ជាតិ
សង្គមស៊ីវិលត្រៀមលើកពីកង្វល់របស់ខ្លួន នៅថ្ងៃសិក្ខាសាលាស្តីពីសេចក្តីស្នើច្បាប់បោះឆ្នោត
×![]()
ដោយ: ធឿន បញ្ញាឬទិ្ធ
ភ្នំពេញ៖ សង្គមស៊ីវិល ត្រៀមលើកយកបញ្ហាមួយចំនួនទាក់ទងនឹង ការធ្វើវិសោធនកម្មច្បាប់បោះឆ្នោត ដើម្បីផ្ដល់មតិយោបល់ពីកង្វល់របស់ពួកគេ ទៅកាន់គណបក្សនយោបាយជាប់ឆ្នោត នៅក្នុងសិក្ខាសាលា ស្តីពីសេចក្តីស្នើច្បាប់ ក្នុងការបោះឆ្នោតជ្រើសតាំងតំណាងរាស្ត្រ។
លោក ហង្ស ពុទ្ធា នាយកប្រតិបត្តិនៃអង្គការនិចហ្វិច មានប្រសាសន៍ថា លោកនឹងលើកបញ្ញត្តិថ្មីចំនួន២ចំណុច ដែលទាក់ទងនឹងការអនុញ្ញាតឲ្យកងកម្លាំងប្រដាប់អាវុធ មន្ត្រីរាជការ តុលាការចូលរួមឃោសនាបោះឆ្នោត និងការហាមសង្គមស៊ីវិល ចូលរួមយុទ្ធនាការឃោសនាបោះឆ្នោត ។ ជាមួយគ្នានេះលោកយល់ឃើញថា ការរៀបចំសិក្ខាសាលារបស់ក្រុមការងារកំណែទម្រង់បោះឆ្នោតនាពេលនេះ គឺធ្វើឡើងក្រោមរូបភាពបំភាន់ភ្នែក ដើម្បីបង្ហាញថា ពួកគេបានពិគ្រោះយោបល់ជាមួយសង្គមស៊ីវិល និងសាធារណៈជនប៉ុណ្ណោះ។ «ខ្ញុំយល់ថាអព្យាក្រិតភាពកងកម្លាំងប្រដាប់អាវុធ តុលាការ មន្ត្រីរាជការ គួរតែនៅឆ្ងាយពីការឃោសនាបោះឆ្នោត មិនត្រូវឲ្យចូលរួមនោះទេ កុំឲ្យប៉ះពាល់ការបោះឆ្នោត។ ចំណែកបញ្ញត្តហាមមិនឲ្យចូលរួមយុទ្ធនាការ ឃោសនារកសំឡេងឆ្នោតគឺជាការកាត់បន្ថយការងារសង្គមស៊ីវិល និងបិទសិទ្ធិសេរីបញ្ចេញមតិសង្គមស៊ីវិល។ នេះជាការបញ្ជាក់របស់លោក ហង្ស ពុទ្ធា។
ទាក់ទងនឹងបញ្ហានេះនាយកប្រតិបត្តិឃ្លាំមើលការបោះឆ្នោតខុមហ្វ្រែល លោក គល់ បញ្ញា យល់ឃើញថា កំណែទម្រង់ច្បាប់បោះឆ្នោតថ្មីហាក់ដូចជាមិនទាន់បង្ហាញពីឯករាជ្យភាពច្បាស់លាស់នោះទេ ។ ហើយរូបលោកក៏ទាមទារឲ្យក្រុមការងារកំណែទម្រង់ការបោះឆ្នោតនេះ ផ្ដល់ព័តមានលំអិតអំពីគុណភាពនិងអត្ថន័យក្នុងច្បាប់នេះ ឲ្យបានច្បាស់លាស់បន្ថែមនៅក្នុងយុទ្ធនាការបោះឆ្នោត នៅថ្ងៃបើកសិក្ខាសាលាស្តីពីសេចក្តីស្នើច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ ។
ក្រុមការងារកំណែទម្រង់ការបោះឆ្នោតមកពីគណបក្សទាំងពីរបានជួបពិភាក្សាគ្នា សម្រួលពាក្យពេចន៍ និងបានបញ្ចប់ការងារលើការខ្វែងគំនិតគ្នា ១៥ ចំណុចក្រោយពីមានការឯកភាពរវាងប្រធានគណបក្សសង្គ្រោះជាតិលោក សម រង្ស៊ី និងលោក ស ខេង ។
ច្បាប់បោះឆ្នោតថ្មី បានសម្រេចបង្កើនចំនួនអាសនៈពី ១២៣ ដល់ ១២៥ ចំនួនអាសនៈ។ ខេត្តព្រះសីហនុ ត្រូវបាន បង្កើនពី ១អាសនៈ ទៅ៣អាសនៈ ខេត្តកំពង់ចាមមាន ១០អាសនៈ និងខេត្តត្បូងឃ្មុំមាន ៨អាសនៈ។សម្រាប់យុទ្ធនាការឃោសនារកសំឡេងឆ្នោត ត្រូវបានកាត់បន្ថយពី៣០ថ្ងៃ មកនៅត្រឹម ២១ថ្ងៃ ហើយការដង្ហែក្បួនទ្រង់ទ្រាយធំ មានត្រឹមតែ៤ថ្ងៃប៉ុណ្ណោះ ទាំងនៅរាជធានី-ខេត្ត ស្រុក ខណ្ឌ ហើយបើលើការកំណត់និងពិន័យតាមច្បាប់។មន្ត្រីកងកម្លាំង ប្រដាប់អាវុធ តុលាការ អាចបន្តធ្វើយុទ្ធនាការឃោសនា រកសំឡេងឆ្នោត តែមិនត្រូវបង្ហាញបុណ្យសក្តិ ស្លៀកពាក់ ឯកសណ្ឋាន ឬមានការគំរាមកំហែងនោះឡើយ។
សម្រាប់មន្ត្រីអង្គការសង្គមស៊ីវិលវិញ មិនអាចចូលរួមយុទ្ធនាការ ឃោសនារកសំឡេងឆ្នោតនោះទេ ហើយប្រសិនបើធ្វើខុសនឹងច្បាប់បោះឆ្នោតនឹងត្រូវផាកពិន័យពី ១០លាន ទៅ២០លានរៀល ។ហើយច្បាប់ទាំងនេះគណបក្សទាំងពីរ នឹងកំណត់យកសប្តាហ៍ក្រោយធ្វើសិក្ខាសាលាជាមួយសង្គមស៊ីវិល ដើម្បីសុំយោបល់កែសម្រួលបន្ថែមលើច្បាប់បោះឆ្នោតថ្មីនេះ។
គួរបញ្ជាក់ថា ច្បាប់បោះឆ្នោតថ្មី មានចំនួន ១២ជំពូក ស្មើនិង ១៧០មាត្រា៕
© រក្សាសិទ្ធិដោយ thmeythmey.com
