ជាតិ
នយោបាយជាតិ
អាជ្ញាធរចាប់ខ្លួន លោក អាឡិច ក្រោយការអត្ថាធិប្បាយរបស់លោក ហ៊ុន សែន រូបភាពពីហ្វេសប៊ុក លោក វន ពៅ
× នៅម៉ោង ១ និង ៣០ នាទី មុននេះបន្តិច អាជ្ញាធរកម្ពុជា បានឃាត់ខ្លួនអនុប្រធានអង្គការមាតាធម្មជាតិ លោក អាឡិច នៅក្នុងភោជនីយដ្ឋានមួយក្បែរផ្សាររាត្រី ខណ្ឌដូនពេញ ។ នេះបើតាមប្រសាសន៍របស់មន្រ្តីការពារសិទ្ធិមនុស្សអង្គការលីកាដូ លោក អំ សំអាត ។ បើតាម លោក អំ សំអាត លោក អាឡិច ទំនងជាអាជ្ញាធរ នាំទៅនាយកដ្ឋានអន្តោប្រវេសន៍។
ជុំវិញការឃាត់ខ្លួនលោក អាឡិច នេះ មន្រ្តីការពារសិទ្ធិមនុស្សរូបនេះ បានបញ្ជាក់ប្រាប់សារព័ត៌មានថ្មីៗយ៉ាងនេះថា៖« ខ្ញុំសោកស្តាយមែនទែន ពីព្រោះលោក អាឡិច ជួយការពារបរិស្ថានខ្មែរ បែរជាអាជ្ញាធរកម្ពុជា ចាប់ខ្លួនទៅវិញ។ ខ្ញុំគិតថា ការចាប់ខ្លួននេះ ធ្វើឡើងដូចជាលឿនពេក គ្រាន់តែលោកនាយករដ្ឋមន្រ្តី ហ៊ុន សែន និយាយបានប៉ុន្មានម៉ោងប៉ុណ្ណោះ។ ពេលនេះ ពួកខ្ញុំកុំពុងតែតាមរកលោក អាឡិច » ។
នៅប៉ុន្មានម៉ោងនេះ ក្នុងពិធីចែកសញ្ញាប័ត្រដល់និស្សិតសកលវិទ្យាល័យជាតិគ្រប់គ្រង លោក ហ៊ុន សែន បានអត្ថាធិប្បាយជុំវិញករណីអស់សុពលភាពទិដ្ឋាការរបស់លោក អាឡិច ។ លោកថា កាលពីពេលថ្មីៗនេះ ក្រសួងការបរទេសកម្ពុជា បានទាក់ទងទៅស្ថានទូតអេស្បាញ ឲ្យមកទទួលយកលោក អាឡិច ចេញបពីកម្ពុជារួចហើយដែរ តែមកដល់ពេលនេះ ទិដ្ឋាការរបស់លោក អាឡិច អស់សុពលភាពហើយ តែខាងទូតអេស្បាញមិនបានមកយកលោក អាឡិច ចេញពីកម្ពុជាឡើយ។ លោក ហ៊ុន សែន ក៏បានព្រលយពាក្យសម្តីថា បើលោកអាឡិច អស់សុពលភាពទិដ្ឋាការហើយ ដាច់ខាតត្រូវតែចេញពីកម្ពុជា៕
© រក្សាសិទ្ធិដោយ thmeythmey.com