ជាតិ
នយោបាយជាតិ
អ្នកស្រី កែ សុវណ្ណរតន៍ សាទរវត្តមាន លោក សម រង្ស៊ី-កឹម សុខា ដោះស្រាយបញ្ហាខ្លួន
×![]()
ដោយ: ធឿន បញ្ញាឬទិ្ធ
តំណាងរាស្ត្រគណបក្សសង្គ្រោះជាតិខេត្តសៀមរាប អ្នកស្រី កែ សុវណ្ណរតន៍ បានស្វាគមន៍ការចុះទៅត្រួតពិនិត្យរបស់លោក សម រង្ស៊ី និង លោក កឹម សុខា ប្រធាននិងអនុប្រធានគណបក្សសង្គ្រោះជាតិ ក្នុងករណីដែលសមាជិកបក្សចោទប្រកាន់អ្នកស្រីថា រំលោភបំពានអំណាចក្នុងបក្ស។ នៅព្រឹកថ្ងៃចន្ទនេះ សកម្មជនគណបក្សសង្គ្រោះជាតិនៅខេត្តសៀមរាបប្រមាណ ៥០ នាក់ បានប្រមូលផ្តុំគ្នានៅមុខទីស្នាក់ការបក្សនៅរាជធានីភ្នំពេញ ទាមទារឲ្យអ្នកស្រី កែ សុវណ្ណរតន៍ ចុះចេញពីតំណែង។
មិនមានអ្វីជាកង្វល់នោះឡើយសម្រាប់អ្នកស្រី កែ សុវណ្ណរតន៍ នៅពេលខ្លួនទទួលដំណឹងថា លោក សម រង្ស៊ី និងលោក កឹម សុខា ប្រធាននិងអនុប្រធានគណបក្សសង្គ្រោះជាតិ គ្រោងនឹងចុះទៅរកខុសត្រូវដល់ស្នាក់ការបក្សខេត្តសៀមរាប ក្រោយពីសកម្មជនខេត្តនេះ ៥០ នាក់ តវ៉ាទាមទារឲ្យអ្នកស្រីចុះចេញពីតំណែងប្រធានបក្សខេត្តសៀមរាប។ អ្នកស្រី កែ សុវណ្ណរតន៍ អះអាងថា ខ្លួនស្វាគមន៍ចំពោះការចុះទៅត្រួតពិនិត្យរបស់លោក សម រង្ស៊ី និង លោក កឹម សុខា ព្រោះមានតែថ្នាក់ដឹកនាំទាំងពីរទេ ដែលអាចរកខុសត្រូវក្នុងបញ្ហានេះបាន។
ថ្លែងប្រាប់សារព័ត៌មានថ្មីៗ អ្នកស្រី បន្ថែមដោយបដិសេធដូច្នេះថា៖ «ខ្ញុំគ្មានសិទ្ធិឯណាទៅរំលោភបំពានអំណាចទៅលើសកម្មជន ក្រុមការងាររបស់បក្ស ដូចជាការចោទប្រកាន់នោះទេ។ ដូចនេះមានតែប្រធានបក្សទាំងពីរទេ ដែលអាចស្វែងរកការពិត សួរនាំតាមរចនាសម្ព័នសកម្មជននៅក្នុងមូលដ្ឋាន ស៊ើបរកការពិតក្នុងករណីនេះ»។
ថ្លែងចំពោះមុខសកម្មជន និងសមាជិកបក្ស ដែលបាននាំគ្នាមកតវ៉ានៅមុខទីស្នាក់ការកណ្តាលគណបក្ស ជាង៥០នាក់ នៅថ្ងៃនេះ ប្រធានគណបក្សសង្គ្រោះជាតិ លោក សម រង្ស៊ី មានប្រសាសន៍ថា រូបលោក និងលោក កឹម សុខា នឹងចុះជួបជាមួយអ្នកគាំទ្ររបស់ខ្លួន នៅថ្ងៃ ០៤ មីនា នៅទីស្នាក់ការគណបក្សខេត្តសៀមរាប ដើម្បីស្ដាប់មតិយោបល់របស់ពួកគេ មុននឹងសម្រេចចិត្តធ្វើការដកលោកស្រី កែ សុវណ្ណរតន៍ ចេញពីប្រធានបក្សខេត្តសៀមរាប ។ « មុននឹងធ្វើសេចក្ដីសម្រេច លុះត្រាតែយើងស្ដាប់ទាំងសងខាង ហើយយកមកថ្លឹងថ្លែងជាមួយគ្នា។ នេះជាការណ៍ល្អក្នុងការសម្ដែងមតិ ដែលសមាជិកមានចិត្តក្លាហាន សម្ដែងមតិ តវ៉ា » ។ នេះជាការបញ្ជាក់របស់លោក សម រង្ស៊ី។ លោកប្រមុខបក្សប្រឆាំងរូបនេះ ថែមទាំងជំរុញឲ្យអ្នកគាំទ្រគណបក្សសង្គ្រោះជាតិទាំងអស់តវ៉ា នៅពេលដែលខ្លួនមិនពេញចិត្តនឹងសកម្មភាពរបស់មន្ត្រីបក្ស ឬថ្នាក់ដឹកនាំណាមួយ។
សកម្មជន សមាជិកគណបក្សសង្គ្រោះជាតិ ដែលដឹកនាំតវ៉ាដោយលោក គង់ សឿន អនុប្រធានប្រតិបត្តិខេត្តសៀមរាប នៅព្រឹកនេះ បានស្នើឲ្យថ្នាក់ដឹកនាំគណបក្សដកអ្នកស្រី កែ សុវណ្ណរតន៍ ចេញពីតួនាទីបក្សខេត្តសៀមរាប ក្រោមហេតុផលថា ការដឹកនាំរបស់តំណាងរាស្ត្ររូបនេះកន្លងមក ដឹកនាំបែបលក្ខណៈអត្តនោម័ត មិនមានការរីកចម្រើនដល់គណបក្ស និងមានបក្សពួកនិយម អំណាចប្រមូលផ្ដុំជាដើម ។ ទន្ទឹមនឹងនេះសកម្មជនបក្សប្រឆាំងទាំងនោះប្រកាសទៀតថា បើសិនជាគណបក្សនៅតែមិនផ្លាស់ប្ដូរអ្នកស្រី កែ សុវណ្ណរតន៍ ចេញពីតួនាទីបក្សខេត្តសៀមរាបនោះទេ ពួកគេនឹងដឹកនាំសកម្មជន អ្នកគាំទ្រ ធ្វើបាតុកម្មទ្រង់ទ្រាយធំ នៅក្នុងខេត្តសៀមរាបនេះជាក់ជាមិនខាន។
លិខិតរបស់អ្នកគាំទ្រគណបក្សសង្គ្រោះជាតិខេត្តសៀមរាប ចុះថ្ងៃទី២៨កុម្ភៈមានស្នាមមេដៃសកម្មជនបក្សជាង២០០នាក់ ដាក់ស្នើសុំឲ្យប្រធាន និងអនុប្រធានគណបក្សសង្គ្រោះជាតិ ផ្លាស់ប្ដូរអ្នកស្រី កែ សុវណ្ណរតន៍ ចេញពីប្រធានក្រុមការងារខេត្តសៀមរាប ។ ក្នុងលិខិតដដែលនោះបានបញ្ជាក់ថា ការតវ៉ានេះមិនមែនជាការបំបែកបំបាក់ផ្ទៃក្នុងរបស់គណបក្សសង្គ្រោះជាតិទេ ទី២ ថាការតវ៉ានេះមិនជំទាស់ដណ្ដើមអំណាចគ្នាទេ និងទី៣ ថា ការតវ៉ានេះគ្មានបុគ្គលណា ក្រុមណា ឬបក្សណានៅពីក្រោយនោះឡើយ ៕
© រក្សាសិទ្ធិដោយ thmeythmey.com
