សង្គមអន្តរជាតិ
អន្តរជាតិ
អ្វីដែលលោក Bill Gates សោកស្ដាយបំផុតក្នុងមួយជីវិតគឺមិនចេះនិយាយច្រើនភាសា
×
ក្នុងវេទិកាសួរ-ឆ្លើយ AMA ជាមួយលោក Bill Gatesដែលរៀបចំដោយគេហទំព័រ Reddit លើកទីបីនោះ មានមនុស្សម្នាក់បានសួរលោក Bill Gates ថាតើអ្វីជាការសោកស្តាយដ៏ធំបំផុតនៅក្នុងជីវិតរបស់លោក ។ក្រោយពេលទទួលបានសំណួរនេះ លោក Bill Gates បានផ្ដល់ចម្លើយដ៏គួរឱ្យភ្ញាក់ផ្អើលមួយ៖
លោក Bill Gates បាននិយាយថា៖«ខ្ញុំមានអារម្មណ៍ខ្លួនដូចជាល្ងង់ណាស់ដែលខ្ញុំមិនចេះនិយាយភាសាបរទេសឲ្យបានច្រើនភាសាឡើយ»។លោកបន្តថា«ខ្ញុំបានរៀនភាសាឡាទីននិងក្រិចកាលពីខ្ញុំរៀននៅវិទ្យាល័យ។ ខ្ញុំសង្ឃឹមថាខ្ញុំអាចចេះនិយាយភាសាបារាំងឬភាសាអារ៉ាប់ឬ ភាសាចិនប៉ុន្តែពេលនេះខ្ញុំនៅតែមិនអាចចេះភាសាទាំងនេះដដែល។
ទោះជាយ៉ាងណាក៏ដោយ លោក Bill Gates សង្ឃឹមថា នឹងចំណាយពេលវេលាណាមួយ ដើម្បីសិក្សាភាសាណាមួយក្នុងចំណោមភាសាទាំងបីនេះ ហើយប្រហែលជាលោកអាចសិក្សាភាសាបារាំងដោយសារតែវាងាយស្រួលរៀនជាងគេបំផុត។ លោក Gatesបាននិយាយថាលោកក៏បានព្យាយាមរៀនភាសាទាំងនោះតាមកម្មវិធីDuolingoដែលផ្តល់នូវការបង្រៀនភាសាដោយឥតគិតថ្លៃប៉ុន្តែវាមិនបានធ្វើឲ្យលោកចេះភាសាទាំងនោះដដែល។
គួរបញ្ជាក់ថា មហាសេដ្ឋីបច្ចេកវិទ្យាជាច្រើន បានចំណាយពេលវេលាដើម្បីរៀនភាសាថ្មីៗ ក្រៅពីភាសាអង់គ្លេស។ជាក់ស្ដែងនាយកប្រតិបត្តិក្រុមហ៊ុនFacebook លោក Mark Zuckerberg បានរៀនភាសាចិនកុកងឺខ្លួនគាត់ផ្ទាល់ ក្នុងពេលដែលគាត់កំពុងគ្រប់គ្រងក្រុមហ៊ុនហ្វេសប៊ុក។ជំនាញភាសាចិនរបស់Mark គឺល្អគ្រប់គ្រាន់ ដែលអាចឲ្យលោកឆ្លើយនឹងសំណួរក្នុងរយៈពេល ៣០នាទី ជាមួយនិស្សិតសាកលវិទ្យាល័យមួយនៅប្រទេសចិន កាលពីក្នុងខែតុលា កន្លងទៅបានយ៉ាងរលូន៕
© រក្សាសិទ្ធិដោយ thmeythmey.com