អន្តរជាតិ
នយោបាយអន្តរជាតិ
លោក អូបាម៉ាអញ្ជើញលោក អាបេ និងលោកស៊ីជិនពីងទៅទស្សនកិច្ចនៅអាមេរិក
×
ទីប្រឹក្សាសន្តិសុខជាតិអាមេរិកបានបង្ហើបអោយដឹងថា ប្រធានាធិតបតីអាមេរិកលោក បារ៉ាក់ អូបាម៉ាសម្រេចអញ្ជើញមេដឹកនាំនៅតំបន់អាស៊ីប៉ាស៊ីហ្វិកជាច្រើនរូបទៅកាន់សហរដ្ឋអាមេរិកក្នុងនោះមានប្រមុខរដ្ឋាភិបាលជប៉ុនលោកស៊ិនហ្សូអាបេ និងប្រមុខរដ្ឋចិនលោក ស៊ីជិនពីង។ ការអញ្ជើញមេដឹកនាំជាច្រើនរូបទៅកាន់សហរដ្ឋអាមេរិកនេះត្រូវបានគេចាត់ទុកថាជាការរឹតបន្តឹងទំនាក់ទំនងនិងសម្រួលដល់គោលនយោបាយផ្តោតមកលើអាស៊ីវិញរបស់អាមេរិក។
លោក មុំ ពិទូរ្យ លម្អិតព័ត៌មាននេះ
ប្រធានាធិបតីចិនលោក ស៊ី ជីនពីង និង នាយករដ្ឋមន្ត្រីជប៉ុន ស៊ិនហ្សូអាបេ ត្រូវបានប្រធានាធិបតីអាមេរិកប្រកាសអញ្ជើញអោយមកទស្សនកិច្ចជាផ្លូវការនៅសហរដ្ឋអាមេរិកនាពេលខាងមុខនេះ។ បើតាមការអោយដឹងពីទីប្រឹក្សាសន្តិសុខជាតិជាន់ខ្ពស់របស់អាមេរិកលោកស្រី Susan Rice សហរដ្ឋអាមេរិកសម្រេចអញ្ជើញមេដឹកនាំបណ្តាប្រទេសនៅតំបន់អាស៊ីប៉ាស៊ីហ្វិកដើម្បីពង្រឹងនិងរឹតចំណងមិត្តភាពរួមគ្នាអោយស៊ីជម្រៅ ហើយដំណើរទស្សនកិច្ចផ្លូវរដ្ឋនេះនឹងជំរុញអោយកិច្ចសហប្រតិបត្តិការរវាងអាមេរិកនិងប្រទេសក្នុងតំបន់កាន់តែល្អប្រសើរឡើង។
យ៉ាងណាក៏ដោយមិនមែនមានតែមេដឹកនាំប្រទេសពីរខាងលើទេដែលត្រូវអាមេរិកអញ្ជើញទៅកាន់សេតវិមាន តែបើតាមការអោយដឹងពីមន្ត្រីជាន់ខ្ពស់ខាងលើ ប្រធានាធិបតីឥណ្ឌូនេស៊ីលោក Joko Widodo និងលោកស្រី Park Geun-Hye ប្រធានាធិបតីកូរ៉េខាងត្បូងក៏ត្រូវបានអញ្ជើញអោយទៅទស្សនកិច្ចនៅសហរដ្ឋអាមេរិកផងដែរ។
ទាក់ទិនការអញ្ជើមេដឹកនាំសំខាន់ៗនៅអាស៊ីទៅកាន់សហរដ្ឋអាមេរិកនេះ កើតឡើងក្រោយលោក បារ៉ាក់ អូបាម៉ា ធ្វើទស្សនកិច្ចក្នុងប្រទេសបីនៅអាស៊ីកាលពីខែវិច្ឆិកាកន្លងទៅ ហើយវាក៏ជាយុទ្ធសាស្ត្ររបស់ក្រុងវ៉ាស៊ីនតោនដើម្បីធានាថា គោលនយោបាយការបរទេសរបស់លោក បានឆ្ពោះទៅមុខដោយរលូន។
បើទោះជាមានការបញ្ជាក់ពីការអញ្ជើញនេះក៏ដោយ កាលបរិច្ឆេទនៃដំណើរទស្សនកិច្ចមិនត្រូវបានគេដឹងច្បាស់នោះឡើយ ប៉ុន្តែបើនាយករដ្ឋមន្ត្រីជប៉ុនទៅទស្សនកិច្ចនៅអាមេរិកទាល់តែភាគីទាំងពីរអាមេរិកនិងជប៉ុនអាចបញ្ចប់ការចរចានិងសម្រេចបានកិច្ចព្រមព្រៀងពាណិជ្ជកម្មទ្វេភាគី ក៏ប៉ុន្តែវានៅមានបញ្ហាជាច្រើនទៀតដែលភាគីត្រូវដោះស្រាយទម្រាំអាចសម្រេចបានកិច្ចព្រមព្រៀងពាណិជ្ជកម្មដោយជោគជ័យ។
ចំណែកចិនឯណោះវិញគេមិនដឹងពីកាលបរិច្ឆេទនៃដំណើរទស្សនកិច្ចដូចគ្នា ហើយដំណើរទស្សនកិច្ចរបស់លោកស៊ី ជិនពីង ទៅកាន់អាមេរិកនឹងក្លាយជាដំណើរទស្សនកិច្ចដំបូងបំផុតចាប់តាំងពីលោកឡើងកាន់តំណែងមក។ ប៉ុន្តែយ៉ាងណាមិញសម្រាប់ក្រុងប៉េកាំងគោលនយោបាយផ្តោតលើតំបន់អាស៊ីរបស់ក្រុងវ៉ាស៊ីនតោន ជាចេតនាមួយរបស់អាមេរិកក្នុងការប្រកួតប្រជែងនិងទប់ស្កាត់ការរីកដុះដាលនៃឥទ្ធិពលចិនក្នុងតំបន់។
ដោយឡែក ទាក់ទិនគោលនយោបាយក្រុងវ៉ាស៊ីនតោនមកកាន់អាស៊ី កាលដើមឡើយ នៅដើមអាណត្តិរបស់ប្រធានាធិបតីអាមេរិក បារ៉ាក់ អូបាម៉ា លោកបានរៀបចំគោលនយោបាយការបរទេសថ្មីដោយដកកងទ័ពអាមេរិក សេដ្ឋកិច្ច និងធនធានមនុស្សចេញពីសង្គ្រាមតំបន់មជ្ឈិមបូព៌ា ដោយផ្តោតការចាប់អារម្មណ៍នៅតំបន់អាស៊ីវិញម្តង។
តែទោះជាយ៉ាងណា ប្រធានាធិបតីអាមេរិកខាងលើនេះមិនបានបោះបង់តំបន់ជម្ឈិមបូព៌ាទាំងស្រុងឡើយ សហរដ្ឋអាមេរិកនៅតែតស៊ូរប្តូរផ្តាច់ក្នុងការរក្សាយុទ្ធសាស្ត្រសាបព្រោះប្រជាធិបតេយ្យនៅមជ្ឈិមបូព៌ា ដូចជាគាំទ្រចលនាបដិវត្តន៍និទាឃរដូវនៅអារ៉ាប់ និងសង្គ្រាមប្រឆាំងរបបដឹកនាំនៅស៊ីរី ជាដើម។ ហើយបច្ចុប្បន្ននេះសហរដ្ឋអាមេរិកក៏កំពុងព្យាយាមលូកដៃដោះស្រាយបញ្ហាក្រុមភេរវជនរដ្ឋឥស្លាមនៅក្នុងទឹកដីស៊ីរីនិងអ៊ីរ៉ាក់ផងដែរ។
យ៉ាងណាក៏ដោយក្រៅពីមជ្ឈិមបូព៌ា អាមេរិកក៏ព្យាយាមរក្សាឥទ្ធិពលរបស់ខ្លួននៅអឺរ៉ុប ដូចជាជួយដោះស្រាយវិបត្តិសេដ្ឋកិច្ចនៅអឺរ៉ុប និងថ្មីបំផុតនោះគឺលូកដៃដោះស្រាយក្នុងវិបត្តិអ៊ុយក្រែន៕
.
© រក្សាសិទ្ធិដោយ thmeythmey.com