អន្តរជាតិ
ក្រុមប្រឹក្សាសន្តិសុខអង្គការសហប្រជាជាតិថ្កោលទោសលើការសម្លាប់ចំណាប់ខ្មាំងជប៉ុន
× ក្រោយពីវិឌីអូនៃការសម្លាប់យ៉ាងយង់ខ្នងលើចំណាប់ខ្មាំងអ្នកកាសែតជប៉ុនលើកទីពីរ ត្រូវបានបង្ហោះដោយក្រុមរដ្ឋ ឥស្លាមនោះ ក្រុមប្រឹក្សាសន្តិសុខអង្គការសហប្រជាជាតិ បានចេញមុខថ្កោលទោសយ៉ាងខ្លាំងលើសកម្មភាពដ៏ សាហាវឃោរឃៅនេះ។ បន្ថែមពីនេះក្រុមប្រឹក្សាសន្តិសុខ បានទាមទារអោយក្រុមរដ្ឋឥស្លាមដោះលែងចំណាប់ខ្មាំង ដែលនៅសល់ដោយគ្មានលក្ខខណ្ឌជាបន្ទាន់។
ស្តាប់ សំឡេង
កាលពីថ្ងៃទី ០១ កុម្ភៈ កន្លងទៅនេះ ក្រុមប្រឹក្សាសន្តិសុខអង្គការសហប្រជាជាតិ បានថ្កោលទោសយ៉ាងខ្លាំងទៅលើ ការសម្លាប់ចំណាប់ខ្មាំងដែលជាអ្នកការសែតជប៉ុន ដោយក្រុមសកម្មយុទ្ធរដ្ឋឥស្លាម។ សេចក្តីប្រកាសនេះ ធ្វើឡើង ក្រោយក្រុមរដ្ឋឥស្លាម បានបង្ហោះវីឌីអូ នៃការសម្លាប់យ៉ាងសាហាវយង់ឃ្នង លើអ្នកកាសែតជប៉ុន គិនជិ ហ្គូតូ ជាលើកទី២ ។
ក្រោយពីបរាជ័យក្នុងការចរចាររវាងរដ្ឋាភិបាលជប៉ុន និងរដ្ឋាភិបាលហ្សកដង់ ជាមួយក្រុមរដ្ឋឥស្លាមលើការដោះដូរ ចំណាប់ខ្មាំងដែលអ្នកកាសែតជប៉ុន និងអ្នកបើកបរយន្តហោះហ្សកដង់ ជាមួយនឹងអ្នកទោសដែលជាក្រុមសកម្ម យុទ្ធក្រុមរដ្ឋឥស្លាមដែលត្រូវបានចាប់ខ្លួនដោយរដ្ឋាភិបាលហ្សកដង់ ចំណាប់ខ្មាំងជប៉ុនទី២ លោក គិនជិ ហ្គូតុ ក៏ត្រូវ បានសម្លាប់ដោយកាត់ក្បាល ដូចដែលក្រុមរដ្ឋឥស្លាមបានគម្រាម។
ប្រតិកម្មបានកើតឡើងភា្លមៗឆ្លើយតប ទៅនឹងអំពើការសម្លាប់នេះ។ សមាជិកក្រុមប្រឹក្សាសន្តិសុខ បានសម្រេចចេញ សេចក្តីថ្លែងការថ្កោលទោសយ៉ាងខ្លាំងទៅលើក្រុមរដ្ឋឥស្លាម ហើយបានចាត់ទុកសោកនាដកម្មនៃការសម្លាប់ជាបន្តបន្ទាប់នេះ ថាការគំរាមកហែង ទៅលើក្រុមអ្នកកាសែតដែលនៅក្នុងប្រទេសស៊ីរី ហើយបានចាត់ទុកការសម្លាប់នេះជាអំពើឆ្កួតលីលា និងយង់ឃ្នង។
លើសពីទៅទៀត ក្រុមប្រឹក្សាសន្តិសុខ ក៏បានទាមទារអោយអ្នកដែលប្រព្រឹត្តសកម្មភាពទាំងនេះ ត្រូវតែទទួលខុស ត្រូវ និងត្រូវតែដោះលែងចំណាប់ខ្មាំងដែលនៅសេសសល់ក្នុងដៃរបស់ក្រុមរដ្ឋឥស្លាម និងក្រុមអាល់កៃដា ដោយគ្មានលក្ខខណ្ឌ។ បន្ថែមពីនេះទៅទៀត ក្រុមប្រឹក្សាសន្តិសុខ ក៏បានផ្ងើការរំលែកទុក ទៅកាន់រដ្ឋាភិបាលជប៉ុន និងក្រុមគ្រួសារជនរងគ្រោះដែលត្រូវបានសម្លាប់ដោយក្រុមរដ្ឋឥស្លាម។
ក្រោយពីជនរួមជាតិរបស់ខ្លួនទាំងពីរនាក់ត្រូវ បានសម្លាប់ដោយកាត់ក្បាលយ៉ាងសាហាវយង់ឃ្នងនោះ លោកនាយករដ្ឋមន្ត្រីជប៉ុន ស៊ិនហ្សូ អាបេ គ្មានអ្វីក្រៅពីការសោកស្តាយ និងបានប្តេជ្ញាថានឹងសហការជាមួយ សហគមន៍អន្តរជាតិ ដើម្បីចាត់វិធានការលើក្រុមនេះវិញ ហើយលោកបានបញ្ជាក់ថា លោកនឹងមិនអភ័យទោសចំពោះក្រុមរដ្ឋឥស្លាមនោះឡើយ៕
© រក្សាសិទ្ធិដោយ thmeythmey.com