ជាតិ
សង្គមជាតិ
សាកលវិទ្យាល័យអន្តរជាតិជប៉ុន APU កំពុងទាក់ទាញនិស្សិតបរទេស និងខ្មែរ
× ជប៉ុន-ខេត្ត Oita៖ សាកលវិទ្យាល័យអន្តរជាតិជប៉ុន Asia Pacific University កំពុងទាក់ទាញនិស្សិតបរទេស និងខ្មែរ។ និស្សិតជាតិ និងអន្តរជាតិមកពី៧៥ប្រទេសចំនួនជិត៦ពាន់នាក់បានបញ្ចប់ការសិក្សា និងកំពុងសិក្សានៅក្នុងសាកលវិទ្យាល័យខាងលើនេះ ក្នុងនោះ មាននិស្សិតខ្មែរចំនួន១១នាក់ផងដែរ តែ២នាក់បានបញ្ចប់ថ្នាក់ឧត្តមសិក្សារួចហើយ។
បង្កើតឡើងកាលពី១៥ឆ្នាំមុន សាកលវិទ្យាល័យអន្តរជាតិជប៉ុន Asia Pacific University នៅក្នុងខេត្ត Oita នៃប្រទេសជប៉ុន បាន និងកំពុងក្លាយទៅជាសាកលវិទ្យាល័យដ៏ល្បីល្បាញមួយសម្រាប់និស្សិតជប៉ុន និងនិស្សិតនៃបណ្តាប្រទេសដទៃទៀតនៅលើពិភពលោក។
ការសិក្សានៅទីនេះធ្វើឡើងជាភាសាជប៉ុន និងភាសាអង់គ្លេស។ ភាសាអង់គ្លេស គឺជាភាសាគោល និងចាំបាច់បំផុតសម្រាប់គ្រប់មុខជំនាញទាំងអស់។ ក្នុងរយៈពេល១៥ឆ្នាំនេះ និស្សិតជប៉ុន និងអន្តរជាតិចំនួនជិត៦ពាន់នាក់មកពី៧៥ប្រទេសកំពុងសិក្សា និងបានបញ្ចប់ការសិក្សារនៅទីនេះ។ ប្រសិនបើគេនិយាយពីនិស្សិតជនជាតិបរទេស ជនជាតិចិនប្រជាមានិត មានចំនួនច្រើនជាងគេដែលមានរហូតដល់ជាង៥០០នាក់ បន្ទាប់មកគឺនិស្សិតជនជាតិកូរ៉េខាងត្បូងជិត៥០០នាក់ បន្ទាប់មកទៀត និស្សិតជនជាតិវៀតណាមជាង៤០០នាក់ ឥណ្ឌូនេស៊ី និងថៃ២០០នាក់ ហើយកម្ពុជាមាននិស្សិតចំនួន១១នាក់បានចូលសិក្សា និងបញ្ចប់សញ្ញាបត្រនៅទីនេះ។ ប្រទេសអ៊ុយក្រែន មាននិស្សិតតែម្នាក់គត់មកសិក្សានៅក្នុងសាកលវិទ្យាល័យ APU នៃប្រទេសជប៉ុន។
លោក សេក សុផល និស្សិតថ្នាក់អនុបណ្ឌិតផ្នែកទំនាក់ទំនងអន្តរជាតិដែលកំពុងសិក្សានៅក្នុងសាកលវិទ្យាល័យ APU បានបញ្ជាក់ប្រាប់សារព័ត៌មានអេឡិចត្រូនិកថ្មីៗនៅក្នុងសាកលវិទ្យា APU នៅក្នុងប្រទេសជប៉ុនកាលពីសប្តាហ៍មុនថា និស្សិតខ្មែរទាំងអស់ខិតខំប្រឹងរៀនសូត្រផង និងធ្វើការផងនៅក្នុងប្រទេសជប៉ុន។ ពួកគេ(និស្សិតខ្មែរ)ទាំងអស់មិនចំណាយពេលឥតប្រយោជន៍ដូចនិស្សិតបរទេសមួយចំនួននោះឡើយ។ ក្នុងចំណោម១១នាក់នោះ និស្សិតភាគច្រើនមកពីខេត្តសៀមរាប។
ទាក់ទងទៅនឹងទីផ្សារការងារ លោកសាស្ត្រាចារ្យ Kondo Yuichi, Ph.D នៃសាកលវិទ្យាល័យ APU បានថ្លែងប្រាប់អ្នកសារព័ត៌មានថ្មីៗ និងបណ្តាអ្នកកាសែតអាស៊ាននៅក្នុងប្រទេសជប៉ុនថា៖«និស្សិតមួយចំនួនធំសិក្សានៅទីនេះទទួលបានការងារធ្វើស្រួលណាស់នៅក្នុងប្រទេសជប៉ុន។ ក្រុមហ៊ុនជប៉ុនល្បីៗចាំទទួលយកនិស្សិតដែលសិក្សានៅទីនេះ។ លក្ខណៈសម្បត្តិរបស់និស្សិតទាំងនោះ គឺថា និស្សិតសិក្សានៅទីនេះ ចេះភាសាជប៉ុនផង និងភាសាអង់គ្លេសផង និងម្យ៉ាងទៀត ពួកគេអាចក្លាហាន និងចេះបត់បែនប្រសើរជាងនិស្សិតជប៉ុន»។
និស្សិតបរទេសមួយចំនួនដែលផ្តល់បទសម្ភាសន៍អោយសារព័ត៌មានថ្មីៗបានអះអាងថា ពេលបញ្ចប់ការសិក្សានៅទីនេះ(APU) ពួកគេប្រាថ្នារកការងារធ្វើនៅក្នុងប្រទេសជប៉ុនជាជាងត្រឡប់ទៅធ្វើការនៅក្នុងប្រទេសរបស់ពួកគេ។ មូលហេតុ គឺដោយសារពួកគេចង់ដកស្រង់បទពិសោធន៍នៅក្នុងប្រទេសជប៉ុន៕
© រក្សាសិទ្ធិដោយ thmeythmey.com