ជាតិ
សេដ្ឋកិច្ច
ក្រុមហ៊ុនផ្សារសូរិយាប្រជុំរកច្រកចេញជាមួយអភិបាលខណ្ឌដូនពេញ នៅព្រឹកនេះ
× អ្នកគ្រប់គ្រងផ្សារទំនើបសូរិយាជួបប្រជុំ ជាមួយអភិបាលខណ្ឌដូនពេញ នៅថ្ងៃទី១៣ ខែកុម្ភៈ ឆ្នាំ២០១៥នេះ ជុំវិញការធ្វើកូដកម្មរបស់អាជីវករជាង ១០០នាក់ ដែលទាមទារឱ្យម្ចាស់ ផ្សារអនុវត្តតាមលក្ខខណ្ឌ ៣ចំណុច ក្នុងនោះរួមមាន ការបញ្ចុះតម្លៃជួលតូប ៣០ភាគរយ លុប ចោលការកាត់លុយពីអាជីវករនៅពេលសេងតូបបន្តនិងទាមទារឲ្យបញ្ឈប់ការងារអ្នកគ្រប់គ្រង ២នាក់។
បន្ទាប់ពីការចរចារមិនទាន់រកដំណោះស្រាយបាននោះ ចំពោះការតវ៉ារបស់អាជីវករផ្សារទំនើប សូរិយារយៈពេល ២ថ្ងៃកន្លងមកនេះ នៅព្រឹកនេះ លោក ឡាំ សុភាព អ្នក គ្រប់គ្រងផ្សារសូរិយា កំពុងជួបប្រជុំជាមួយអភិបាលខណ្ឌដូនពេញ លោក គួច ចំរើន ដើម្បីស្វែងដំណោះស្រាយរវាងក្រុមហ៊ុន និងអាជីវករ។
ក្នុងការចរចាកន្លងមក លោក ឡាំ សុភាព អ្នកគ្រប់គ្រងផ្សារសូរិយា ប្រាប់ថា ក្រុមហ៊ុនបាន យល់ព្រមបញ្ចុះតម្លៃឈ្នួលតូបត្រឹម ២០ភាគរយ តែអាជីវករត្រូវអនុវត្តន៍នូវលក្ខខណ្ឌ ៤ចំណុច។ ប៉ុន្តែ លោកបន្តថា អាជីវករមិនព្រមទទួលយកដំណោះស្រាយនោះទេ ពួកគេទាម ទារឱ្យមានការបញ្ចុះ៣០ភាគរយ ដោយគ្មានលក្ខខណ្ឌ។
បើតាម លោក ឡាំ សុភាព លក្ខខណ្ឌ ៤ចំណុច ដែលក្រុមហ៊ុនផ្សារទំនើបកណ្តាលរាជ ធានីភ្នំពេញដាក់ឱ្យនោះ រួមមាន ទីមួយ ការរៀបចំសណ្តាប់ធ្នាប់តូប ទីពីរ ការបង់ថ្លៃឈ្នួលតូប ទៀងទាត់ ទីបី ការបើកបិទតូបតាមពេលវេលាកំណត់របស់ផ្សារពីម៉ោង៨ព្រឹក ដល់ម៉ោង ៩យប់ និងទីបួនគឺ ការបិទតម្លៃលើទំនិញឲ្យបានច្បាស់លាស់។
គួររម្លឹកថា បន្ទាប់ពីការចរចាមិនបានលទ្ធផល នៅព្រឹកថ្ងៃទី១២កុម្ភៈ ម្សិលមិញនេះ អាជីវករលក់ដូរក្នុងផ្សារទំនើបសូរិយាជាង១០០នាក់ បាននាំគ្នាបិទច្រកចេញចូលផ្សារ ដើម្បីដាក់គំនាបឲ្យភាគីផ្សារបញ្ចុះថ្លៃឈ្នួលតូប៣០ភាគរយ និងដកអ្នកគ្រប់គ្រងផ្សារពីរនាក់ចេញ គឺ អ្នកស្រី ជា សុខហៀក និងលោក ឡាំ សុភាព៕
© រក្សាសិទ្ធិដោយ thmeythmey.com