ខ្មែរក្រហម
ជាតិ
ត្រឹមឆ្នាំ២០១៥ ប្រជាជនជាង ២៧ម៉ឺននាក់បានធ្វើទស្សនកិច្ចតុលាការខ្មែរក្រហម
× ភ្នំពេញ៖ រយៈពេលជាង ៥ឆ្នាំ គិតចាប់ឆ្នាំ ២០០៩ ដល់ឆ្នាំ ២០១៥នេះ អង្គជំនុំជម្រះ វិសាមញ្ញក្នុងតុលាការកម្ពុជា (អ.វ.ត.ក) បានទទួលប្រជាជនទាំងជនជាតិកម្ពុជា និងបរទេស ជាង ២៧ម៉ឺននាក់ បានទៅទស្សនកិច្ចនៅក្នុងសវនាការសាលាក្តីរបបខ្មែរក្រហម។ នេះបើតាមអ្នកនាំពាក្យសាលាក្តីខ្មែរ ក្រហម លោក នេត ភក្ត្រា។
បន្ទាប់ពីដំណើរទស្សនកិច្ចនៅក្នុងសាលាក្តីខ្មែរក្រហម របស់ដ្ឋមន្ត្រីការបរទេសប្រទេសហ្វាំងឡង់ លោក ERKKI TUOMIOJA កាលពីថ្ងៃទី១៨ ខែកុម្ភៈ ឆ្នាំ២០១៥កន្លងមក អ្នកនាំ ពាក្យសាលាក្តីខ្មែរក្រហម លោក នេត ភក្ត្រា បានឲ្យដឺងថា រដ្ឋមន្ត្រីការបរទេសហ្វាំងឡង់ បានថ្លែងអំណរគុណ សាលាក្តីខ្មែរក្រហម ដែលបានចូលរួមពង្រឹងសមត្ថភាពដល់មន្ត្រីបុគ្គលិករបស់សាលាក្តី និងដើរតួនាទីកាត់បន្ថយវប្បធម៌និទណ្ឌភាពនៅក្នុងប្រទេសកម្ពុជា។
«រដ្ឋមន្ត្រីការបរទេសហ្វាំងឡង់បានថ្លែងអរគុណជាខ្លាំង ចំពោះការបើកទូលាយដល់ សាធារណៈជនជាង ២៧ ម៉ឺននាក់ឲ្យបានចូលទស្សនាកិច្ចក្នុងសវនាការសាលាក្តីខ្មែរ ក្រហមចាប់តាំងពីឆ្នាំ២០០៩ ដល់បច្ចុប្បន្ន»។ នេះបើតាមការបញ្ជាក់របស់អ្នកនាំពាក្យ សាលាក្តីខ្មែរក្រហម។
បើតាមអ្នកនាំខាងលើ ចាប់តាំងពីបង្កើតសាលាក្តីខ្មែរក្រហម រដ្ឋាភិបាលហ្វាំងឡង់ បានផ្តល់ជំនួយជាថវិកាជាង ២លានដុល្លារអាមេរិកផងដែរ។
គួរបញ្ជាក់ថា នៅឆ្នាំ២០០១ រដ្ឋសភាជាតិកម្ពុជាបានអនុម័តច្បាប់មួយដើម្បីបង្កើតតុលាការកាត់សេចក្ដីឧក្រិដ្ឋកម្មដែលបានប្រព្រឹត្ដឡើងនៅប្រទេសកម្ពុជាក្នុងអំឡុងរបបខ្មែរក្រហមពីឆ្នាំ១៩៧៥ និង១៩៧៩ ។
ចុងបញ្ចប់កិច្ចព្រមព្រៀងមួយជាមួយអង្គការសហប្រជាជាតិត្រូវបានចុះហត្ថលេខានៅខែមិថុនា ឆ្នាំ២០០៣ដែលចែងអំពីថាតើសហគមន៍អន្ដរជាតិនឹងជួយឧបត្ថម្ភនិងសហការរបៀបដូចម្ដេចនៅក្នុងអង្គជំនុំជម្រះវិសាមញ្ញនេះ៕
© រក្សាសិទ្ធិដោយ thmeythmey.com