អន្តរជាតិ
កិច្ចព្រមព្រៀងក្រុងមីនស្គ៍ដ៏ផុយស្រួយ បានចូលជាធរមាននៅអ៊ុយក្រែន
× កិច្ចព្រមព្រៀងក្រុងមីនស្គ៍ ដើម្បីបញ្ចប់ជម្លោះភាគខាងកើតអ៊ុយក្រែនបានចូលជាធរមាន នៅម៉ោង៤ទៀបភ្លឺថ្ងៃអាទិត្យនេះ ត្រូវជាម៉ោង១២អាធ្រាតថ្ងៃសៅរ៍ ចូលថ្ងៃអាទិត្យ នៅអ៊ុយក្រែន។ ប៉ុន្មានម៉ោងមុនចូលជាធរមាន អំពើហិង្សាសម្លាប់មនុស្សនៅភាគខាងកើតនៅតែបន្តមាន។
ប៉ុន្មានម៉ោងមុនកិច្ចព្រមព្រៀងចូលជាធរមាន ការវាយប្រហារនៅតែបន្តមាននៅភាគខាងកើតប្រទេសអ៊ុយក្រែន។ ថ្ងៃសៅរ៍ម្សិលមិញ មនុស្សយ៉ាងហោច១៤នាក់ ក្នុងនោះមានជនស៊ីវិល៦នាក់ និងទាហាន៨នាក់បានស្លាប់ក្នុងអំពើហិង្សា។ ក្រុមបះបោរគាំទ្ររុស្ស៊ីនៅតែបន្តប្រយុទ្ធជាមួយទាហានអ៊ុយក្រែន នៅក្រុងយុទ្ធសាស្ត្រDebaltseve។ នៅក្រុងនេះ ក្រុមបះបោរបានឡោមព័ទ្ធទាហានអ៊ុយក្រែនស្ទើរតែទាំងស្រុង។ នៅចំពោះមុខស្ថានការណ៍ដ៏តានតឹង ប្រធានាធិបតីអ៊ុយក្រែន ពេត្រូ ប៉ូរ៉ូឆិនកូ បានគំរាមម្សិលមិញ ថានឹងដាក់ច្បាប់សឹកអោយប្រើទូទាំងប្រទេសអ៊ុយក្រែន ករណីកិច្ចព្រមព្រៀងក្រុងមីនស្គ៍ជួបបរាជ័យ។
កិច្ចព្រមព្រៀងក្រុមមីនស្គ៍មានគោលការណ៍សំខាន់អោយភាគីជម្លោះផ្អាកការប្រយុទ្ធគ្នា ដកអាវុធធុនធ្ងន់ចេញពីតំបន់ជម្លោះ និងបង្កើតអោយមានតំបន់ដែលគ្មានសកម្មភាពយោធា។ ប៉ុន្តែកិច្ចព្រមព្រៀងនៅផុយស្រួយខ្លាំង ដោយសារតែហិង្សានៅតែបន្តមាន ទោះជាភាគីជម្លោះបានចុះហត្ថលេខា កាលពីថ្ងៃព្រហស្បតិ៍រួចហើយក៏ដោយចុះ។ អាមេរិកបានចោទរុស្ស៊ីថា នៅតែបន្តផ្តល់អាវុធអោយក្រុមបះបោរភាគខាងកើត។
ប៉ុន្មានម៉ោងមុនកិច្ចព្រមព្រៀងនេះចូលជាធរមាន ប្រធានាធិបតីរុស្ស៊ី លោកពូទីន ប្រធានាធិបតីបារាំង លោកហូឡង់ និងប្រមុខដឹកនាំអាល្លឺម៉ង់ លោកស្រីមែរគែល បានពិភាក្សាគ្នាជាថ្មី គូសបញ្ជាក់ឡើងវិញ ពីភាពចាំបាច់នៃការផ្អាកការប្រយុទ្ធគ្នា។ នៅថ្ងៃអាទិត្យនេះ មេដឹកនាំទាំង៣រូបនេះ និងប្រធានាធិបតីអ៊ុយក្រែនប៉ូរ៉ូឆិនកូ នឹងជជែកបូកសរុបពីស្ថានភាពអ៊ុយក្រែនជាថ្មីម្តងទៀត៕
© រក្សាសិទ្ធិដោយ thmeythmey.com