ជាតិ
សង្គមជាតិ
វិហារឥស្លាមតម្លៃជាង២លានដុលា្លរគ្រោងសម្ពោធនៅចុងខែមិនានេះ
× ភ្នំពេញ៖ វិហារឥស្លាម អាល់សារកាល់ភ្នំពេញ ឫវិហារបឹងកក់ ដែលជាជំនួយរបស់សប្បុរសជនប្រទេសអារ៉ាប់អេមីរ៉េត គ្រោងនឹងសម្ពោធដាក់ឲ្យប្រើប្រាស់នៅចុងខែមិនានេះហើយ។ វិហារថ្មី ដែលប្រើថវិកាជាង ២លានដុល្លារសហរដ្ឋអាមេរិក គឺជាសមិទ្ធិផលដ៏ធំជាងគេ សម្រាប់សហគមន៍ខ្មែរឥស្លាម។
ពិធីសម្ពោធវិហារឥស្លាម ឫម៉ាជ្ជិតអាល់សារកាល់ នឹងប្រព្រឹត្តិទៅនៅថ្ងៃទី២៧ ខែមិនា ឆ្នាំ២០១៥ ។ អ្នករៀបចំកម្មវិធីអះអាងថា មានពលរដ្ឋខ្មែរឥស្លាមប្រមាណ ៨ម៉ឺននាក់ គ្រោងនឹងចូលរួមក្នុងពិធីសម្ពោធនេះ។ លោក សុះ មុះសិ រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា ថ្លែងប្រាប់គេហទំព័រព័ត៌មានថ្មីៗថា វិហារឥស្លាម ដែលមានលក្ខណៈស្តង់ដានេះ ប្រើថវិការបស់ម្ចាស់ជំនួយអស់ប្រមាណជាង ២លានដុល្លារសហរដ្ឋអាមេរិក បើគិតទាំងការលើកលែងពន្ធពីរដ្ឋាភិបាលផង (VAT)។
បើតាមការបញ្ជាក់ពីលោក សុះ មុះសិន ដែលថ្មីៗទទួលបាន វិហារឥស្លាម អាល់សារកាល់ សាងសង់អស់រយៈពេលជាង២ឆ្នាំ រាប់ចាប់ពីពាក់កណ្តាលឆ្នាំ២០១២ មក។ យ៉ាងណា លោកថា មានភាពយឺតយ៉ាវបន្តិចចំពោះការសាងសង់ ដោយសារខើនវិហាររាងទាប ហើយម្ចាស់ជំនួយ តម្រូវឲ្យរៀបសាជាថ្មី។
តាមពិតទៅ លោក អ៊ីសា ពិន ណាសៀត គឺជាពាណិជ្ជករដ៏ល្បីល្បាញមួយរូបនៅប្រទេសអារ៉ាប់រួម និងជាអ្នកសាងសង់វិហារឥស្លាមអាល់សារកាល់នេះ លោកបានជួយដល់សហគមន៍ខ្មែរឥស្លាមក្នុងប្រទេសកម្ពុជា ចាប់ពីទស្សវត្សឆ្នាំ៨០មកម្លេះ ដូចជាតាមរយៈការសាងសង់សមទ្ធិផលផ្សេងៗ និងផ្តល់អាហារសម្រាប់ពិធីស្រាលបួសជាដើម។
លោក សុះ មុះសិន បានបញ្ជាក់ថា វិហារឥស្លាមអាល់សារកាល់ អាចផ្ទុកមនុស្សបានជិត ២ពាន់នាក់ ក្នុងនោះផ្នែកខាងលើជាកន្លែងថ្វាយបង្គំ ដែលបែងចែកកន្លែងបុរស និងស្រី្ត ហើយផ្នែកខាងក្រោម សម្រាប់រៀបចំកម្មវិធីសិក្ខាសាលា ប្រជុំ និងអាចជាបន្ទប់បង្រៀនបានផងដែរ។ ថ្នាក់ដឹកនាំខ្មែរឥស្លាមរូបនេះបញ្ជាក់ថា ទៅថ្ងៃអនាគតវិហារអាល់សារកាល់ថ្មីនេះ គ្រោងនឹងប្រែក្លាយជាតំបន់ទេសចរណ៍មួយក្នុងប្រទេសកម្ពុជា ដើម្បីឲ្យភ្ញៀវទេសចរបរទេសបានសិក្សា និងស្វែងយល់ពីប្រវត្តិនៃការកកើតរបស់វិហារនេះ។
គួររំលឹកថា ពិធីសម្ពោធវិហារឥស្លាមអាល់សារកាល់ ក្រោមអធិបតីភាពលោកនាយករដ្ឋមន្ត្រីហ៊ុន សែន និងលោកជំទាវ។ វិហារឥស្លាមអាល់សារកាល់ មានទីតាំងនៅតំបន់បឹងកក់ (កន្លែងអភិវឌ្ឍ) ឫក្រោយសណ្ឋាគារភ្នំពេញ។ ថ្នាក់ដឹកនាំប្រទេសកម្ពុជា កន្លងមកធ្លាប់បានយកចិត្តទុកដាក់ខ្ពស់ចំពោះសហគមន៍ខ្មែរឥស្លាម មានដូចជាការអនុញ្ញាតឲ្យស្ត្រី អាចពាក់ក្រមាក្នុងគ្រឹះស្ថានអប់រំជាដើម ហើយថ្មីៗនេះលោកនាយករដ្ឋមន្ត្រី បានប្រកាសរៀបចំពិធីអាហារស្រាយបួសដល់សហគមន៍ខ្មែរឥស្លាម ជារៀងរាល់ឆ្នាំផងដែរ។ យោងតាមតួលេខបានបង្ហាញថា មានជនជាតិចាម ឫខ្មែរឥស្លាមចន្លោះពី៥០ម៉ឺន ទៅ៧០នាក់ ដែលកំពុងរស់នៅក្នុងប្រទេសកម្ពុជា៕
© រក្សាសិទ្ធិដោយ thmeythmey.com