អន្តរជាតិ
នយោបាយអន្តរជាតិ
×![]()
ម្សិលមិញនេះ កងកម្លាំងអ៊ុយក្រែនបានចាប់ផ្តើមដកសព្វាវុធធុនធ្ងន់មួយចំនួនចេញពីតំបន់ជម្លោះភាគខាងកើត។ ការឈានដល់ដកអាវុធចេញនេះកើតឡើងក្រោយមិនមានការផ្ទុះអាវុធនិងប៉ះទង្គិចគ្នាពីរថ្ងៃ ហើយភាគីប្រហែលជាកំពុងព្យាយាមអនុវត្តកិច្ចព្រមព្រៀងដែលចូលជាធរមានកាលពីថ្ងៃ១៥ខែកុម្ភៈ។ ប៉ុន្តែអ៊ុយក្រែនព្រមានថា បើមានការផ្ទុះអាវុធជាថ្មីទៀត កុំរំពឹងថាខ្លួននឹងបន្តដកសព្វាវុធអោយសោះ។
មុំ ពិទូរ្យលម្អិតព័ត៌មាននេះ
កងកម្លាំងរដ្ឋាភិបាលអ៊ុយក្រែនបានចាប់ផ្តើមដកសព្វាវុធធុនធ្ងន់ចេញពីតំបន់ជម្លោះភាគខាងកើតប្រទេសអ៊ុយក្រែន កាលពីម្សិលមិញនេះ។ ដោយសារតែការប្រយុទ្ធគ្នាមានភាពស្ងប់ស្ងាត់រយៈពេលពីរ បីថ្ងៃ ទើបបានជាភាគីអ៊ុយក្រែនចាប់ផ្តើមដកសព្វាវុធធុនធ្ងន់ចេញពីតំបន់ប្រយុទ្ធ។ចំណែកណាតូឯណោះវិញបានគំរាមរុស្ស៊ីជាថ្មីអោយដកដៃចេញពីវិបត្តិអ៊ុយក្រែនផងដែរ។
គេរំពឹងថា ការដកសព្វាវុធចេញនេះជាសញ្ញាវិជ្ជមានមួយដែលអនុញ្ញាអោយភាគីជម្លោះអាចបញ្ចៀសការប្រយុទ្ធគ្នា និងអាចកសាងសន្តិភាពបានជោគជ័ននាពេលខាងមុខ។ ប៉ុន្តែយ៉ាងណាក៏ដោយវាគ្រាន់តែជាការចាប់ផ្តើមប៉ុណ្ណោះ ព្រោះអ៊ុយក្រែនមិនមែនដកអាវុធចេញទាំងស្រុងនោះទេ ហើយការមិនដឹងថាការផ្អាកការប្រយុទ្ធអាចរក្សាបានយូរប៉ុណ្ណាដែរ។ អ៊ុយក្រែនបានប្រកាសកាលពីម្សិលមិញហើយថា បើហ៊ានតែមានការផ្ទុះអាវុធ កុំសង្ឃឹមថាអ៊ុយក្រែននឹងបន្តដកសព្វាវុធចេញអស់អោយសោះ។
ដំណើរដកអាវុធយុទ្ធភ័ណ្ឌ រៀបចំឡើងក្រោយការចង្អុលបង្ហាញនិងឃ្លាំមើលពីសំណាក់អង្គការសហប្រតិបត្តិការនិងសន្តិសុខអឺរ៉ុប។ សេចក្តីថ្លែងការណ៍មួយបានបង្ហាញថា កងទ័ពអ៊ុយក្រែនបានចាប់ផ្តើមដកកាំភ្លើង ១០០មីលីម៉ែត្រពីតំបន់ប្រយុទ្ធជួរមុខ ហើយកាំភ្លើងធំយ៉ាងតិច ១៥ដើមក៏ត្រូវបានក្រុមទាហានអ៊ុយក្រែនដកចេញហើយដែរ។
ការដកអាវុធចេញនេះគឺស្របតាមកិច្ចព្រមព្រៀងដែលមានស្រាប់ ដើម្បីឈានទៅបង្កើតតំបន់គ្មានទ័ព ហើយដំណើរការដកអាវុធនេះត្រូវបញ្ចប់ក្នុងរយៈពេលតែ២សប្តាហ៍ប៉ុណ្ណោះ។ ដោយឡែកខាងភាគីក្រុមឧទ្ទាមបានប្រកាសថា ខ្លួនបានដកអាវុធជាច្រើនចេញពីតំបន់ជម្លោះហើយ ក្នុងនោះមានទាំងកាំភ្លើងធំ មីស៊ីល និងកាំជ្រួចរ៉ុកែតផងដែរ។
យ៉ាងណាក៏ដោយ ប្រមុខណាតូលោក Jens Stoltenberg បានបង្ហាញការសាទរ ចំពោះការបញ្ចៀសការប្រយុទ្ធគ្នារវាងក្រុមទាំងពីរ ប៉ុន្តែមេដឹកនាំរូបនេះនៅតែព្រមាន និងចោទប្រកាន់រុស្ស៊ីចំពោះការលូកដៃក្នុងជម្លោះអ៊ុយក្រែន។ មេដឹកនាំបក្សសម្ព័ន្ធយោធាណាតូ បានបញ្ជាអោយរុស្ស៊ីបញ្ឃប់ការផ្គត់ផ្គង់អាវុធទៅកាន់តំបន់ភាគខាងកើតដែលគាំទ្រក្រុមផ្តាច់ខ្លួននោះ។
លោកបានលើកឡើងថា កាលពីប៉ុន្មានខែកន្លងមកនេះរុស្ស៊ីបានបញ្ជូនសព្វាវុធយ៉ាងច្រើនមានទាំងកាំភ្លើងធំ មីស៊ីល រថក្រោះ ទៅអោយក្រុមឧទ្ទាម ហើយពួកគេត្រូវតែដកសព្វាវុធចេញ និងឈប់ផ្តល់អាវុធអោយក្រុមឧទ្ទាមបន្តទៀត។
លោកខាងលិចនៅតែបន្តចោទប្រកាន់រុស្ស៊ីថាជាអ្នកនៅពីក្រោយជម្លោះនៅអ៊ុយក្រែន ដោយគាំទ្រក្រុមឧទ្ទាមអោយពួកគេច្បាំងជាមួយកងទ័ពរដ្ឋាភិបាល។ ហើយបណ្តាប្រទេសទាំងនោះគំរាមដាក់ទណ្ឌកម្មបន្ថែមទៀតប្រឆាំងរុស្ស៊ី រហូតប្រទេសខ្លះចង់បំពាក់អាវុធដល់កងទ័ពអ៊ុយក្រែនថែមទៀតផង។ ចំណែករុស្ស៊ីឯណោះវិញក៏បានព្រមានកាត់ផ្តាច់ការផ្គត់ផ្គង់ឧស្ម័នធម្មជាតិទៅកាន់ប្រទេសអ៊ុយក្រែន ដោយសារតែអ៊ុយក្រែនមិនទាន់បង់លុយអោយខ្លួនជាមុន។ បើកាត់ផ្តាច់ការផ្គត់ផ្គង់ឧស្ម័នមែន មិនមែនតែអ៊ុយក្រែនម្នាក់ឯងទេដែលជួបបញ្ហា ប៉ុន្តែប្រទេសអឺរ៉ុបផ្សេងទៀតក៏ប្រឈមមុខនឹងកង្វះឧស្ម័នប្រើប្រាស់ដូចគ្នាដែរ៕
© រក្សាសិទ្ធិដោយ thmeythmey.com
