ជាតិ
ដើមស្ពង់ដុះលើប្រាសាទតាព្រហ្មស្ថិតក្នុងចំណោមដើមឈើចាស់ជាងគេលើលោក
×
ក្នុងចំណោមដើមឈើដែលមានវ័យចំណាស់ជាងគេបំផុត នៅលើភពផែនដីទាំង ១២ ដើមស្ពង់ដែលដុះនៅលើប្រាសាទតាព្រហ្ម ស្ថិតក្នុងខេត្តសៀមរាបប្រទេសកម្ពុជា ក៏ស្ថិតក្នុងចំណោមដើមឈើវ័យចំណាស់ទាំងនោះផងដែរ។ នេះបើយោងតាមការផ្សាយរបស់ businessinsider។
ប្រភពដដែលនេះបានបង្ហាញរូបភាពនៃដើមឈើ ដែលមានអាយុកាលវែងជាងគេបំផុតក្នុងភពផែនដី ដែលមានដើមឈើខ្លះមានអាយុកាលរហូតដល់រាប់ពាន់ឆ្នាំ។ រូបភាពនៃដើមឈើចំណាស់ទាំង ត្រូវបានថតដោយអ្នកថតរូបដ៏ល្បីល្បាញជនជាតិអាមេរិក គឺ អ្នកស្រី Beth Moon ដោយអ្នកស្រីត្រូវចំណាយពេលជាង ១៤ ឆ្នាំដើម្បីថតផ្ដិតយករូបភាពនៃដើមឈើទាំងនោះ។
រូបភាពដែលអ្នកស្រីថតបាន ត្រូវបានដាក់បង្ហាញក្នុងសៀវភៅមួយក្បាលមានចំណងជើងថា « Ancient Trees: Portraits of Time » ។
ខាងក្រោមនេះគឺជាដើមឈើ ដែលមានអាយុវែងជាងគេបំផុតក្នុងពិភពលោកទាំង ១២ ដើម៖
ទី១២៖ ដើម Baobabs២៥ ដើមនៅប្រទេស ម៉ាដាហ្គាស្កា មានកម្ពស់ជាង ៣០ ម៉ែត្រ និងមានអាយុជាង ៨០០ ឆ្នាំ។
ទី១១៖ ដើម Yew ២ ដើម ដែលដុះនៅសងខាងខ្លោងទ្វារវិហារគ្រឹស្ដសាសនា St. Edward ក្នុងប្រទេសអង់គ្លេស វាត្រូវបានគេប៉ាន់ស្មានថា បានដុះកាលពីសតវត្សទី១៨ ។
ទី១០៖ ដើមស្ពង់ដុះលើប្រាសាទតាព្រហ្ម ខេត្តសៀមរាប ប្រទេសកម្ពុជា ដែលអាចដុះរហូតដល់កម្ពស់ជាង ៤៥ ម៉ែត្រ ឬខ្ពស់ជាងនេះក៏មាន ហើយវាអាចមានអាយុកាលរាប់រយឆ្នាំ។
ទី៩៖ ដើម Queen Elizabeth Oak ក្នុងឧទ្យាន Cowdray Park ប្រទេសអង់គ្លេស បានដុះក្នុងអំឡុងសតវត្សទី១១ និងទី១២ ហើយវាមានកម្ពស់ ជាង ១៥ ម៉ែត្រ។
ទី៨៖ ដើម Yew មួយដើមដែលដុះនៅលើវិហារគ្រឹស្ដបុរាណមួយ ក្នុងប្រទេស វេលល៍ ដែលបានដុះក្នុងអំឡុងទសវត្ស ១៨៥០ ។
ទី៧៖ ដើម Bowthorpe Oak ស្ថិតក្នុងតំបន់ Lincolnshire ប្រទេសអង់គ្លេស អាចមានអាយុច្រើនជាង ១០០០ ឆ្នាំ។
ទី៦៖ ដើម Baobabs រុំព័ទ្ធគ្នាមួយគូ ក្នុងប្រទេសម៉ាដាហ្គាស្កា ត្រូវបានគេដាក់ឈ្មោះឲ្យវាថា ជាដើមឈើគូស្នេហ៍ មានអាយុជិត ១០០០ ឆ្នាំ។
ទី៥៖ ដើម Bristlecone Pine ដែលត្រូវបានគេរកឃើញក្នុងព្រៃ ក្នុងរដ្ឋ California ដែលវាអាចមានអាយុកាលជាង ៤០០០ ឆ្នាំ។
ទី៤៖ ដើម Chestnut ស្ថិតនៅក្នុងតំបន់ Croft Castle ប្រទេសអង់គ្លេស ហើយវាមានអាយុជាង ៤២០ ឆ្នាំ។
ទី៣៖ ដើម Yew ស្ថិតនៅតំបន់Wakehurst Place ភាគខាងលិចទីក្រុងSussex ប្រទេសអង់គ្លេស អាចនឹងដុះកាលពីឆ្នាំ ១៣៩១ ហើយបច្ចុប្បន្នវានៅតែបន្តរីកលូតលាស់។
ទី២៖ ដើម Whittinghame Yew ស្ថិតនៅភាគខាងលិចទីក្រុង Lothian ប្រទេសស្កុតឡែន ហើយវាមានអាយុកាល ជាង ១២០០ ឆ្នាំ។
ទី១៖ ដើម General Sherman ស្ថិតក្នុងឧទ្យាន Sequoia National Park រដ្ឋ California ដែលដើមឈើនេះអាចមានអាយុកាលចាប់ពី ២៣០០ ទៅ ២៧០០ ឆ្នាំ៕
© រក្សាសិទ្ធិដោយ thmeythmey.com