ជាតិ
សង្គមជាតិ
ស្អែក លោក សុខ ទូច ធ្វើសន្និសីទកាសែតបង្ហាញផលប៉ះពាល់ទំនប់វារីអគ្គិសនីដន សាហុង
×![]()
ដោយ: ខន ចំប៉ា
លោក សុខ ទូច សាស្ត្រាចារ្យវិទ្យាសាស្ត្រនយោបាយ និងជាអ្នកវិភាគសង្គម នយោបាយនៅកម្ពុជា នឹងរៀបចំសន្និសីទសារព័ត៌មានមួយស្តីពីផលប៉ះពាល់របស់គម្រោងសាងសង់ទំនប់វារីអគ្គិសនីដនសាហុង។ សន្និសីទសារព័ត៌មាននេះនឹងចាប់ផ្តើមនៅម៉ោង៩ព្រឹកថ្ងៃចន្ទទី២៣កុម្ភៈដើមសប្តាហ៍ក្រោយនៅរាជបណ្ឌិតសភាកម្ពុជា។
សន្និសីទសារព័ត៌មាន ស្តីពីផលប៉ះពាល់របស់គម្រោងសាងសង់ទំនប់វារីអគ្គិសនីដន សាហុង នឹងត្រូវរៀបចំឡើងថ្ងៃចន្ទទី២៣កុម្ភៈដើមសប្តាហ៍ក្រោយនេះ នៅរាជបណ្ឌិតសភាកម្ពុជា។ សន្និសីទសារព័ត៌មាននេះ គឺជាការផ្តួចផ្តើមគំនិត របស់សាស្ត្រាចារ្យវិទ្យាសាស្ត្រនយោបាយ និងជាអ្នកវិភាគសង្គម នយោបាយនៅកម្ពុជា លោកសុខទូច។
ថ្លែងប្រាប់សារព័ត៌មានថ្មីៗ អ្នកវិភាគសង្គម នយោបាយកម្ពុជារូបនេះ បានឲ្យដឹងថា មានចំណុចសំខាន់ៗចំនួន៣ ដែលលោកព្រួយបារម្ភនពេលសាងសង់ទំនប់វារីអគ្គិសនីដនសាហុង ទី១. ការបាត់បង់សត្វផ្សោតទន្លេមេគង្គ ដែលជានិមិត្តរូបនៃជីវចម្រុះនៅក្នុងទន្លេនេះ ទី២. បំលាស់ទីរបស់មច្ឆាជាតិនៅតំបន់នេះ ដោយសារតែសក្តានុពលរបស់វានឹងបិទប្រឡាយហ៊ូ សាហុង ដែលជាផ្នែកតែមួយគត់របស់ទន្លេមេគង្គ ដែលអនុញាតឲ្យមច្ឆាជាតិ អាចធ្វើដំណើរឆ្លងកាត់បាននៅរដូវប្រាំង និងទី៣. ការប្រែប្រួលនៃចរន្តទឹកហូរដែលនឹងធ្វើឲ្យប៉ះពាល់ដល់មច្ឆាជាតិ និងជីវចម្រុះនៅក្នុងទន្លេ។
គម្រោងសាងសង់ទំនប់វារីអគ្គិសនីដន សាហុង នៅក្នុងប្រទេសឡាវ ត្រូវបានអង្គការសង្គមស៊ីវិលជាតិ និងអន្តរជាតិជឿជាក់ថា នឹងផ្តល់ផលប៉ះពាល់ធ្ងន់ធ្ងរដល់បណ្តាប្រទេសជាសមាជិកទន្លេមេគង្គ ដូចជាកម្ពុជា ថៃ និងវៀតណាមជាដើម។
សូមបញ្ជាក់ថា ទំនប់ដន សាហុង មានកំពស់ជាង៣០ម៉ែត្រ និងមានកម្លាំង៣៨០មេហ្គាវ៉ាត់ ស្ថិតនៅនៅលើដងទន្លេមេគង្គ ក្នុងតំបន់ស៊ីផាន់ដន ដែលមានចំងាយប្រមាណជា២គីឡូម៉ែត្រពីព្រំដែនកម្ពុជា-ឡាវ។ តំនប់នេះ ស្ថិតនៅត្រង់ច្រកហ៊ូ សាហុង ស្ថិតនៅចន្លោះកោះដន សាហុង និងកោះដន សាដាម នៃខេត្តចម្ប៉ាសាក់ ប្រទេសឡាវ។
ទំនប់នេះបានចាប់ផ្តើមសាងសង់ឡើងកាលពីឆ្នាំ២០០៧ ដោយក្រុមហ៊ុនវិស្វកម្ម និងសំណង់ម៉ាឡេស៊ី Mega First Corporation Berhad ហើយបានផ្អាកសកម្មភាពម្តងហើយ ដោយសារមានការតវ៉ាពីប្រទេសតាមដង មេគង្គឯទៀត។
ក៏ប៉ុន្តែទំនប់នេះបានចាប់ផ្តើមសាងសង់ឡើងវិញកាលពីឆ្នាំ២០១៣ នៅពេលនោះប្រទេសឡាវបានប្រកាសថាទំនប់ដន សាហុង មិនមានផលប៉ះពាល់ទៅដល់មច្ឆាជាតិ និងផ្នែកផ្សេងៗទៀតនោះទេ ព្រោះមានទីតាំងស្ថិតនៅលើដៃទន្លេ មិនមែននៅលើទន្លេមេនោះទេ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
5 ម៉ោង
