ជាតិ
សង្គមជាតិ
ពន្ធនាគារខេត្តកំពង់ធំមិនទាន់បំបាត់បញ្ហាសំណូក អស់នៅឡើយ
× កំពង់ធំ៖ បញ្ហាស៊ីសំណូកសូកប៉ាន់ នៅក្នុងពន្ធនាគារខេត្តកំពង់ធំ នៅមិនទាន់អាចលុបបំបាត់នៅឡើយ។ សព្វថ្ងៃ បញ្ហានេះនៅតែកើតមានឡើង ហើយវាក៏ជាចំណុចអសកម្មដែលត្រូវដោះស្រាយឱ្យរួសរាន់ផងដែរ។ នេះ បើតាមការឱ្យដឹងរបស់មន្ត្រីអង្គការសិទ្ធិមនុស្ស លីកាដូ។
លោក ញូង សាមឿន មន្ត្រីអង្គការសិទ្ធិមនុស្ស្លីកាដូប្រចាំខេត្តកំពង់ធំ បានរិះគន់អំពើពុករលួយនៅក្នុងមន្ទីរឃុំឃាំងខេត្តកំពង់ធំ ថាកំពុងធ្វើអោយពលរដ្ឋខាតបង់ថវិកាកាន់តែច្រើន។ មន្ត្រីអង្គការលីកាដូថ្លែងថា ពលរដ្ឋមួយចំនួនធំមិនបានដឹងអំពីវិន័យ និងគោលការណ៍ដែលត្រូវចូលរួមសួរសុខទុក្ខអ្នកជាប់ឃុំ ដែលជាសាច់ញាតិនោះទេ។ «ដូច្នេះ ពេលគាត់ទៅដល់ពន្ធនាគារ មន្ត្រីខាងពន្ធនាគារ គេហាមមិនឱ្យពួកគាត់ចូលជួបបងប្អូនជាដាច់ខាត។ អ៊ីចឹងទៅ ដើម្បីចូលបាន គាត់ត្រូវមានរបស់កំដដៃ ឬលុយកាក់ខ្លះៗ ទើបអាចូលបាន។ មួយវិញទៀត អំពើសំណូកនេះ មិនមានតែមួយកន្លែងនោះទេ ពោលគឺ មានច្រើនកន្លែង»។ យោងតាមការមន្ត្រីលីកាដូដដែល មន្ត្រីពន្ធនាគារខ្លះទាមទារថវិកាពីមួយកន្លែងហើយមួយកន្លែងទៀត។ លោក ញូង សាមឿនបញ្ជាក់ថា៖«សព្វថ្ងៃនេះ អំពើអវិជ្ជមាននៅតែកើតមានក្នុងពន្ធនាគារខេត្ត។ ជាពិសេស វាកើតឡើងជាញឹកញាប់ សម្រាប់អ្នកដែលទើបនឹងជាប់ឃុំឃាំងថ្មីៗ»។
មានសម្លៀកបំពាក់សមសួនជានិច្ច ក្នុងពេលបំពេញភារកិច្ចជាអ្នកសម្របសម្រួលសិទ្ធិមនុស្សនិងមើលទៅមានការងារមមាញឹកផងនោះ លោក សាមឿន បានប្រាប់ថា មន្ត្រីពន្ធនាគារដែលប្រព្រឹត្តិការយកលុយពីពលរដ្ឋអ្នកសួរសុខទុក្ខអ្នកនោះ ភាគច្រើនពួកគេធ្វើលួចលាក់មិនឱ្យប្រធានរបស់ពួកគេដឹងឡើយ។ លោកបន្តថា មន្ត្រីទាំងនោះក៏នៅតែខ្លាចរអារថ្នាក់លើរបស់ខ្លួន។ ដូច្នេះហើយ សកម្មភាពសូកប៉ាន់ មិនអាចធ្វើឡើងដោយបើកចំហរបាននោះទេ។
ជាចុងក្រោយ ទាក់ទិនទៅនឹងបញ្ហាពុករលួយក្នុងពន្ធនាគារខាងលើនេះដែរ លោក ញូង សាមឿន បានប្រាប់ថា៖«បញ្ហាហ្នឹង កន្លងមកយើងធ្លាប់បានរាយការណ៍ផ្ទាល់មាត់ ដល់ប្រធានពន្ធនាគារ ដើម្បីសំណូមពរសុំឱ្យគាត់ចាត់វិធានការចំពោះកូនចៅរបស់គាត់។ មួយទៀត ទាំងខាងមន្ត្រីពន្ធនាគារនិងខាងមន្ត្រីសិទ្ធិមនុស្សរបស់យើងនៅតែសហការគ្នាជានិច្ចសម្រាប់ដោះស្រាយរាល់បញ្ហាអសកម្មនានាក្នុងពន្ធនាគារ»៕
© រក្សាសិទ្ធិដោយ thmeythmey.com