ជាតិ
ខែមករា៖ រដ្ឋាភិបាលប្រមូលចំណូលបានជាង៤សែនដុល្លារពីវិស័យព្រៃឈើ
×
នៅក្នុងខែមករា ដើមឆ្នាំ២០១៥ ក្រសួងកសិកម្ម រុក្ខាប្រមាញ់ និងនេសាទ ប្រមូលបានថវិកាពីវិស័យព្រៃឈើ បានចំនួន២៧,៥៤៤.៦៨ដុល្លារ និង១,៥៩៨,២៥៤,០២៥ រៀល(៣៩៩,៥៦៣ដុល្លារ) សរុបស្មើនឹងប្រមាណជា៤២៥,១០៨ ដុល្លារ។ នេះបើយោងតាមរបាយការណ៍ស្តីពី ស្ថានភាពកសិកម្ម រុក្ខាប្រមាញ់ និងនេសាទ ប្រចាំខែមករា ឆ្នាំ២០១៥ របស់ក្រសួងកសិកម្ម រុក្ខាប្រមាញ់ និងនេសាទ។
របាយការណ៍ដដែលបានឲ្យដឹងថា ចំណូលទាំងនោះគឺបានមកពីថ្លៃសួយសារផល អនុផលព្រៃឈើ ចំនួន១,១៨៩,០៣១,១៦៩រៀល ស្មើនឹងប្រមាណ២៩៧,២៥៨ដុល្លារ និងចំណូលពីសេវាសាធារណៈចំនួន ២៧,៥៤៤.៦៨ដុល្លារ និង៤០៩,២២១,៨៥៦រៀល(១០០,៣០៥ដុល្លារ) សរុបស្មើនឹងប្រមាណ ១២៧,៨៥០ដុល្លារ។
របាយការណ៍ដដែលបានឲ្យដឹងទៀតថា នៅក្នុងខែមករា អង្គភាពរដ្ឋបាលព្រៃឈើមូលដ្ឋាននៅទូទាំងប្រទេស បានបង្ក្រាបបទល្មើសព្រៃឈើ សត្វព្រៃ និងបទល្មើសកាប់រានទន្ទ្រានដីព្រៃបានចំនួន២៤៥ករណី ក្នុងនោះបញ្ជូនទៅតុលាការចំនួន២១៨ករណី និងផាកពិន័យជាអន្តរការណ៍ចំនួន២៧ករណី។
«ការបង្ក្រាបបទល្មើសខាងលើ អាជ្ញាធរដកហូតបានវត្ថុតាងជាច្រើនរួមមាន ឈើមូល និងជ្រុងចំនួន១០០ម៉ែត្រគូប ឈើអារចំនួន៧៥៥ម៉ែត្រគូប ឈើក្រាក់ និងឈើក្រញូងចំនួន១៨ម៉ែត្រគូប និង១,១៥៤គីឡូក្រាម សត្វព្រៃចម្រុះប្រភេទចំនួន១៤៦ក្បាល និង៤៨.៥គីឡូក្រាម អនុផលព្រៃឈើ និងសម្ភារមួយចំនួនទៀត ព្រមទាំងដីព្រៃឈើដែលកាប់រានចំនួន២១០ហិចតា» ។ នេះបើតាមរបាយការណ៍របស់ក្រសួង កសិកម្ម រុក្ខាប្រមាញ់ និងនេសាទដដែល៕
© រក្សាសិទ្ធិដោយ thmeythmey.com