សង្គមអន្តរជាតិ
អន្តរជាតិ
សហភាពអឺរ៉ុប បន្តប្រឆាំងទង្វើកាត់ប្រដាប់ភេទស្ត្រីក្នុងពិភពលោក
× នៅរៀងរាល់ថ្ងៃទី៦កុម្ភៈ សហភាពអឺរ៉ុបតែចេញផ្សាយសេចក្តីថ្លែងការណ៍បញ្ជាក់អំពីគោលជំហរប្រឆាំងទង្វើកាត់ប្រដាប់ភេទស្ត្រី ហើយប្រកាសថា គ្មានការអត់ឱនចំពោះការកាត់ប្រដាប់ភេទស្ត្រីនៅក្នុងទ្វីបអឺរ៉ុបក៏ដូចជានៅទូទាំងពិភពលោក ផងដែរ។ ខាងក្រោមនេះ គឺជាខ្លឹមសារនៃសេចក្តីថ្លែងការណ៍របស់សហភាពអឺរ៉ុបដែលសរសេររួមគ្នាដោយ តំណាងជាន់ខ្ពស់សម្រាប់គោលនយោបាយការបរទេស និងសន្តិសុខ និងជាអនុប្រធានគណៈកម្មការអឺរ៉ុប លោកស្រី Federica Mogherini ស្នងការទទួលបន្ទុកផ្នែកយុត្តិធម៌ អ្នកប្រើប្រាស់ និងសមភាព យេនឌ័រ លោកស្រី Vĕra Jourová និងស្នងការទទួលបន្ទុកកិច្ចសហប្រតិបត្តិការ និងអភិវឌ្ឍន៍អន្តរជាតិ លោក Neven Mimica ៖
ក៏ដូចជាការអនុវត្តប្រកបដោយភាពគ្រោះថ្នាក់ផ្សេងៗទៀតដែរ ការកាត់ប្រដាប់ភេទស្ត្រី គឺជាការដាក់ឃុំ កុមារី និងស្ត្រីទាំងឡាយនៅក្នុងប្រព័ន្ធគុណតម្លៃគ្មានសមធម៌ និងប៉ះពាល់ទៅដល់ការអភិវឌ្ឍ ព្រមទាំង ធ្វើឲ្យមានគ្រោះថ្នាក់ចំពោះសង្គមទាំងមូលផងដែរ។ ការប៉ាន់ស្មានបង្ហាញថា អាចមានជនរងគ្រោះរហូត ដល់ ១២៥លាននាក់នៅទូទាំងពិភពលោក ដែលនៅក្នុងនោះ គ្រាន់តែសហភាពអឺរ៉ុបមានជនរងគ្រោះចំនួន ៥០០.០០០នាក់ទៅហើយ។ ការអនុវត្តបែបនេះធ្វើឲ្យផលប៉ះពាល់យ៉ាងធ្ងន់ធ្ងរ និងអស់មួយជីវិតចំពោះសុខភាព និងសុខុមាលភាព ព្រមទាំងអាចបណ្ដាលឲ្យបាត់បង់ជីវិតផងដែរ។
ជានិច្ចកាលយើងប្តេជ្ញាលុបបំបាត់ការកាត់ប្រដាប់ភេទស្ត្រីដែលជាការរំលោភទៅលើសិទ្ធិមនុស្ស និងសិទ្ធិកុមារ។ យើងថ្កោលទោសយ៉ាងខ្លាំងចំពោះអំពើហិង្សាគ្រប់ទម្រង់ប្រឆាំងកុមារី និងស្ត្រី៖ ទោះជា ទំនៀមទម្លាប់ ប្រពៃណី វប្បធម៌ ឯកជនភាព សាសនា ឬអ្វីដែលហៅថាកិត្តិយសនោះ មិនអាចជា កត្តាជំរុញឲ្យមានអំពើហិង្សាទៅលើកុមារី និងស្ត្រីនៅក្នុងរូបភាពណាមួយបានឡើយ។ ហើយកត្តាទាំង នោះក៏មិនអាចប្រើប្រាស់ជាលេសដើម្បីឲ្យបណ្តារដ្ឋនានាគេចវេសពីកាតព្វកិច្ចរបស់ខ្លួននៅក្នុងការទប់ស្កាត់ និងលុបបំបាត់ អំពើហិង្សាប្រឆាំងនឹងស្ត្រី និងដាក់ទោសទណ្ឌចំពោះអ្នកប្រព្រឹត្តដែរ។
សហភាពអឺរ៉ុបកំពុងប្រយុទ្ធប្រឆាំងនឹងការកាត់ប្រដាប់ភេទស្ត្រីនៅតាមមុខព្រួញជាច្រើន ដែលជាផ្នែកមួយ នៃយុទ្ធសាស្ត្រសកលដើម្បីលើកកម្ពស់សមភាពយេនឌ័រ។ គណៈកម្មការអឺរ៉ុបគាំទ្រកិច្ចការរបស់អង្គការមិនមែនរដ្ឋាភិបាលនៅកម្រិតមូលដ្ឋាននៅចំណុចប្រមូលផ្តុំសហគមន៍ដែលអនុវត្តការកាត់ប្រដាប់ភេទស្ត្រី ដែលពាក់ព័ន្ធនឹងស្ត្រី កុមារី បុរស កុមារា ព្រមទាំងអ្នកដឹកនាំប្រពៃណី និងសាសនាផងដែរ។ ក្រៅពីការបន្តផ្តល់មូលនិធិកិច្ចការនៅកម្រិតរដ្ឋជាសមាជិកសហភាពអឺរ៉ុប និងក្នុងចំណោមសាធារណៈជននានាទឹកប្រាក់បន្ថែមចំនួន៤,៥លានអឺរ៉ូនឹងត្រូវរៀបចំដើម្បីគាំទ្រទៅដល់គម្រោងនានាដែលមានគោលដៅទប់ស្កាត់និងប្រយុទ្ធប្រឆាំងអំពើហិង្សាផ្សេងៗពាក់ព័ន្ធនឹងការអនុវត្តប្រកបដោយគ្រោះថ្នាក់នៅក្នុងសហភាពអឺរ៉ុប។
ទន្ទឹមនឹងនេះដែរ យើងកំពុងបង្កើតគោលនយោបាយតាមវេបសាយត៍របស់សភាពអឺរ៉ុប ស្តីពីការកាត់ប្រដាប់ភេទស្ត្រីសម្រាប់អ្នកជំនាញដែលចាប់ផ្តើមធ្វើការជាលើកដំបូងជាមួយជនរងគ្រោះ និង កុមារីដែល ប្រឈមនឹងគ្រោះថ្នាក់។ យើងមានគោលដៅទៅដល់បុគ្គលទំនាក់ទំនងចម្បងដូចជា គិលានុបដ្ឋាកយិការ ចៅក្រម មន្ត្រីផ្នែកសិទ្ធិជ្រកកោន គ្រូបង្រៀន វេជ្ជបណ្ឌិត និងមន្ត្រីនគរបាល ព្រមទាំងគាំទ្រពួកគាត់នៅក្នុង ការលុបបំបាត់ឲ្យបានជាស្ថាពរនូវការអនុវត្តបែបនេះ។
នៅកម្រិតអន្តរជាតិ សហភាពអឺរ៉ុបកំពុងជំរុញឲ្យបណ្តាប្រទេសទាំងអស់ធ្វើការទប់ស្កាត់ ដាក់ទោសទណ្ឌ និងអនុវត្តវិធានការសមស្របដើម្បីផ្លាស់ប្តូរទំនៀមទម្លាប់ដែលគាំទ្រការកាត់ប្រដាប់ភេទស្ត្រីដោយដាក់បញ្ហាទាំងនេះជាអាទិភាពនៅក្នុងរបៀបវារៈសម្រាប់កិច្ចពិភាក្សានយោបាយ និងសិទ្ធិមនុស្សរបស់សហ ភាពអឺរ៉ុបជាមួយនឹងបណ្តាប្រទេសដៃគូពាក់ព័ន្ធផ្សេង។ សហភាពអឺរ៉ុបគាំទ្រចំពោះការតស៊ូមតិឲ្យមាន ច្បាប់ជាតិកាន់តែប្រសើរស្តីពីការកាត់ប្រដាប់ភេទស្ត្រី ការលើកកម្ពស់ការយល់ដឹង ការអប់រំដោយស្មើភាព ស្តីពីគុណភាព និងយេនឌ័រ ព្រមទាំងកិច្ចការរបស់អង្គការនានានៅកម្រិតមូលដ្ឋានផងដែរ។
ជាឧទាហរណ៍នៅក្នុងប្រទេសលីបេរីយ៉ាកិច្ចការទាំងនេះរួមមានការគាំទ្រសង្គមស៊ីវិល ដែលតស៊ូមតិឲ្យ ស្ត្រីទទួលបានយុត្តិធម៌ និងការធ្វើកិច្ចការដើម្បីកាត់បន្ថយការកាត់ប្រដាប់ភេទស្ត្រី និងនៅក្នុងប្រទេស ហ្គីណេប៊ីស៊ូដែលបង្កើតឲ្យមានបរិយាកាសគាំពារដល់សិទ្ធិស្ត្រីលើកកម្ពស់ការបញ្ឈប់ការកាត់ប្រដាប់ភេទស្ត្រីព្រមទាំងផ្តល់កិច្ចគាំទ្រដល់ជនរងគ្រោះផងដែរ។ បណ្តាសកម្មភាពផ្សេងៗទៀតក៏ទទួលបានការគាំទ្រពី សំណាក់បណ្តាប្រទេសជាច្រើនផងដែរ ដូចជាប្រទេសម៉ាលី អ៊ូហ្គង់ដា សៀរ៉ាឡេអូន អេហ្ស៊ីប ម៉ូរីតានី ហ្ស៊ីបូទី យេម៉ែន សេណេហ្គាល់ បេណាំង និងតូហ្គោ។
យើងនឹងបន្តធ្វើការប្រមូលទិន្នន័យកាន់តែប្រសើរនិងលើកកម្ពស់ការយល់ដឹងរបស់យើងអំពីការកាត់ប្រដាប់ភេទស្ត្រីដោយសហការជាមួយវិទ្យាស្ថានអឺរ៉ុបសម្រាប់សមភាពយេនឌ័រ។ ទន្ទឹមនឹងនេះដែរ យើង នឹងបន្តសហការជាមួយអ្នកឯកទេសដែលចូលរួមដោយផ្ទាល់នៅក្នុងកិច្ចខិតខំប្រឹងប្រែងលុបបំបាត់ការអនុវត្តនៅកម្រិតសហគមន៍ ថ្នាក់ជាតិ និងស្ថាប័នអប់រំ។ គោលបំណងរបស់យើង គឺធ្វើឲ្យស្ត្រីនៅទូទាំង ពិភពលោករួចផុតពីការកាត់ប្រដាប់ភេទស្ត្រី។ យើងសូមស្វាគមន៍ចំពោះការដាក់អោយចូលជាធរមាននូវ អនុសញ្ញានាពេលថ្មីៗនេះរបស់ក្រុមប្រឹក្សាអឺរ៉ុបស្តីពីការទប់ស្កាត់ និងប្រយុទ្ធប្រឆាំងអំពើហិង្សាប្រឆាំងស្ត្រី និងអំពើហិង្សាក្នុងគ្រួសារដែលផ្តល់នូវក្របខណ្ឌយ៉ាងមានតម្លៃដើម្បីប្រយុទ្ធប្រឆាំងឲ្យមានប្រសិទ្ធភាពចំពោះអំពើហិង្សាទៅលើស្ត្រី និងកុមារីនៅកម្រិតថ្នាក់ជាតិ និងទូទាំងទ្វីបអឺរ៉ុប ព្រមទាំងការកាត់ប្រដាប់ភេទស្ត្រីផងដែរ។
សហភាពអឺរ៉ុបនៅតែមានការប្តេជ្ញាចិត្តយ៉ាងមោះមុតនៅក្នុងការប្រយុទ្ធប្រឆាំងគ្រប់ទម្រង់នៃអំពើហិង្សាយេនឌ័រនៅក្នុងសហភាពអឺរ៉ុប និងនៅក្រៅតំបន់របស់យើងផងដែរ។ យើងនឹងបន្តកិច្ចខិតខំប្រឹងប្រែងដ៏ទូលំទូលាយរបស់យើងនៅក្នុងការទប់ស្កាត់ការកាត់ប្រដាប់ភេទស្ត្រីនៅក្នុងសហភាពអឺរ៉ុប និងនៅបណ្តា ប្រទេសផ្សេងៗទៀត ព្រមទាំងធ្វើឲ្យមានសមភាពយេនឌ័រដ៏ពិតប្រាកដមួយ”៕
© រក្សាសិទ្ធិដោយ thmeythmey.com