ជាតិ
សង្គមជាតិ
កម្ពុជាធ្វើអន្សមយក្សទម្ងន់ជាង ៣ តោន ដើម្បីបំបែកកំណត់ត្រាពិភពលោក នំអន្សមយក្ស ក្នុងពេលអង្គរសង្គ្រាន្ត កាលពីឆ្នាំ ២០១៤
×
ភ្នំពេញ៖ កម្ពុជាគ្រោងនឹងផលិតនំអន្សមធំជាងគេបង្អស់លើពិភពលោក ដែលមានទម្ងន់រហូត ដល់ទៅជាង ៣ តោន ដើម្បីចូលរួមសាទរពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី ១៤ ដល់ថ្ងៃទី១៦ ខែមេសា ឆ្នាំ២០១៥ខាងមុខ។ ទនឹ្ទមនឹងនេះ អ្នករៀបចំក៏គ្រោងនឹងដាក់ប្រកួតក្នុងកំណត់ត្រាពិភពលោក ( World record) ទៀតផង។
នៅក្នុងព្រឹត្តិកាណ៍អង្គរសង្ក្រាន្តដែលនឹងប្រារព្ធជាលើកទីបី នៅលើទឹកដីអង្គរ ខេត្តសៀមរាបនោះ សមាគមចុងភៅកម្ពុជា (Cambodia Chefs’ Association) គ្រោងនឹងធ្វើនំអន្សមយក្ស ទម្ងន់ជាង ៣តោន ដោយចំណាយអង្ករផលិតអស់ជាង ១តោន ។ អន្សមយក្សនេះ អ្នករៀបចំ ក៏គ្រោងដាក់ប្រកួតដើម្បីបំបែកកំណត់ត្រាពិភពលោកផងដែរ។
ថ្លែងនៅក្នុងសន្និសីទសារព័ត៌មានស្តីពីនំអន្សមយក្សក្នុងព្រឹត្តិការណ៍អង្គរសង្ក្រាន្ត ឆ្នាំ២០១៥ ខាងមុខនេះ លោក ចាន់ សុភា អ្នកចាត់ការទូទៅនៃសមាគមចុងភៅកម្ពុជា បានឲ្យដឹងថា សមាគមចុងភៅនឹងផលិតនំអន្សមកាន់តែពិសេសជាងឆ្នាំមុន ដោយមានទំហំធំទ្វេដង និងរសជាតិពិសេសជាងមុន។ លោក ចាន់ សុភា នៅមិនទាន់ហ៊ានអះអាងថា នំអន្សមយក្សនេះ នឹងអាចជាប់កំណត់ត្រាពិភពលោកឬយ៉ាងណានោះទេ ។ លោក បញ្ជាក់ដូច្នេះថា ៖«នំអន្សមយក្សលើកទី ២ នេះ មិនទាន់ប្រាកដថា ចំណាយអស់ប៉ុន្មាន ដើម្បីជាប់ឈ្មោះក្នុងកំណត់ត្រាពិភពលោកនោះទេ ចាំមើលតាមសភាពជាក់ស្តែង។ ប៉ុន្តែ យើងនឹងប្រឹងឲ្យអស់ពីសមត្ថភាព ដើម្បីកេរ្តិ៍ឈ្មោះរបស់ប្រទេសកម្ពុជា»។
ដោយសារអង្កត់ផ្ចិតនំអន្សមយក្សមានទំហំធំជាងមុន រហូតដល់ប្រវែង ១ ម៉ែត្រ និងបណ្តោយ ប្រវែង ៥ម៉ែត្រនោះ ប្រធានសមាគមចុងភៅរូបនេះ បញ្ជាក់ថា សមាគមគ្រោងនឹងបន្ថែមមេចុង ភៅ និងកូនកាំបិតរហូតដល់ទៅ ១០០នាក់ និងប្រើទាំងឡចម្អិន និងឆ្នាំងចម្អិនប្រវែង ៧ម៉ែត្រ ថែមទៀតផង។ បើតាម លោក សុភា នំអន្សមយក្សដែលត្រូវបានសហការរៀបចំឡើងដោយសហភាព សហព័ន្ធយុវជនកម្ពុជា ក្រសួងពាណិជ្ជកម្ម សហព័ន្ធស្រូវអង្ករកម្ពុជា និងសមាគមចុងភៅ កម្ពុជានេះ នឹងចែកជូនអ្នកចូលរួម ភ្ញៀវទេសចរជាតិ និងអន្តរជាតិ ញ៉ាំដោយឥតគិតថ្លៃ ផងដែរ។
គួររម្លឹកថា កាលពីព្រឹត្តិការណ៍អង្គសង្ក្រាន្តឆ្នាំ ២០១៤ កន្លងមក ចុងភៅ និងបុគ្គលិកជាង ៥០នាក់ នៃសមាគមចុងភៅកម្ពុជា (Cambodia Chefs’ Association) បានផលិតនំអន្សមជ្រូកយក្សធ្វើពី អង្ករដំណើបទម្ងន់ជាង ១តោន ដោយបានចំណាយថវិកាជាង ៧ពាន់ដុល្លារអាមេរិក។ នំអន្សមយក្សនោះ ត្រូវបានដាក់ដង្ហែ និងតាំងបង្ហាញនៅខាងមុខរមណីដ្ឋានអង្គវត្ត៕
© រក្សាសិទ្ធិដោយ thmeythmey.com