អន្តរជាតិ
នយោបាយអន្តរជាតិ
កិច្ចពិភាក្សារកសន្តិភាពនៅអ៊ុយក្រែនបិទបញ្ចប់ក្រោយជជែកតឹងសរសៃក១៤ម៉ោង
×
ក្រោយបញ្ចប់ការពិភាក្សាអស់ពេល១៤ម៉ោងយ៉ាងតានតឹងនៅទីក្រុង Minsk មេដឹកនាំទាំងបួនបារាំង អាល្លឺម៉ង់ អ៊ុយក្រែន និងរុស្ស៊ីឯកភាពគ្នាចុះហត្ថលេខាលើកិច្ចព្រមព្រៀងរួមមួយបន្ទាប់ពីការពិភាក្សា។ ប៉ុន្តែបើតាមការអោយដឹងពីទីភ្នាក់ងារព័ត៌មានReuters មិនមានព័ត៌មានលម្អិតណាមួយទាកទិនកិច្ចសំនុំឯកសារដែលមេដឹកនាំទាំងនោះចុះហត្ថលេខាត្រូវបានគេទម្លាយអោយដឹងឡើយ។
កិច្ចប្រជុំពិភាក្សាពីការស្វែងរកសន្តិភាពបញ្ចប់វិបត្តិនៅអ៊ុយក្រែនត្រូវបានបិទបញ្ចប់ជាផ្លូវការ ក្រោយមេដឹកនាំបណ្តាប្រទេសអឺរ៉ុប មេដឹកនាំរុស្ស៊ី និងអ៊ុយក្រែនចំណាយពេលអស់ ១៤ម៉ោងដើម្បីជជែកពិភាក្សាគ្នានៅទីក្រុង Minsk ប្រទេសបេឡារុស។ កិច្ចចរចាប្រកបដោយភាពតានតឹងរវាងភាគីដែលចូលរួមចាប់ផ្តើមតាំងពីម្សិលមិញ ហើយគេឃើញមេដឹកនាំរុស្ស៊ីលោក វ្ល៉ាឌីមៀ ពូទីន និងលោកប្រធាធិបតីអុយក្រែន Petro Poroshenkoចាប់ដៃគ្នាមុនមានការពិភាក្សា។
ចំណុចសំខាន់បំផុតនៃការពិភាក្សាគឺធ្វើយ៉ាងណាជំរុញអោយភាគីជម្លោះអ៊ុយក្រែនចុះកិច្ចបទឈប់បាញ់គ្នាសិន ហើយបន្ទាប់មករៀបចំដកសព្វាវុធចេញពីតំបន់មានជម្លោះ។ ម្យ៉ាងមេដឹកនាំរុស្ស៊ី បានស្នើសុំអោយរដ្ឋាភិបាលក្រុងគៀវផ្តល់ស្វ័យភាពដល់តំបន់ដែលកំពុងមានជម្លោះ ប៉ុន្តែក្រុងគៀវតបវិញថា ខ្លួនអាចត្រឹមចែករំលែកអំណាចអោយតំបន់រដ្ឋបាលភាគអាគ្នេយ៍ខ្លះៗប៉ុណ្ណោះ។
យ៉ាងណាក៏ដោយក្រោយបញ្ចប់ការពិភាក្សាគេទទួលបានព័ត៌មានថាភាគីទាំងអស់នឹងចុះហត្ថលេខាលើសំណុំឯកសារមួយរួមគ្នា ប៉ុន្តែចំណុចឬអត្ថន័យនៃឯកសារនោះមិនត្រូវបានគេទម្លាយអោយដឹងនោះឡើយ។ មុនមានការពិភាក្សាប្រធានាធិបតីអ៊ុយក្រែនបានព្រមានជាមុនរួចស្រេចហើយថា បើសិនជាកិច្ចចរចាបរាជ័យ លោកនឹងអនុវត្តច្បប់អាជ្ញាសឹកនៅក្នុងតំបន់ដែលកំពុងមានជម្លោះនៅភាគអាគ្នេយ៍ប្រទេស ប៉ុន្តែច្បាប់អាជ្ញាសឹកមិនមែនជាដំណោះស្រាយឡើយ វាត្រឹមតែជួយអោយជម្លោះកាន់តែធ្ងន់ធ្ងរជាងមុនតែប៉ុណ្ណោះ។
មេដឹកនាំបារាំង និងអធិការបតីអាល្លឹម៉ងដែលចូលរួមក្នុងកិច្ចប្រជុំនៅក្នុងប្រទេសបេឡារ៉ុសដែរនោះ ហាក់បីដូចជាប្រឹងប្រែងខ្លាំងណាស់ដែរដើម្បីជួយជំរុញអោយភាគីទាំងពីរឈានដល់ការឯកភាពគ្នា ប៉ុន្តែកិច្ចលទ្ធផលនៃកិច្ចប្រជុំយ៉ាងណាមានតែរង់ចាំមើលដូចគ្នា។ ដោយឡែក បើសិនជាភាគីមិនអាចសម្រេចផ្លែផ្កាបានក្នុងការបញ្ចប់ការបង្ហូរឈាមគ្នានៅអ៊ុយក្រែន សហរដ្ឋអាមេរិកនឹងបញ្ជូនសព្វាវុធដើម្បីបំពាក់ដល់កងទ័ពអ៊ុយក្រែនជាក់ជាមិនខាន ហើយអឺរ៉ុបដែលអនុម័តទណ្ឌកម្មជំហានថ្មីប្រឆាំងរុស្ស៊ីតែព្យួរបណ្តោះអាសន្នរង់ចាំមើលលទ្ធផលនៃកិច្ចប្រជុំនោះក៏ត្រូវដើរទៅមុខដូចគ្នា៕ដោយ សៅ ផលនិស្ស័យ
© រក្សាសិទ្ធិដោយ thmeythmey.com