អន្តរជាតិ
នយោបាយអន្តរជាតិ
មេដឹកនាំអេហ្ស៊ីបប្រាប់កុំអោយប្រជាជនភ័យខ្លាចក្រុមរដ្ឋឥស្លាម
×
មេដឹកនាំអេហ្ស៊ីបកាលពីម្សិលមិញនេះ បានប្រកាសប្រាប់ប្រជាជនអេហ្ស៊ីបថា រដ្ឋាភិបាលខ្លួនកំពុងគ្រប់គ្រងប្រទេសបានល្អ និងស្ថិតនៅលើផ្លូវវត្រូវ ហើយរដ្ឋាភិបាលមានលទ្ធភាពគ្រប់គ្រាន់ប្រឈមមុខជាមួយបញ្ហានានា។ បញ្ហាដែលមេដឹកនាំអេហ្ស៊ីបបានលើកឡើងនោះមានដូចជាការគំរាមកំហែងដោយក្រុមរដ្ឋឥស្លាមនៅលីប៊ី និងតំបន់ស៊ីណៃ រួមទាំងបញ្ហាសេដ្ឋកិច្ចបច្ចុប្បន្នផង។
កញ្ញា ខន ចំប៉ា លម្អិតព័ត៌មាននេះ
**audio2**
ប្រទេសអេហ្ស៊ីបប្រឈមមុខជាមួយបញ្ហាគំរាមកំហែងផ្នែកសន្តិសន្តិសុខ និងបញ្ហាផ្ទៃក្នុងមួយចំនួនទៀត ក្នុងរយៈពេលប៉ុន្មានខែចុងក្រោយនេះ។ ការគំរាមកំហែងរបស់បណ្តាញក្រុមភេរវជនរដ្ឋឥស្លាមនៅក្នុងប្រទេសលីប៊ី កំពុងតែធ្វើអោយប្រជាជនអេហ្ស៊ីបព្រួយបារម្ភខ្លាំង ហើយការកើនឡើងនៃចលនាភេរវកម្មនៅក្នុងតំបន់ស៊ីណៃនៃប្រទេសអេហ្ស៊ីបផ្ទាល់នោះ គឺរឹតតែគួរអោយព្រួយបារម្ភ។
កាលពីថ្ងៃអាទិត្យម្សិលមិញនេះ ប្រធានាធិបតីអេហ្ស៊ីបលោក Abdel Fattah al-Sisi បានចេញមុខតាមកញ្ចក់ទូរទស្សន៍ដោយអំពាវនាវទៅកាន់ប្រជាជនអេហ្ស៊ីប អោយឈប់ព្រួយបារម្ភ ចំពោះបញ្ហាប្រឈមនានាដែលអេហ្ស៊ីបកំពុងប្រឈម។ ប្រធានាធិបតីខាងលើបានប្រកាសយ៉ាងច្បាស់ថា រដ្ឋាភិបាលរបស់លោកគ្រប់គ្រងស្ថានការណ៍ប្រទេសជាតិបានល្អ និងស្ថិតនៅលើផ្លូវត្រូវ ហើយរដ្ឋាភិបាលក៏មានលទ្ធភាពដោះស្រាយបញ្ហាទាំងនោះបានដូចគ្នា។
បញ្ហាទាំងនោះរួមមានការកើនឡើងនៃការគំរាមកំហែងដោយបណ្តាញក្រុមរដ្ឋឥស្លាម នៅក្នុងប្រទេសលីប៊ី ក្រុមសកម្មប្រយុទ្ធនៅតំបន់ស៊ីណៃ និងបញ្ហាប្រឈមផ្នែកសេដ្ឋកិច្ចផងដែរ។ ក្នុងកញ្ចក់ទូរទស្សន៍ គេសង្កេតឃើញប្រធានាធិបតីអេហ្ស៊ីបខាងលើ ជួបសម្តែងការគួរសមជាមួយបណ្តាមេដឹកនាំអារ៉ាប់មួយចំនួន និងមេដឹកនាំលោកខាងលិចផង ដែលជាជំនួបផ្តោតលើបញ្ហាលីប៊ី និងក្រុមភេរវជនរដ្ឋឥស្លាម។
ប្រធានាធិបតីអេហ្ស៊ីបបានប្រកាសថា បច្ចុប្បន្ននេះ ប្រទេសហ្សកដានី និងអារ៉ាប់រួមបានសម្រេចផ្តល់ការគាំទ្រដល់អេហ្ស៊ីប ក្នុងការតាមកម្ចាត់ក្រុមភេរវជនរដ្ឋឥស្លាមរួចរាល់ហើយ ដែលបញ្ជាក់ថា ចលនាតាមប្រមាញ់ក្រុមរដ្ឋឥស្លាមមានភាពរឹងមាំ និងខ្លាំងក្លា។ អារ៉ាប់រួម និងហ្សកដានី សុទ្ធតែជាប្រទេសសមាជិកសម្ព័ន្ធអន្តរជាតិដឹកនាំដោយក្រុងវ៉ាស៊ីនតោន ដើម្បីវាយប្រហារលើក្រុមសកម្មប្រយុទ្ធរដ្ឋឥស្លាមនៅស៊ីរី និងអ៊ីរ៉ាក់ ហើយប្រទេសសេដ្ឋីប្រេងខាងលើ បានដើរតួនាទីសកម្មជាងគេ ក្នុងការប្រឆាំងក្រុមភេរវជនទាំងនោះ។
បញ្ហាក្រុមរដ្ឋឥស្លាម ក្លាយជាបញ្ហាក្តៅសម្រាប់អេហ្ស៊ីប ក្រោយពេលដែលប្រជាជនអេហ្ស៊ីប២១នាក់ ត្រូវបានក្រុមរដ្ឋឥស្លាមនៅប្រទេសលីប៊ី សម្លាប់ដោយកាត់កកាលពីប៉ុន្មានសប្តាហ៍មុន។ ការសម្លាប់ជនជាតិអេហ្ស៊ីបនេះ បានបញ្ឆេះកំហឹងប្រជាជនអេហ្ស៊ីប ហើយរដ្ឋាភិបាលក្រុង Cairo បានបញ្ជាអោយកងទ័ពទម្លាក់គ្រាប់បែកពីលើយន្តហោះ នៅក្នុងប្រទេសលីប៊ីភ្លាមៗដែរ ដើម្បីសងសឹកក្រុមភេរវជនទាំងនោះ។
យ៉ាងណាក៏ដោយ ការទម្លាក់គ្រាប់បែកនៅលើទឹកដីលីប៊ី ប្រឆាំងភេរវជន របស់អេហ្ស៊ីបត្រូវបានលីប៊ីចាត់ទុកជាការឈ្លានពាន និងរំលោភអធិបតេយ្យរបស់ប្រទេសលីប៊ី។ ប៉ុន្តែលោកប្រធានាធិបតីអេហ្ស៊ីប មិនបានចាត់ទុកថាវាជាកំហុសរបស់កងទ័ពខ្លួនឡើយ ព្រោះការវាយប្រហារក្រុមរដ្ឋឥស្លាមជាការចាំបាច់បំផុត៕
© រក្សាសិទ្ធិដោយ thmeythmey.com