ជាតិ
សង្គមជាតិ
មនុស្សមួយចំនួនខ្វះការគោរពចំពោះជនរងគ្រោះ
× មនុស្សមួយចំនួនគិតថា ការបង្ហោះរូបភាពដ៏រន្ធត់របស់ជនរងគ្រោះដោយសារគ្រោះថ្នាក់ចរាចរណ៍ ឬករណីផ្សេងៗ គឺជាការរំលែកទុក្ខ និងបញ្ញាក់ស្មារតីឲ្យអ្នកផ្សេងទៀតមានការប្រុងប្រយ័ត្ន។ តាមពិតទៅ វាជាការគិតខុសទាំងស្រុង ដោយការបង្ហោះរូបភាពទាំងនោះ វាកាន់តែបង្កើនទុក្ខសោកដល់ជនរងគ្រោះ និងគ្រួសារជនរងគ្រោះ។ វាជាទង្វើខុសសីលធម៌ និងមិនគោរពសិទ្ធិអ្នកដទៃ។
រូបភាពដ៏គួរឲ្យរន្ធត់ ត្រូវបានចុះផ្សាយ និងបង្ហោះនៅលើទំព័រសារព័ត៌មាន គេហទំព័រ និងបណ្តាញសង្គមមួយចំនួនដើម្បីទាក់ទាញការចាប់អារម្មណ៍ ប៉ុន្តែពួកគេភ្លេចគិតថា វាជាទង្វើដែលមិនគោរពសិទ្ធិជនរងគ្រោះ រួមទាំងគ្រួសារជនរងគ្រោះ។
អ្នកខ្លះបានលើកឡើងថា ការបង្ហោះរូបភាពជនរងគ្រោះ ដែលមានរូបខ្លះដាច់ដៃ ដាច់ជើង ដាច់ក្បាល ដោយមិនមានការបិទបាំង គឺដើម្បីផ្ញើរសារដល់អ្នកដទៃឲ្យមានការប្រុងប្រយ័ត្ន។ ប៉ុន្តែតាមពិតទៅ រូបភាពទាំងនោះ បានបន្ថែមនូវទុក្ខសោកដល់ក្រុមគ្រួសារជនរងគ្រោះ ប្រសិនបើពួកគេបានឃើញ។ ក្រៅពីរូបភាពរន្ធត់នានា រូបភាពដែលមិនគួរចុះផ្សាយជាសាធារណៈមានដូចជា ករណីជនរងគ្រោះដោយសារការរំលោភផ្លូវភេទ ការជួញដូរមនុស្ស និងករណីជនរងគ្រោះជាអនិតិជនជាដើម។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ក៏ធ្លាប់បានណែនាំដល់អ្នកប្រើប្រាស់បណ្តាញសង្គម ជាពិសេសអ្នកសារព័ត៌មានឲ្យមានការគោរពដល់ជនរងគ្រោះ ដោយលោកមិនចង់ឃើញការបង្ហោះរូបថតជនរងគ្រោះ ឬអ្នកស្លាប់ដោយមិនមានការបិទបាំងនោះឡើយ។ ប៉ុន្តែទោះបីជាយ៉ាងណាដោយ ការបង្ហោះរូបភាពបែបរន្ធត់នៅតែជាការពេញនិយមរបស់គេហទំព័រ និងអ្នកប្រើប្រាស់បណ្តាញហ្វេសប៊ុកមួយចំនួន។
ព្រឹត្តិការណ៍អន្តរជាតិជាច្រើន ឧទាហរណ៍ដូចជា ការវាយប្រហារនៅទីស្នាក់ការកាសែត Charlie Hebdoរបស់បារាំង ដែលបណ្តាលឲ្យមនុស្សជាច្រើននាក់ស្លាប់នោះ គេមិនឃើញមានការបង្ហោះរូបភាពរន្ធត់ណាមួយឡើយរបស់ជនរងគ្រោះ៕
ពីខ្ញុំ ណារ៉ា រស់នៅខេត្តសៀមរាប
© រក្សាសិទ្ធិដោយ thmeythmey.com