ខ្មែរក្រហម
ជាតិ
សង្គមជាតិ
សាលាក្តីស្តាប់សក្ខីកម្មលោកស្រី Elizabeth Becker អតីតអ្នកកាសែតជនជាតិអាមេរិក
× សាលាក្តីខ្មែរក្រហមនៅថ្ងៃចន្ទនេះបានបន្តសវនការលើសំណុំរឿង០០២វគ្គ២ ដើម្បីស្តាប់សក្ខីកម្ម របស់លោកស្រី Elizabeth Becker។ លោកស្រី Elizabeth Beckerបានចូលរួមក្នុងនាមជាអ្នកជំនាញដើម្បីផ្តល់សក្ខីកម្មដល់សាលាក្តីខ្មែរក្រហមរយៈពេល៤ថ្ងៃគឺចាប់ពីថ្ងៃទី៩ដល់ថ្ងៃទី១២ខែកុម្ភៈ។ នេះបើតាមការបញ្ជាក់របស់លោកនេត្រ ភក្ត្រា អ្នកនាំពាក្យសាលាក្តីខ្មែរក្រហម។
លោកនេត្រ ភក្ត្រា បានពន្យល់ទៀតថា ការផ្តល់សក្ខីកម្មរបស់លោកស្រី Elizabeth Becker គឺពិតជាមានសារៈសំខាន់ណាស់ ព្រោះលោកស្រីជាអ្នកដែលយល់ដឹងច្រើនពីរបបប៉ុលពត។ លោកស្រីជាអតីតអ្នកកាសែតជនជាតិអាមេរិកដែលបានមកយកព័ត៌មាននៅអំឡុងរបបកម្ពុជាប្រជាធិបតេយ្យនិងបានជួបសម្ភាសន៍ជាមួយបងធំទី១របស់របបកម្ពុជាប្រជាធិបតេយ្យប៉ុល ពត នៅអំឡុងខែធ្នូ ឆ្នាំ១៩៧៨ព្រមទាំងបានសរសេរសៀវភៅចំនួន២ក្បាលទាក់ទងនឹងរបបកម្ពុជាប្រជាធិបតេយ្យផងដែរ។
អ្នកនាំពាក្យសាលាក្តីខ្មែរក្រហមបានបញ្ជាក់ទៀតថា ការស្តាប់សក្ខីកម្មរបស់អ្នកជំនាញ គឺ លោកស្រី Elizabeth Becker នេះអាចបន្តទៅសប្តាហ៍ក្រោយទៀតប្រសិនបើចាំបាច់។
សំណុំរឿង០០២វគ្គ២គឺជាការជំនុំជម្រះដំណាក់កាលទីពីរទៅលើបទចោទបន្ថែមទៀតប្រឆាំងនឹងលោកខៀវសំផននិង លោក នួន ជា ពីដីកាដំណោះស្រាយក្នុងសំណុំរឿង០០២ ។ បទចោទនៅក្នុងសំណុំរឿងនេះមានដូចជា ៖អំពើប្រល័យពូជសាសន៍ប្រឆាំងនឹងជនជាតិចាមនិងជនជាតិវៀតណាម ការរៀបអាពាហ៍ពិពាហ៍ដោយបង្ខំនិងការរំលោភសេពសន្ថវៈ ការដ្ឋានសាងសង់ទំនប់១មករា ការដ្ឋានសាងសង់ព្រលានយន្តហោះកំពង់ឆ្នាំង និងការដ្ឋានលើកទំនប់ត្រពាំងថ្ម ការប្រព្រឹត្តមកលើពុទ្ធសាសនិក និងការកំណត់គោលដៅមកលើអតីតមន្ត្រីនៃរបបសាធារណរដ្ឋខ្មែរជាដើម៕
© រក្សាសិទ្ធិដោយ thmeythmey.com