អន្តរជាតិ
នយោបាយអន្តរជាតិ
ខ្សែព្យួរកលោក សាដាំ ហ៊ូសេន ត្រូវគេដាក់ដេញថ្លៃលក់ក្នុងតម្លៃ ៧ លានដុល្លារ
× ខ្សែពួរដែលត្រូវបានគេប្រើ សម្រាប់ព្យួរកប្រហារជីវិត អតីតមេដឹកនាំផ្ដាច់ការរបស់ប្រទេសអ៊ីរ៉ាក់ គឺលោក សាដាំ ហ៊ូសេន ត្រូវបានគេដាក់ដេញថ្លៃលក់ជាសាធារណ ខណៈពេលដែលមានព័ត៌មានលេចឮថា មានអ្នកហ៊ានសដេញថ្លៃខ្សែពួរនោះ ក្នុងតម្លៃរហូតដល់ ៧ លានដុល្លារ។
យោងតាមការផ្សាយរបស់ កាសែត New York Post លោក Mowaffak Al-Rubaie ដែលជាអតីតអ្នកនយោបាយអ៊ីរ៉ាក់ បានដាក់លក់សម្ភារជាច្រើនអស់រយៈពេលជាងប្រាំបីឆ្នាំមកហើយ បន្ទាប់ពីលោកបានឃើញផ្ទាល់ភ្នែក នៅពេល លោក សាដាម ហ៊ូសេន ត្រូវបានគេកាត់ទោសប្ហារជីវិតដោយព្យួរកនៅក្នុងឆ្នាំ ២០០៦ ។
មន្ត្រីនយោបាយជាន់ខ្ពស់អ៊ីរ៉ាក់ ដែលគេមិនស្គាល់អត្តសញ្ញាណរូបនេះ បានប្រាប់បណ្តាញសារព័ត៌មានមជ្ឈិមបូព៌ា នៅក្នុងសប្តាហ៍នេះថា មានគិតមកដល់ពេលនេះមានមនុស្សជាច្រើនមកពីអ៊ីស្រាអែល អ៊ីរ៉ង់ និងកូវ៉ែត បានដណ្តើមគ្នាដេញថ្លៃទិញខ្សែពួរនោះ ដោយមានអតថិជនម្នាក់ហ៊ានដេញថ្លៃរហូតដល់ ៧ លានដុល្លារ។
បើទោះបីជានេះគឺជាការដេញថ្លៃគួរឱ្យអស់សំណើចមួយក៏ដោយ លោក Al-Rubaie បាននិយាយថា លោកចង់ឱ្យមានការដេញថ្លៃកាន់តែច្រើនជាងនេះទៀត។ គាត់ធ្លាប់បានប្រាប់កាសែត Independent កាលពីឆ្នាំ២០១៣ ថា កូនចៅរបស់ លោក សាដាម ហ៊ូសេន បានយកខ្សែពួរនេះមកវិញ បន្ទាប់ពីពួកគេបានព្យួរកអតីតមេដឹកនាំអ៊ីរ៉ាក់រួចរាល់នោះ។
ពាក់ព័ន្ធនឹងករណីនេះ រដ្ឋាភិបាលអ៊ីរ៉ាក់មិនបានធ្វើអធិប្បាយទេ ប៉ុន្តែច្បាប់ក្នុងប្រទេសអ៊ីរ៉ាក់បានចែងថា ប្រសិនបើវត្ថុទាំងនេះត្រូវបានគេដាក់លក់ នោះប្រាក់ត្រូវតែចូលទៅកាន់ហិបថវិការបស់រដ្ឋ៕
© រក្សាសិទ្ធិដោយ thmeythmey.com