ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
សង្គមជាតិ
ហេតុអ្វីបុរសខ្មែរចូលចិត្តគ្រឿងស្រវឹង?
11, Apr 2015 ,
4:00 pm
រូបភាព
×
ដោយ:
ភ្នំពេញ៖ មនុស្សមួយចំនួនញៀននឹងនិយាយទូរសព្ទ ញៀននឹងលេងហ្វេសប៊ុក ញៀននឹងដើរផ្សារ ញៀននឹងលេងកីឡា ញៀននឹងល្បែង ញៀននឹងគ្រឿងញៀន ញៀននឹងស្រី រីឯអ្នកមួយចំនួនទៀតញៀននឹងស្រា។ តើមូលហេតុអ្វីបានជាបុរសៗចូលចិត្តទទួលទានគ្រឿងស្រវឹង?
ចប់ពីធ្វើការពេល្ងាច បុរសមួយចំនួនចាប់ផ្តើមទូរសព្ទណាត់គ្នាដើម្បីរកកន្លែងពិសារអាហារ និងពិសាស្រាបៀររួមគ្នា។ នេះគឺជាករណីលោក សំណាង។ លោក សំណាង អាយុប្រមាណជា២៥ឆ្នាំធ្វើការជាអ្នកយាមអោយភោជនីយដ្ឋានមួយនៅក្នុងរាជធានីភ្នំពេញ ដោយទទួលបានប្រាក់ខែជាង១០០ដុល្លារអាមេរិក បាននិយាយត្រង់ៗថា៖«បើមិនទូរសព្ទរកគ្នាផឹកពេលល្ងាចទេ អារម្មណ៍ដូចជានៅមិនសុខទាល់តែសោះ។ ខ្ញុំមិនដឹងថា យ៉ាងម៉េចដែរ..!»។
បុរសដែលមិនទាន់មានភរិយារូបនេះដឹងច្បាស់ថា ខ្លួនគាត់មិនទទួលបានកម្រៃច្រើនពីការងារទេ។ ប៉ុន្តែលោកមិនអាចបោះបង់ការផឹករបស់ខ្លួនបានឡើយ។ «ប្រាក់ខែរបស់ខ្ញុំជាង១០០ដុល្លារ បានត្រឹមតែផឹកស៊ីប៉ុណ្ណោះ»។ បុរសម្នាក់ទៀតឈ្មោះ សុខណា ដែលជាអ្នកចូលចិត្តពិសាគ្រឿងស្រវឹងដែរនោះ បានបន្ទរទៀតថា៖«បើជួបគ្នាហើយមិនផឹក វាគ្មានន័យអ្វីទាំងអស់»។
ងាកទៅស្តាប់ក្រុមយុវជនមួយក្រុមដទៃទៀត ពួកគេជជែកគ្នា និងមោទនភាពពីកម្រិតនៃការពិសាគ្រឿងស្រវឹងបានច្រើន។ អ្នកខ្លះមោទនភាពពិសាស្រាបៀរបាន១០កំប៉ុង អ្នកខ្លះទៀតថា អាចពិសាបានជាង១០កំប៉ុង និងអ្នកខ្លះទៀតថា ពួកគេបីនាក់អាចពិសា Black Label មួយដបបានដោយគ្មានបញ្ហា។ នៅក្នុងទ្រឹស្តីអ្នកពិសាគ្រឿងស្រវឹង គេច្រើនតែនិយាយបែបចំអន់គ្នាថា៖«ផឹក ផឹកអោយគេសែង បើផឹកដើរខ្លួនឯង ផឹកធ្វើអ្វី»។ «លើកដាច់សាច់ស្អាត»។ «បើមិនផឹក បានអ្វីនោម»។ «ផឹកស៊ីកុំទម្រន់ បើមិនវាយប្រពន្ធ វាយម៉ែក្មេក»។ «បងផឹក បងដឹង បងស្រវឹង បងដេក»។ «ផឹកស្រា ក្លែមស្រី ភ្លេចស្រោមអនាម័យ ឆ្លងមេរោគអេដស៍»។ «លើកមួយ ជួយកម្លាំង»។ «កែវអើយ កែវកុំសំងំស្ងៀម»។ «តោះ លើកមួយទៅ កុំអោយកើតដង្កូវទឹក»។ល។
មានមូលហេតុជាច្រើនដែលជំរុញអោយមនុស្សមួយចំនួនទទួលទានសុរាច្រើន ហើយមិនអាចផ្តាច់ទៅវិញបានឡើយ បើទោះបីជាជីវភាពមិនសូវធូរធាក៏ដោយក្តី។ ទី១ គឺដោយសារតម្លៃស្រាបៀរនៅក្នុងប្រទេសកម្ពុជាមានតម្លៃថោកបើធៀបទៅនឹងប្រទេសជិតខាងមួយចំនួន។ តម្លៃគ្រឿងស្រវឹងនៅកម្ពុជាថោកជាងគេ ពីរ ឬបី ឬ បួនដងឯណោះ។ នៅពេលដែលសុរាមានតម្លៃថោក អ្នកដែលចូលចិត្តទទួលទានសុរា បានជ្រើសរើសយកវាធ្វើជាគ្រឿងកំដររាល់ពេលជួបជុំ និងទទួលទានយ៉ាងខ្ជះខ្ជាយផងដែរ។
ទី២ ការអនុវត្តច្បាប់រឹតបន្តឹងគ្រឿងស្រវឹងនៅធូររលុង។ នៅក្នុងប្រទេសក្បែរខាងមួយចំនួន ការទទួលទានគ្រឿងស្រវឹងត្រូវបានរឹតត្បិតយ៉ាងតឹងរ៉ឹង ដោយមានការកំណត់ពេលវេលា ដូចជាពិធីបុណ្យធំៗ ឬពិធីមង្គលផ្សេងៗ និងចំនួននៃការទទួលទានផងដែរ។ ដោយឡែកនៅកម្ពុជាវិញ ក៏មានដែរច្បាប់រឹតត្បិតគ្រឿងស្រវឹង ដូចជាការត្រួតពិនិត្យជាតិអាល់កុល នៅតាមដងផ្លូវជាដើម។ ប៉ុន្តែការអនុវត្តហាក់នៅមិនទាន់មានប្រសិទ្ធភាពនៅឡើយ ជាក់ស្តែង គេនៅតែសង្កេតឃើញមានគ្រោះថ្នាក់ចរាចរណ៍ ជាច្រើនដែលបង្កឡើងដោយការទទួលទានគ្រឿងស្រវឹងលើសកំណត់។
ទី៣ ការផ្សព្វផ្សាយពាណិជ្ជកម្មជំរុញទឹកចិត្តអ្នកប្រើប្រាស់ខ្លាំងពេក។ នៅកម្ពុជា ការផ្សព្វផ្សាយពាណិជ្ជកម្មគ្រឿងស្រវឹង ហាក់មានភាពទូលំទូលាយណាស់។ ជាក់ស្តែង គេតែងសង្កេតឃើញការផ្សព្វផ្សាយកើតមាននៅតាមបណ្តាញទូរទស្សន៍ស្ទើរគ្រប់ប៉ុស្តិ៍។ ចំណែកឯនៅតាមដងវិថីវិញ គេក៏ឃើញមានរូបបដាធំៗ ស្ទើរតែគ្រប់ផ្លូវ ដែលបានឃោសនាបញ្ចុះតម្លែ និងមានផ្តល់ជូនរង្វាន់ធំតូច ជាច្រើនផងដែរ។ ចង់ ឬមិនចង់ ការឃោសនាតាមគ្រប់រូបភាពនេះ ជាការដាស់អារម្មណ៍អោយពលរដ្ឋខ្លះចង់សាក ឬចង់ផ្សងសំណាង។
ទី៤ កន្លែងផឹកស៊ីកា្លយជាទីណាត់ជួប។ កាលពីមុន ពលរដ្ឋខ្មែរភាគច្រើនតែងណាត់ជួបជជែកគ្នា នៅ កន្លែងធ្វើការ កន្លែងកម្សាន្តនានា កន្លែងហូបអាហារធម្មតា ឬនៅតាមបណ្ណាល័យជាដើម។ ដោយឡែកនៅក្នុងពេលបច្ចុប្បន្ននេះវិញ មនុស្សមួយចំនួន មិនថា វ័យចំណាស់ យុវជន ឬយុវនារីនោះទេ នៅពេលណាត់ជួប ពួកគេតែងសួរគ្នាថា៖«តើយើងជួយគ្នានៅហាងផឹកស៊ីមួយណា?»។ ជជែកគ្នាកាន់តែយូរ ទទួលទានសុរាកាន់តែច្រើន។ ការណាត់ជួបគ្នានៅកន្លែង«ផឹកស៊ី»ស្ទើរតែក្លាយជាទម្លាប់ទៅហើយ។
ទី៥ មាននារីស្រស់ស្អាត ណែបណិត កៀកកើយ។ បុរសខ្លះចូលចិត្តទទួលទានសុរាដោយមាននារី កៀកកើយ បម្រើឆ្វេងស្តាំ។ សម្រស់ និងតិចនិច របស់នារីបម្រើសេវាស្រាបៀរមួយចំនួនបានអន្ទងចិត្តបុរសៗ ឱ្យមកហាងផឹកស៊ីរបស់ពួកគេញឹកញាប់។ នារីបម្រើសេវាខ្លះសន្យាថា ពួកគេអាចចេញទៅក្រៅជាមួយបុរសជាភ្ញៀវបាន ប្រសិនបើបុរសនោះអាចចំណាយពេលអង្គុយទទួលទាន រហូតដល់ម៉ោងនាងចេញពីធ្វើការ។ «មាននារីសិចស៊ីអង្គុយផឹកក្បែរ ស្រាមានរស់ជាតិកាន់តែឆ្ងាញ់ ទទួលទានបានកាន់តែច្រើន»។
ទី៦ មានសេវាផ្លូវភេទលួចលាក់ នៅពីក្រោយកន្លែងផឹកស៊ី។ បច្ចុប្បន្ននេះ សេវាផ្លូវភេទលួចលាក់បានទៅជ្រៀតជ្រកនៅក្រោមស្លាកយីហោ ហាងខារ៉ាអូខេ ឬហាងផឹកស៊ីមួយចំនួននៅក្នុងរាជធានីភ្នំពេញ។ សេវាលួចលាក់មួយនេះ ក៏ជាមូលហេតុដែលនាំអោយបុរសៗខ្លះចូលហាងផឹកស៊ីញឹកញាប់ផងដែរ។ បុរសមួយចំនួនមិនចូលទៅរកសេវានេះត្រង់ៗនោះទេ ពួកគេនាំគ្នាផឹកស៊ី ច្រៀងខារ៉ាអូខេ ជោគជាំទើបទៅរកសេវានេះតាមក្រោយ។ គេកត់សម្គាល់ឃើញថា ហាងផឹកស៊ី ឬហាងខារ៉ាអូខេណា ដែលមាននារីស្រស់ស្អាតវ័យក្មេង ឬមានសេវាផ្លូវភេទលួចលាក់ ហាងនោះមានអតិថិជនច្រើនជាងគេ និងហេតុផលទី៧ គឺអ្នកខ្លះក្រីក្រទេ តែចូលចិត្តពិសាគ្រឿងស្រវឹងដែរ។ អ្នកចុងក្រោយនេះ ពិសាគ្រឿងស្រវឹងដើម្បីបំបាត់ទុក្ខកង្វល់។
ដោយឡែក បុរស និងស្ត្រីមួយចំនួនផ្សេងទៀតចូលចិត្តការជួបជុំនៅតាមផ្ទះដែលមានសុរាកំដរផងដែរ។ ពួកគេនិយាយថា «អោយតែបានជួបជុំគ្នា មិនចាំបាច់ទៅហាងខាងក្រៅក៏បានដែរ។ តែអ្វីដែលមិនអាចខ្វះបាននោះគឺស្រាបៀរ។ បើគ្មានស្រាបៀរកំដរទេ នោះការជួបជុំក៏មិនសូវសប្បាយនោះដែរ»។ បើយោងតាមការសង្កេតជាក់ស្តែងនាពេលបច្ចុប្បន្ននេះ ស្ត្រីវ័យក្មេងមួយចំនួនធំចាប់ផ្តើមពិសាគ្រឿងស្រវឹងដូចបុរសដែរ។
អ្នកចូលចិត្តគ្រឿងស្រវឹងមួយចំនួនបាននិយាយថា ការពិសាគ្រឿងស្រវឹងរួមគ្នា គឺជាការបង្កើតមិត្តភាពនិងបង្កើតទំនាក់ទំនង។ ប៉ុន្តែ ពួកគេហាក់បីដូចជាភ្លេចគិតថា ការពិសាគ្រឿងស្រវឹងបំផ្លាញសុខភាព និងថវិកា។ សុខភាព ប្រាក់កាស និងមិត្តភាព តើអ្នកគួរជ្រើសរើសមួយណា?
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
អត្ថបទពេញនិយម
សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម
5 ថ្ងៃ
«ប្រសប់»និង«ប្រសព្វ» មានសូរសព្ទដូចគ្នា តែន័យខុសគ្នា!
7 ថ្ងៃ
បុរាណវិទូប្រឹងគាស់កកាយអាថ៌កំបាំងព្រែកជីកស្រមោច ដែលបានជីកមុនរាជ្យព្រះបាទជ័យវរ្ម័នទី៧
1 សប្តាហ៍
តើពេលណាដែលគេសរសេរ«បរិបូរ, បរិបូណ៌ និង បរិបូរណ៍»នៅក្នុងសំណេរភាសាខ្មែរ?
21 ម៉ោង
«រឭក»,«រំឮក»,«រំលឹក» និង«រម្លឹក» ពាក្យណាត្រឹមត្រូវ?
2 ថ្ងៃ
អត្ថបទពេញនិយមបន្ថែម