ជាតិ
សង្គមជាតិ
រដ្ឋមន្ត្រីអប់រំនឹងបង្ហាញវិធានការកំណែទម្រង់វិស័យអប់រំនៅរដ្ឋសភា នាចុងខែមិនា
× ភ្នំពេញ៖ រដ្ឋមន្ត្រីក្រសួងអប់រំ លោក ហង់ជួន ណារ៉ុន នឹងធ្វើជាវាគ្មិនឡើងបង្ហាញពីវិធានការ កំណែទម្រង់វិស័យអប់រំនៅកម្ពុជា នៅកាន់គណៈកម្មការទី៧ នៃរដ្ឋសភា នាវិមានរដ្ឋសភា នៅថ្ងៃទី៣១ ខែមីនា ឆ្នាំ២០១៥ ខាងមុខ។ នេះបើតាមការបញ្ជាក់របស់ លោក យ៉ែម បុញ្ញាប្ញទ្ធិ ប្រធានគណៈកម្មការទី៧ នៃរដ្ឋសភា។
បន្ទាប់ពីការចុះទៅពិនិត្យសាកលវិទ្យាល័យភូមិន្ទភ្នំពេញ នៅថ្ងៃ ទី៥ ខែកុម្ភៈនេះ លោក យ៉ែម បុញ្ញាឫទ្ធិ ប្រធានគណៈកម្មការទី ៧ នៃរដ្ឋសភា បានថ្លែងប្រាប់អ្នកសារព័ត៌មានថា លោក ហង់ជួន ណារ៉ុន រដ្ឋមន្ត្រីក្រសួងអប់រំនឹងចូលរួមធ្វើជាវាគ្មិនបង្ហាញពីវិធានការ កំណែទម្រង់វិស័យអប់រំនៅកម្ពុជា នាវិមានរដ្ឋសភា នៅថ្ងៃទី៣១ ខែមីនា ឆ្នាំ២០១៥ខាងមុខនេះ។ លោកបានបញ្ជាក់ ថាបទបង្ហាញលោក ហង់ជួន ណារ៉ុន ផ្តោតលើសំខាន់៖«វិធានការកំណែទម្រង់វិស័យអប់រំ នៅកម្ពុជា»។
ពាក់ពន្ធនឹងវិស័យអប់រំនេះផងដែរប្រធានគណៈកម្មការទី៧ មកពីគណបក្សសង្គ្រោះជាតិ ក៏នឹងបន្តចុះត្រួតពិនិត្យលទ្ធផលនៃការកំណែទម្រង់របស់ក្រសួងអប់រំ នៅក្នុងសាកលវិទ្យាល័យរដ្ឋមួយចំនួន ផ្សេងទៀត ក្នុងនោះរួមមានពុទ្ធិកសាកលវិទ្យាល័យសីហនុរាជសាកលវិទ្យាល័យជាតិគ្រប់គ្រងសាកលវិទ្យាល័យច្បាប់ សាកលវិទ្យាល័យវិទ្យាសាស្ត្រសុខាភិបាល និងសាកលវិទ្យាល័យវិចិត្រសិល្បៈ ព្រមទាំងវិទ្យាល័យ និងសាលាបឋមសិក្សាផ្សេងទៀត។
លោកបញ្ជាក់ថា៖«ការចុះត្រួតពិនិត្យនេះ សំខាន់ចង់ដឹងពីព័ត៌មានចំនួនសិស្សចំនួនគ្រូនិងបរិស្ថាននៅជុំវិញសាលា...ដើម្បីយើងធ្វើកំណែទម្រង់» ៕
© រក្សាសិទ្ធិដោយ thmeythmey.com