អន្តរជាតិ
នយោបាយអន្តរជាតិ
×![]()
នាយករដ្ឋមន្ត្រីអ៊ីស្រាអែលបានទាត់ចោលការអញ្ជើញរបស់សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ ដែលចង់ជួបពិភាក្សាជាមួយលោក កាលពីថ្ងៃអង្គារម្សិលមិញ។ សំណើរសុំជួបនេះនាយករដ្ឋមន្ត្រីអ៊ីស្រាអែល ត្រូវបានរៀបចំឡើង ដោយសារតែសប្តាហ៍ក្រោយនាយករដ្ឋមន្ត្រីរូបនេះនឹងអញ្ជើញមកទស្សនកិច្ចនៅក្នុងទីក្រុងវ៉ាស៊ីនតោន។
រាយការណ៍ព័ត៌មានលម្អិតដោយ លោក រឿន ភារុន
នាយករដ្ឋមន្ត្រីអ៊ីស្រាអែលលោកBenjamin Netanyahuគ្រោងអញ្ជើញទៅទស្សនកិច្ចនៅសហរដ្ឋអាមេរិកនៅសប្តាហ៍ក្រោយនេះ។មុនមានដំណើរទស្សនកិច្ចមកកាន់អាមេរិក គេឃើញអ្នកនយោបាយគណបក្សប្រជាធិបតេយ្យស្វះស្វែងស្នើសុំណាត់ជួបជាមួយមេដឹកនាំជនជាតិជ្វីវរូបនេះ ដោយរៀបចំជំនួបដាច់ដោយឡែក។
ប៉ុន្តែរឿងដែលមិនគួរអោយជឿ សំណើរសុំជួបពិភាក្សារបស់សមាជិកព្រឹទ្ធសភាគណបក្សប្រជាធិបតេយ្យត្រូវបាននាយករដ្ឋមន្ត្រីអ៊ីស្រាអែលលខាងលើ ទាត់ចោលកាលពីថ្ងៃអង្គារម្សិលមិញនេះ។ សមាជិកព្រឹទ្ធសភាគណបក្សប្រជាធិបតេយ្យ ដែលសរសេរសំបុត្រអញ្ជើញនាយករដ្ឋមន្ត្រីអ៊ីស្រាអែលនោះ មានលោកRichard Durbin និងលោកស្រីDianne Feinstein ។
ក្រោយបដិសេធការអញ្ជើញ លោកនាយករដ្ឋមន្ត្រី Netanyahuបានថ្លែងថា លោកពិតជារីករាយនិងយល់ពីសណ្តានចិត្តនៃការអញ្ជើញរបស់សមាជិកព្រឹទ្ធសភាគណបក្សប្រជាធិបតេយ្យ ប៉ុន្តែលោកជឿជាក់ថា ប្រសិនបើលោកទទួលយកសំណើរនេះនៅពេលនេះ វាអាចនឹងធ្វើអោយមានការភាន់ច្រឡំ និងប៉ះពាល់ចំណងមិត្តភាព។
សមាជិកព្រឹទ្ធសភាទាំងពីររូបខាងលើ ចង់អញ្ជើញអោយនាយករដ្ឋមន្ត្រីអ៊ីស្រាអែលចូលរួមក្នុងកិច្ចប្រជុំបិទទ្វាមួយមុនលោក Netanyahuផ្តល់សុន្ទរកថានៅក្នុងសមាជសហរដ្ឋអាមេរិក។ នាយករដ្ឋមន្ត្រីអ៊ីស្រាអែលបានសម្តែងការសោកស្តាយចំពោះការបដិសេធការអញ្ជើញរបស់សមាជិកសភាគណបក្សប្រជាធិបតេយ្យផងដែរ ដោយលោករំពឹងថា កិច្ចពិភាក្សារវាងលោកនិងសមាជិកសភាគណបក្សប្រជាធិបតេយ្យអាចនឹងរៀបចំឡើងនៅពេលក្រោយ និងស្ថិតក្នុងកាលៈទេសៈសមស្របជាងនេះ។
លោកបានប្រកាសថា លោកនៅតែសង្ឃឹមថា ភាពជាសម្ព័ន្ធមិត្តរវាងអាមេរិកនិងអ៊ីស្រាអែលនៅតែរឹងមាំ ហើយចំណងមិត្តភាពនៅតែល្អប្រសើរស្ថិតក្នុងពេលយូរអង្វែងទៅមុខ។
តាមពិតទៅ មេដឹកនាំសមាជិកសភាគណបក្សសាធារណរដ្ឋបានបំពានពិធីសារការទូតដោយមិនប្រឹក្សាជាមួយរដ្ឋាភិបាលលោក អូបាម៉ា ឬសមាជិកសភាគណបក្សប្រជាធិបតេយ្យជាមុនឡើយ មុនអញ្ជើញប្រមុខរដ្ឋាភិបាលក្រុងជេរ៉ូសាឡិម អោយមកចូលរួមក្នុងកិច្ចប្រជុំរួមគ្នារវាងសមាជិកព្រឹទ្ធសភា និងសមាជិករដ្ឋសភាអាមេរិក។
លោក Netanyahuប្រឈមការរិះគន់យ៉ាងខ្លាំងទាំងក្នុងនិងក្រៅប្រទេស ដោយសារតែការសម្រេចចិត្តរបស់លោកក្នុងការចូលរួមថ្លែងសុន្ទរកថានៅក្នុងសមាជសមាជិកសភាអាមេរិក ដែលប្រព្រឹត្តទៅត្រឹមពីរសប្តាហ៍ប៉ុណ្ណោះមុនការបោះឆ្នោតជាសាកលនៅអ៊ីស្រាអែល។ ហើយម្យ៉ាងការថ្លែងសុន្ទរកថារបស់លោកនៅអាមេរិក ក៏កើតឡើងស្របពេលដែល កិច្ចចរចាកម្មវិធីនុយក្លេអ៊ែរអ៊ីរ៉ង់កំពុងស្ថិតក្នុងដំណើរការទាំងយឺតយ៉ាវនៅឡើយ។
ប្រមុខរដ្ឋាភិបាលអ៊ីស្រាអែលនេះ នឹងឆ្លៀតយកឱកាសក្នុងកិច្ចប្រជុំរួមនៅសហរដ្ឋអាមេរិក ដោយលើកឡើងពីក្តីបារម្ភរបស់ខ្លួនចំពោះដំណើរការនៃកិច្ចចរចាកម្មវិធីនុយក្លេអ៊ែរអ៊ីរ៉ង់ និងការឈានទៅផលិតអាវុធនុយក្លេអ៊ែររបស់រដ្ឋាភិបាលក្រុងតេអ៊ីរ៉ងផងដែរ៕
© រក្សាសិទ្ធិដោយ thmeythmey.com
