ជាតិ
នយោបាយជាតិ
វិបត្តិនៃឥទ្ធិពលសម្តីនាយករដ្ឋមន្ត្រី ខ្លាំងជាងច្បាប់!
×
ជាញឹកញាប់មន្ត្រីខ្មែរផ្តើមធ្វើការយ៉ាងមមាញឹក នៅពេលដែលោកនាយករដ្ឋមន្ត្រីស្រែកអំពាវនាវឲ្យធ្វើ។ តែការខ្នះខ្នែងធ្វើតាមប្រសាសន៍លោក ហ៊ុន សែន នោះ ពួកគេធ្វើបានតែមួយភ្លែត តែក្រោយមកគឺវិលមករកសភាពដើមវិញដដែល។ អ្នកតាមដានស្ថានការណ៍សង្គមខ្មែរមួយចំនួន លើកឡើងថា ប្រសាសន៍របស់លោកនាយករដ្ឋមន្ត្រី មិនមែនតែមានឥទ្ធិពលលើមន្ត្រីក្នុងជួររដ្ឋាភិបាលនោះទេ តែក្នុងស្ថានប័ននីតិបញ្ញត្តិ និងស្ថាប័នតុលាការ ក៏ប្រសាសន៍លោក ហ៊ុន សែន មានឥទ្ធិពលខ្លាំងក្លាផងដែរ ហើយពួកគេថែមទាំងនិយាយចំៗថា សម្តីលោក ហ៊ុន សែន ខ្លាំងជាងច្បាប់ទៅទៀត ។ តែអ្នកវិភាគខ្លះ និងមន្ត្រីរដ្ឋាភិបាល អះអាងថា ប្រសាសន៍នាយករដ្ឋមន្ត្រីមានអំណាច ជារឿងប្រសើរសម្រាប់សង្គម។
« បើគេសួរថា តើនៅកម្ពុជាច្បាប់ធំជាងប្រសាសន៍របស់លោកនាយករដ្ឋមន្ត្រីឬយ៉ាងណា? ចម្លើយតាមរូបភាពខាងក្រៅ គឺប្រាកដជាច្បាប់ធំជាង។តែបើគេសួរប្រជាពលរដ្ឋថា តើក្នុងចិត្តមន្ត្រីខ្មែរប្រសាសន៍លោក ហ៊ុន សែន ធំជាងច្បាប់ឬ? ពលរដ្ឋភាគច្រើន នឹងឆ្លើយថា ពិតជាត្រឹមត្រូវ »។នេះគឺជាសំណួរនិងចម្លើយរបស់អ្នកស្រាវជាវនិងអ្នកតាមដានស្ថានការណ៍សង្គមខ្មែរជុំវិញឥទ្ធិពលនៃប្រសាសន៍របស់បុរសខ្លាំងកម្ពុជា។ប្រសាសន៍របស់លោកនាយករដ្ឋមន្ត្រីដែលអាចផ្លាស់ប្តូរស្ថានការណ៍នៅកម្ពុជាបានត្រឹមតែមួយពព្រិចភ្នែក។ បើប្រសាសន៍លោក ហ៊ុន សែន មានឥទ្ធិពលខ្លាំងបែបនេះ តើមានគុណសម្បត្តិនិងគុណវិបត្តិអ្វីខ្លះ?
លោក លី ប៊ុនធា អ្នកតាមដានស្ថានការណ៍សង្គមកម្ពុជានិងជាអ្នកសម្របសម្រួលផ្នែកពង្រឹងសិទ្ធិអំណាចយុវជននៃអង្គការកម្មវិធីអភិវឌ្ឍន៍ធនធានយុវជន (YRDP) អត្ថាធិប្បាយថា នាពេលកន្លងមកមន្ត្រីខ្មែរភាគច្រើនធ្វើការតាមតែប្រសាសន៍លោកនាយករដ្ឋមន្ត្រី ហ៊ុន សែន ប៉ុណ្ណោះ ។ហើយប្រសិនបើគេឲ្យមន្ត្រីទាំងនោះជ្រើសរើសរវាងច្បាប់និងប្រសាសន៍លោក ហ៊ុន សែន ពួកគេនឹងយកប្រសាសន៍លោក ហ៊ុន សែន ជាក់ជាមិនខាន។ពីព្រោះថា បើពួកគេធ្វើតាមសម្តីលោកនាយករដ្ឋមន្ត្រី បើខុសយ៉ាងណា វានឹងរួចខ្លួច។នេះជាការបន្ថែមរបស់លោក លី ប៊ុនធា។
អ្នកតាមដានស្ថានការណ៍សង្គមខ្មែររូបនេះ បរិយាយទៀតថាឥទ្ធិពលនៃពាក្យពេចន៍របស់លោកនាយករដ្ឋមន្ត្រីបើគេគិតតែមួយភ្លែតវានឹងមានគុណសម្បត្តិខ្លះដែរ។លោកពន្យល់ថា៖ « បញ្ហាមួយចំនួនមន្ត្រីធ្វើមើលមិនឃើញដល់ពេលនាយករដ្ឋមន្ត្រីស្រែកទើបមន្ត្រីទាំងនោះចាប់ផ្តើមធ្វើ ហើយអាចដោះស្រាយបញ្ហាបានខ្លះ។តែមិនមាននិរន្តឡើយ» ។យ៉ាងណាក៏ដោយលោក លី ប៊ុនធា រិះគន់ថា ការស្តាប់តែប្រសាសន៍នាយករដ្ឋមន្ត្រីនេះវាបង្ហាញថា មន្ត្រីរដ្ឋាភិបាលគ្មានប្រព័ន្ធនៃការដោះស្រាយបញ្ហាជាក់លាក់ឡើយហើយថែមទាំងធ្វើឲ្យមន្ត្រីខ្លាចបុគ្គលខ្លាចបក្សជាងខ្លាចខាតបង់ផលប្រយោជន៍ជាតិ។ « វាក៏ប៉ះពាល់ដល់របបប្រជាធិបតេយ្យផងដែរ ដែលរបបនេះយកច្បាប់ជាធំតែនៅស្រុកខ្មែរបែជាយកសម្តីនាយករដ្ឋមន្ត្រីជាធំវិញ។វានឹងធ្វើឲ្យជាតិចុះខ្សោយ » ។នេះជាការពន្យល់បន្ថែមរបស់ លោក លី ប៊ុនធា។
ងាកមកចាប់អារម្មណ៍ពីទស្សនៈរបស់លោក អ៊ូ វីរៈ វិញ អ្នកស្រាវជ្រាវឯករាជ្យរូបនេះអះអាងថានៅពេលដែលមន្ត្រីធ្វើការយកសម្តីនាយករដ្ឋមន្ត្រីជាធំវាមានផលវិជ្ជមានខ្លះដែរសម្រាប់លោក ហ៊ុន សែន ។ លោកបកស្រាយថា៖ « វាមានផលវិជ្ជមានគឺធ្វើឲ្យលោក ហ៊ុន សែន មានអំណាចអាចចៀសវាងការដណ្តើមអំណាចនិងរដ្ឋប្រហារ»។ក៏ប៉ុន្តែលោក អ៊ូ វីរៈ បញ្ជាក់ថាទម្លាប់មន្ត្រីបែបនេះវានឹងធ្វើឲ្យប្រទេសជាតិច្របូកច្របល់មិនអាចដោះស្រាយបញ្ហាប្រជាជននិងជាតិបានទេ ពីព្រោះតែអំណាចប្រមូលផ្តុំនៅលើលោក ហ៊ុន សែន តែម្នាក់។លោកថា ឥទ្ធិពលនៃលោកហ៊ុនសែនក៏អាចធ្វើឲ្យប៉ះពាល់ដល់ឯករាជ្យនៃស្ថាប័នរបស់រដ្ឋសំខាន់ៗទៀតផងដែរ។
អ្នកស្រាវជ្រាវរូបនេះបន្តនិយាយពីផលអវិជ្ជមានទៀតថា ឥទ្ធិពលសម្តីលោក ហ៊ុន សែន ខ្លាំងបែបនេះលុះត្រាតែលោក ហ៊ុន សែន ដឹងរឿងរ៉ាវគ្រប់បែបយ៉ាង។ « តែលោក ហ៊ុន សែនម្នាក់ឯងធ្វើម្តេចនឹងអាចដឹងបញ្ហារាប់ពាន់បាននោះ? ហើយមន្ត្រីទាំងនោះធ្វើតែមួយឆាវពេលនាយករដ្ឋមន្ត្រីស្រែកប៉ុណ្ណោះតែក្រោយមកស្ងាត់ជ្រាប។ដូចជា ករណីការលុបឡូនេសាទខុសច្បាប់ជាដើម។មន្ត្រីទាំងនោះគ្មាននរណាមិនដឹងថាទង្វើនោះខុសច្បាប់ទេ។តែពេលលោក ហ៊ុន សែន ស្រែក បានធ្វើ »។លោក អ៊ូ វីរៈ អត្ថាធិប្បាយប្រាប់សារព័ត៌មានថ្មីៗទៀតថា៖ « វាគ្រោះថ្នាក់ណាស់បើរឿងរ៉ាវជាតិទាំងមូលហើយមន្ត្រីស្តាប់តែមនុស្សម្នាក់។ចុះបើការសម្រេចចិត្តរបស់លោក ហ៊ុន សែននោះ ខុស វានឹងធ្វើឲ្យជាតិជួបមហន្តរាយហើយទេឬ? ដូច្នេះហើយបានជាគេឲ្យយកច្បាប់ជាធំហើយអនុវត្តន៍តាមច្បាប់ប្រសើរជាងធ្វើតែតាមមាត់មនុស្សម្នាក់» ។
យ៉ាងណាក៏ដោយចុះបើទោះបីជាលោក លី ប៊ុនធា និងលោក អ៊ូ វីរៈ មើលឃើញបញ្ហាច្រើននៃការអនុវត្តតាមប្រសាសន៍របស់លោកនាយករដ្ឋមន្ត្រីបែបនេះក្តីក៏អ្នកវិភាគនយោបាយល្បីនៅកម្ពុជាលោក សុខ ទូច ហាក់មើលឃើញគុណសម្បត្តិច្រើនជាង។លោក សុខ ទូច អះអាងថាឥទ្ធិពលសម្តីលោកនាយករដ្ឋមន្ត្រីត្រូវនឹងសភាពការណ៍កម្ពុជាបច្ចុប្បន្ន។ « កម្ពុជាបច្ចុប្បន្នវាគ្មានសណ្តាប់ធ្នាប់ស្ថានប័នធំៗទាំងបីរបស់រដ្ឋគ្មានឯករាជ្យពីគ្នាទេច្រឡូកច្រឡំគ្នាដែលតម្រូវឲ្យមានមនុស្សម្នាក់មានឥទ្ធិពលខ្លាំងដូចជាលោកនាយករដ្ឋមន្ត្រី ហ៊ុន សែនដើម្បីរៀបចំប្រទេសឡើងវិញ » ។ លោក បណ្ឌិតរូបនេះ ថែមទាំងហ៊ាននិយាយថា កម្ពុជាបច្ចុប្បន្ននៅតែស្ថិតក្នុងសម័យ «អន្តរកាល» ត្រូវការមេដឹកនាំមានអំណាចខ្លាំង។
ជាមួយគ្នានេះដែរអ្នកនាំទីស្តីការគណរដ្ឋមន្ត្រីលោក ផៃ ស៊ីផាន អះអាងថាមន្ត្រីរដ្ឋាភិបាលមិនបានចាត់ទុកប្រសាសន៍លោកនាយករដ្ឋមន្ត្រីធំជាងច្បាប់ឡើយ។លោកបន្តថា កន្លងមកមន្ត្រីទាំងនោះ បានដោះស្រាយបញ្ហាជូនជាតិច្រើនហើយតែគ្រាន់នៅមានភាពខ្វះចន្លោះខ្លះទើបលោកនាយករដ្ឋមន្ត្រីក្រើនរំលឹកបន្ថែម ។ « សម្តេចលោកជាប្រមុខរដ្ឋាភិបាលត្រូវក្រើនរម្លឹកមន្ត្រីខ្លួនបែបនេះហើយ នៅពេលមានភាពខ្វះចន្លោះ។ ប្រសាសន៍សម្តេច មិនធ្វើឲ្យប៉ះពាន់ដល់ស្ថាប័នតុលាការឬសភាឡើយ» ។ នេះជាការបញ្ជាក់បន្ថែមរបស់លោក ផៃ ស៊ីផាន៕
© រក្សាសិទ្ធិដោយ thmeythmey.com