ជាតិ
នយោបាយជាតិ
ចូលឆ្នាំចិន៖ មន្ត្រីអត់ធ្វើការ ធ្វើអោយរដ្ឋខាតបង់ថវិកា
× ភ្នំពេញ៖ ក្នុងរដូវចូលឆ្នាំចិននេះ មន្ត្រីរាជការមួយចំនួនមិនបានទៅធ្វើការទេ ដោយសារពួកគេជាប់រវល់អបអរសាទរពិធីបុណ្យប្រពៃណីចូលឆ្នាំចិន។ អ្នកវិភាគនិយាយថា ការមិនធ្វើការរបស់មន្ត្រីរាជការធ្វើអោយរដ្ឋខាតបង់ថវិកាយ៉ាងច្រើនក្នុងរយៈពេលប៉ុន្មានថ្ងៃនេះ។ ច្បាប់ត្រូវតែគោរព បើមិនគោរពទេ មានន័យថា កម្ពុជាមិនមែនជាប្រទេសនីតិរដ្ឋ។
លោក កែម ឡី អ្នកស្រាវជ្រាវ និងអ្នកវិភាគឯករាជ្យនៅក្នុងប្រទេសកម្ពុជាបានអត្ថាធិប្បាយថា លោកមានការព្រួយបារម្ភយ៉ាងខ្លាំងចំពោះនិន្នាការនៃការឈប់សម្រាកនៅក្នុងពិធីបុណ្យចូលឆ្នាំចិន និងវៀតណាមរបស់មន្ត្រីរាជការខ្មែរ។ «ប្រសិនបើប្រពៃណីចិនត្រូវបានគេគោរពកើនឡើងនៅកម្ពុជា មានន័យថា ប្រពៃណីខ្មែរត្រូវបានថយចុះ»។ នេះគឺជាព្រួយបារម្ភរបស់លោក កែម ឡី។
លោក កែម ឡី បានអត្ថាធិប្បាយបន្តទៀតថា រដ្ឋាភិបាលត្រូវគោរពច្បាប់របស់ខ្មែរ។ ប្រសិនបើរដ្ឋាភិបាលមិនគោរពច្បាប់ មានន័យថា កម្ពុជាមិនមែនជាប្រទេសនីតិរដ្ឋទេ។ ម្យ៉ាងទៀត ការមិនធ្វើការរបស់មន្ត្រីរាជការជំរុញអោយរដ្ឋខាតបង់ថវិកាជាច្រើនក្នុងរដូវចូលឆ្នាំចិននេះ។ ប្រទេសកម្ពុជាមានមន្ត្រីរាជការចំនួន១៨ម៉ឺននាក់។ ប៉ុន្តែគេមិនដឹងថា តើមន្ត្រីចំនួនប៉ុន្មាននាក់មកធ្វើការធម្មតានៅរដូវបុណ្យចូលឆ្នាំចិន និងចំនួនប៉ុន្មាននាក់មិនមកធ្វើការនៅរដូវបុណ្យនេះ។ តាមការពិនិត្យជាក់ស្តែងនៅរាជធានីភ្នំពេញ មន្ត្រីជាច្រើននាក់មិនបានមកធ្វើការទេនៅថ្ងៃបុណ្យចូលឆ្នាំចិននេះ។ ប្រសិនបើមក ពួកគេមកមួយភ្លែត ហើយត្រឡប់ទៅគេហដ្ឋានវិញភ្លាម។
អ្វីដែលលោក កែម ឡី កំពុងព្រួយបារម្ភបន្ថែមទៀតនោះ គឺវប្បធម៌ចិនអាចនឹងមានឥទ្ធិពលទៅលើការសម្រេចនៅក្នុងរដ្ឋាភិបាលរបស់ខ្មែរនាពេលអនាគត ពីព្រោះ ថ្នាក់ដឹកនាំខ្មែរ មួយចំនួនកាត់ចិន និងមួយចំនួនទៀតកាត់វៀតណាម។ អ្នករិះគន់មួយចំនួនផ្សេងទៀត បាននិយាយថា មន្ត្រីរាជការខ្មែរមិនគួរនាំគ្នាឈប់នៅថ្ងៃបុណ្យចូលឆ្នាំរបស់ចិនឡើយ ពីព្រោះ បុណ្យនេះ ជាពិធីរបស់ជនជាតិចិន និងវៀតណាម ដូច្នេះ រាជការខ្មែរមិនគួរ ឬមិនត្រូវចូលរួមអបអរជាសាធារណៈឡើយ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានអត្ថាធិប្បាយថា ការបិទទ្វារស្ថាប័នរដ្ឋធ្វើអោយប៉ះពាល់រូបភាពអាក្រក់ដល់កម្ពុជាខ្លាំងមែនទែន។ ម្យ៉ាងទៀត លោកបញ្ជាក់ថា៖«ការបិទទ្វារស្ថាប័នរដ្ឋ ឆ្លុះបញ្ចាំងពីការគ្រប់គ្រងរដ្ឋខ្សោយរបស់អ្នកកាន់អំណាច»៕
© រក្សាសិទ្ធិដោយ thmeythmey.com