អន្តរជាតិ
សង្គ្រាមរុស្ស៊ី-អាមេរិកនៅអ៊ុយក្រែនកើតឡើងបើរុស្ស៊ីមិនអាចបញ្ចប់ជម្លោះអ៊ុយក្រែន
× កិច្ចពិភាក្សាថ្មីស្តីពីវិបត្តិអ៊ុយក្រែននឹងចាប់ផ្តើមឡើងនៅក្នុងទីក្រុង Mink ប្រទេសបេឡារ៉ុសនៅថ្ងៃពុធនេះដោយមានភាគីជាច្រើនចូលរួមមានមេដឹកនាំបារាំង អាល្លឺម៉ង់ អ៊ុយក្រែន រុស្ស៊ី និងក្រុមទាមទារផ្តាច់ខ្លួននៅភាគអាគ្នេយ៍។ មុនកិច្ចពិភាក្សា ម្សិលមិញប្រធានាធិបតីអាមេរិកលោក បារ៉ាក់ អូបាម៉ា បានទូរស័ព្ទទៅកាន់ប្រធានាធិបតី វ្ល៉ាឌីមៀ ពូទីន ដើម្បីពិភាក្សាបញ្ហាភាគខាងកើតអ៊ុយក្រែន ព្រមទាំងស្នើលោកពូទីនឆក់យកឱកាសកិច្ចពិភាក្សាតុមូលថ្ងៃពុធនេះដើម្បីបញ្ចប់ជម្លោះអ៊ុយក្រែន។ មិនត្រឹមតែក្រើនរំលឹកលោក ពូទីន អោយដោះស្រាយជម្លោះដោយស្មោះត្រង់ប៉ុណ្ណោះទេ លោកអូបាម៉ាបានព្រមានពីលទ្ធផលដែលរុស្ស៊ីទទួលបានបើមិនព្រោះដោះស្រាយជម្លោះអោយជោគជ័យទេ។ អាមេរិកត្រៀមបំពាក់អាវុធអោយទ័ពអ៊ុយក្រែន គំរាមអឺរ៉ុបអោយដាក់ទណ្ឌកម្មប្រឆាំងរុស្ស៊ីបន្ថែមទៀត។ បើការជជែកគ្នាបរាជ័យរុស្ស៊ីត្រៀមទទួលទណ្ឌកម្មជំហានថ្មីទៀត ប៉ុន្តែការបំពាក់អាវុធកងទ័ពអ៊ុយក្រែនមិនមែនជារឿងសាមញ្ញឡើយ វានឹងក្លាយជាគ្រោះថ្នាក់ធំសម្រាប់អឺរ៉ុបទាំងមូល ហើយអ៊ុយក្រែនក្លាយជាទីតាំងធ្វើសង្គ្រាមរបស់អាមេរិកនិងរុស្ស៊ី។
សូមស្តាប់ការបកស្រាយរបស់លោក សៅ ផលនិស្ស័យ ពាក់ព័ន្ធបញ្ហានេះ៖
មេដឹកនាំដែលពាក់ព័ន្ធវិបត្តិ អ៊ុយក្រែនមួយចំនួនកំពុងស្ថិតនៅក្នុងរដ្ឋធានី Minsk នៃបេឡារ៉ុស ដើម្បីចូលរួមកិច្ចពិភាក្សាជាថ្មីស្វែងរកកិច្ចព្រមព្រៀងសន្តិភាពច្បាស់លាស់មួយសម្រាប់បញ្ចប់វិបត្តិរាំរ៉ៃនៅភាគខាងកើតនៅថ្ងៃពុធនេះ។ គេឃើញវត្តមានប្រធានាធិបតីបារាំងលោក ហ្វ្រង់ស្វ័រ ហូឡង់ អធិការបតីអាល្លឺម៉ង់ អែនជេឡា មឺហ្កែល ប្រធានាធិបតីអ៊ុយក្រែនលោក Petro Poroshenko និងប្រធានាធិបតីរុស្ស៊ីលោក វ្ល៉ាឌីមៀ ពូទីន។ មុនមានកិច្ចប្រជុំ ប្រធានាធិបតីបារាំងលោក ហូឡង់ បានលើកឡើងថា ភាគីនីមួយៗត្រៀមលក្ខណៈ និងឆន្ទៈរួចរាល់ហើយក្នុងការដោះស្រាយជម្លោះអ៊ុយក្រែនអោយជោគជ័យ ប៉ុន្តែលោកសង្កត់ធ្ងន់ថា ភាគីទាំងអស់នៅមិនទាន់ច្បាស់នៅឡើយទេពួកគេមានលទ្ធភាពធ្វើបានកម្រិតណានោះ។ ពិតណាស់ឆន្ទៈតែម្យ៉ាងមិនគ្រាប់គ្រាន់ឡើយក្នុងការដោះស្រាយវិបត្តិនៅអ៊ុយក្រែនបច្ចុប្បន្ន ដ្បិតភាគីដែលចូលតុចរចានៅមិនទុកចិត្តគ្នាសោះ។
ក្នុងកិច្ចពិភាក្សាតុមូលនៅបេឡារ៉ុសចាប់ផ្តើមនៅថ្ងៃពុធ ប៉ុន្តែកាលពីម្សិលមិញនេះការផ្ទុះអាវុធកើតឡើងកាន់តែខ្លាំងនៅភាគខាងកើត រហូតដល់មានការបាញ់ផ្លោងដាក់គ្នាខ្លាំងផង។ មនុស្សជាង ១០នាក់ត្រូវបានគេរាយការណ៍ថាបានស្លាប់បាត់បង់ជីវិតផងដែរ ខណៈពេលដែលក្រុមឧទ្ទាមបដិសេធការបាញ់ផ្លោងនេះ។ ចំណែកនៅបេឡារ៉ុសភាគីតំណាងពាក់ព័ន្ធមានទាំងក្រុមឧទ្ទាមគាំទ្ររុស្ស៊ីផង និងតំណាងអង្គការកិច្ចសហប្រតិបត្តិការនិងសន្តិសុខអឺរ៉ុបផងនាំគ្នាដុតដៃដុតជើងរៀបចំគម្រោងសន្តិភាពសម្រាប់ប្រទេសអ៊ុយក្រែនមុនកិច្ចប្រជុំថ្ងៃនេះ។ ប៉ុន្តែមិនមានអ្នកណាបញ្ជាក់ពីជំនួបម្សិលមិញមានផ្លែផ្កាបែបណាទេ។ បើតាមការអោយដឹងពីសំណាក់រដ្ឋមន្ត្រីការបរទេសបារាំង Laurent Fabius ចំណុចដែលត្រូវដាក់បញ្ជូលក្នុងរបៀបវារៈនៃកិច្ចពិភាក្សានេះមានដូចការបង្កើតបទឈប់បាញ់ជាប្រញាប់ ដកសព្វាវុធធុនធ្ងន់ពីតំបន់ជម្លោះ បង្កើតតំបន់គ្មានយោធា ព្រមទាំងបង្កើតការត្រួតពិនិត្យព្រំដែនអោយមានប្រសិទ្ធភាពបញ្ចៀសការប្រយុទ្ធគ្នា។ បញ្ហាដែលដាក់ក្នុងរៀបវារៈមិនខុសគ្នាប៉ុន្មានពីចំណុចចែងក្នុងកិច្ចព្រមព្រៀងក្រុង Minsk ដែលឯកភាពដោយភាគីជម្លោះកាលពីខែកញ្ញាឆ្នាំ ២០១៤ឡើយ ប៉ុន្តែប្រធានាធិបតីបារាំងចង់ស្នើសុំអោយអោយប្រមុខរដ្ឋអ៊ុយក្រែន Poroshenko ផ្តល់ស្វ័យភាពបន្ថែមដល់បណ្តាខេត្តភាគអាគ្នេយ៍ដែលបះបោរចង់រត់ចូលជាមួយរុស្ស៊ីផងដែរ។
កាលពីម្សិលមិញនេះដែរ ប្រធានាធិបតីអាមេរិកលោក បារ៉ាក់ អូបាម៉ា ក៏ដាច់ចិត្តទូរស័ព្ទទៅលោក ពូទីន ដើម្បីពិភាក្សាពីដំណើរការស្វែងរកសន្តិភាពជូនប្រជាជនអ៊ុយក្រែនដែរ។ មេដឹកនាំរូបនេះបានស្នើអោយរដ្ឋាភិបាលក្រេមឡាំងដាក់ចិត្តដាក់កាយឆក់យកឱកាសចុងក្រោយនៃកិច្ចពិភាក្សានេះសង្គ្រោះបទឈប់បាញ់និងរកសន្តិភាពពិតប្រាកដដល់អតីតរដ្ឋសហភាពសូវៀតអ៊ុយក្រែននេះ។ ដោយឡែកលោក អូបាម៉ា ឆ្លៀតយកឱកាសគំរាមរុស្ស៊ី ប្រសិនបើការចរចាបរាជ័យ ព្រោះអាមេរិកជឿជាក់ថារុស្ស៊ីជាអ្នកផ្គត់ផ្គង់អាវុធធុនធ្ងន់ធុនស្រាលដល់ក្រុមឧទ្ទាមភាគខាងកើតដើម្បីវាយប្រហារទាហានក្រុងគៀវ។ មេដឹកនាំអាមេរិករូបនេះបានអះអាងថា រុស្ស៊ីនឹងរងទុក្ខជាងបច្ចុប្បន្ននេះទ្វេដង បើសិនជារុស្ស៊ីនៅបន្តមហិច្ឆតាវាតទឹកដី បញ្ជូនទ័ព ផ្តល់អាវុធ និងហិរញ្ញវត្ថុជួយគាំទ្រក្រុមឧទ្ទាមប៉ងផ្តាច់ខ្លួនចូលរួមជាមួយរុស្ស៊ី។ លោកអូបាម៉ា រំលឹកជាថ្មីថារដ្ឋាភិបាលលោកនឹងបំពាក់អាវុធដល់កងកម្លាំងអ៊ុយក្រែន ដើម្បីទប់ទល់កងកម្លាំងគាំទ្ររុស្ស៊ី។
បច្ចុប្បន្ននេះ រដ្ឋបាលលោកអូបាម៉ា កំពុងពិចារណាបញ្ជូនអាវុធយុទ្ធភ័ណ្ឌទៅអោយកងកម្លាំងអ៊ុយក្រែន ប៉ុន្តែលោកមិនទាន់សម្រេចចុងក្រោយនៅឡើយទេ បើសិនជាភាគីជម្លោះប្រើប្រាស់វិធានការការទូតដោះស្រាយជម្លោះដោយសន្តិវិធីចប់សព្វគ្រប់អស់ហើយមិនបានការ ការបំពាក់អាវុធជាជម្រើសចុងក្រោយ។ ប្រហែលជាមិនមែនដំណោះស្រាយទេ ដែលលោកអូបាម៉ាស្រមៃឃើញការប្រើប្រាស់អាវុធដើម្បីបញ្ចប់ជម្លោះនៅភាគខាងកើតអ៊ុយក្រែននោះ ព្រោះមហាអំណាចទាំងពីររុស្ស៊ីអាមេរិកនឹងធ្វើសង្គ្រាមលើបង្ហូរឈាមប្រជាជនអ៊ុយក្រែនលើទឹកដីអ៊ុយក្រែន រកផ្លូវចប់មិញឃើញផងក៏ថាបាន។
វាជាគ្រោះថ្នាក់មួយ ហើយនិយាយម្យ៉ាងទៀតបានថាវាអាចក្លាយជាកំហុសឆ្គងរបស់អាមេរិកផង បើហ៊ានបំពាក់សព្វាវុធដល់ទាហានអ៊ុយក្រែន។ ចេតនារបស់អាមេរិកក្នុងការជួយអ៊ុយក្រែនធ្វើអោយប្រទេសនៅសហភាពអឺរ៉ុបព្រួយបារម្ភខ្លាំង ដូច្នេះបានជាមេដឹកនាំអឺរ៉ុបចេញមុខចេញមាត់សម្បើមណាស់ក្នុងការដោះស្រាយបញ្ហាអ៊ុយក្រែន ហើយលោកស្រីអធិការបតីអាល្លឺម៉ង់បានបង្ហាញជំហរតំណាងសហភាពអឺរ៉ុបប្រឆាំងការប៉ុនប៉ងបញ្ជូនសព្វាវុធរបស់លោកអូបាម៉ា។ អឺរ៉ុបយល់ច្បាស់ថា បើបណ្តែតបណ្តោយអោយអាមេរិកលូកដៃកាន់តែជ្រៅបំពាក់អាវុធអ៊ុយក្រែន ជម្លោះរីកសាយភាយដល់ប្រទេសនៅតំបន់អឺរ៉ុបផ្សេងទៀតដែលវានឹងបង្កផលប៉ះពាល់ខ្លាំងដល់សហភាពអឺរ៉ុបទាំងមូល។ ណាមួយរឿងអ៊ុយក្រែនមិនមែនជារឿងដែលអាមេរិកត្រូវលូកដៃទេ ហើយក៏មិនមានប្រយោជន៍ប៉ុន្មានសម្រាប់អាមេរិកដែរ ប៉ុន្តែវាជាផលប្រយោជន៍រួមរបស់អឺរ៉ុបនិងរុស្ស៊ីតែប៉ុណ្ណោះ។ អោយប្រាកដទៅ កិច្ចចរចាជាច្រើនលើកច្រើនសារកន្លង មិនបានរកដំណោះស្រាយសមស្របឆ្លើយតបបញ្ហាដែលកើតឡើងបច្ចុប្បន្ននៅអ៊ុយក្រែនឡើយ។ ជម្លោះអ៊ុយក្រែនតាំងពីដើមមកផ្តើមចេញពីការប៉ុនប៉ងរបស់អ៊ុយក្រែនដើម្បីចូលរួមជាមួយសហភាពអឺរ៉ុប និងភ្ជាប់ខ្លួនជាមួយអង្គការណាតូ។ បើសិនចង់អោយជម្លោះនេះដោះស្រាយឆាប់ចប់បញ្ចប់ការលូកដៃរបស់រុស្ស៊ីក្នុងសំណុំរឿងជម្លោះភាគខាងកើត រដ្ឋាភិបាលអ៊ុយក្រែនប្រហែលជាត្រូវបញ្ឈប់ចេតនាភ្ជាប់ខ្លួនជាមួយសហភាពអឺរ៉ុប និងបក្សសម្ព័ន្ធយោធាណាតូ។ នេះមានន័យថា កិច្ចពិភាក្សាថ្ងៃពុធនេះនឹងនៅតែមិនរកដំណោះស្រាយអចិន្ត្រៃយ៍សម្រាប់អ៊ុយក្រែនបានឡើយ យ៉ាងច្រើនផ្អាកការប្រយុទ្ធបណ្តោះអាសន្នតែប៉ុណ្ណោះ៕
© រក្សាសិទ្ធិដោយ thmeythmey.com