោះផងដែរ។
ក្រោយពេលផ្ទុះរូបភាពជាច្រើនសន្លឹក ដែលស្ត្រីជនជាតិចិនម្នាក់ ថតអាក្រាតនៅតំបន់អង្គរ កាលពីសប្តាហ៍កន្លងទៅរួចមក មានមតិជាច្រើនរិះគន់ចំពោះកង្វះខាតគ្រប់គ្រងរបស់អាជ្ញាធរ។ ប៉ុន្តែ មួយចំនួនទៀត បានបញ្ចេញរូបភាពពន្យល់ជាច្រើន ដោយបញ្ជាក់ថា រូបទាំងនោះ ជារូបភាពកាត់តតែប៉ុណ្ណោះ។ យ៉ាងណា គេនៅមិនទាន់ដឹងច្បាស់ថា តើអាជ្ញាធរអប្សរា អាចនឹងចេញមុខបញ្ជាក់ចំពោះរូបភាពទាំងនោះ ថាជារូបភាពកាត់ត ដូចដែលខ្លួនបានស្មានឫយ៉ាងណា ខណៈដែលមហាជនជាច្រើនកំពុងចាំមើល ការស្រាវជ្រាវបន្ត។
គួររំលឹកថា រឿងមួយមិនទាន់ផុតផង មានរឿងថ្មីមួយទៀត ដូចទៅនឹងករណីខាងលើដែរ គឺថា កាលពីថ្ងៃព្រហស្បតិ៍ម្សិលមិញ ជនជាតិបារាំង៣នាក់ ត្រូវបានអាជ្ញាធរអប្សរា ឃាត់ខ្លួន ក្រោយពេលជនបរទេសទាំងនោះ មានបំណងថតស្រាតនៅបរិវេណប្រាសាទបន្ទាយក្តី។ ករណីថ្មីនេះ ខុសពីករណីមុន ដោយសារភ្ញៀវទេសចរទាំង៣នាក់ បានប្រើទូរសព្ទដៃ ក្នុងការប៉ងថតរូបអាក្រាត។ បច្ចុប្បន្ន អាជ្ញាធរកំពុងរកភស្តុតាងបន្ថែម ដើម្បីចោទប្រកាន់ជនបរទេសខាងលើ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
