ជាតិ
សង្គមជាតិ
មនុស្សជាង១០០នាក់បានហែរក្បួនដើម្បីអបអរថ្ងៃទិវាសិទិ្ធស្ត្រី៨មិនាលើកទី១០៤
× បាត់ដំបង៖ មនុស្សជាង១០០នាក់បានហែរក្បួនដើម្បីអបអរថ្ងៃទិវាសិទិ្ធស្ត្រី៨មិនា លើកទី១០៤នៅក្នុងក្រុងបាត់ដំបង។ ក្នុងនោះមានយុវជន ព្រះសង្ឃ និងសង្គមស៊ីវិលនានាមកចូលរួមផងដែរ។ កម្មវិធីនេះរៀបចំឡើងដោយ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ប្រចាំនៅខេត្តបាត់ដំបង។
យុវតី អ៊ូ វួចណៃ ដែលបានចូលរួមក្នុងក្បួនដង្ហែថ្ងៃអាទិត្យម្សិលមិញដែរនោះបានពន្យល់ថា ការចូលរួមរបស់កញ្ញាទៅក្នុងព្រឹត្តិការណ៍សិទ្ធិនារី គឺជាការបង្ហាញអំពីលើកទឹកចិត្តខ្លួនឯង និងលើកស្ទួយខ្លួនឯងនៅចំពោះមុខបុរស។ វួចណៃ យល់ថា ស្ត្រីត្រូវចូលរួមក្នុងរាល់សកម្មភាពសង្គម សហគមន៍ ឬសកម្មភាពផ្សេងៗទៀត ដើម្បីអាចបង្ហាញសមត្ថភាពរបស់ខ្លួនបាន មុននឹងឲ្យបុរសៗ លើកតម្កើងស្ត្រី។
យុវជន រៀន សុធា បានប្រាប់អ្នកយកសារព័ត៌ថ្មីៗថា វត្តមានរបស់លោកក្នុងក្បួនដង្ហែសិទ្ធិគឺបង្ហាញពីការគាំទ្ររបស់លោកចំពោះស្ត្រី។ ផ្ទុយទៅវិញ សុធា បានអំពាវនាវដល់បុរសគ្រប់រូបថា ការលើកស្ទួយសិទ្ធិស្ត្រី ក៏មិនត្រូវស្តែងចេញតែតាមរយៈការចូលរួមថ្ងៃសិទ្ធិនារី៨មីនានោះឡើយ។ សុធា ចង់ប្រាប់ទៅបុរសៗឲ្យពួកគេត្រូវគាំទ្រនារីគ្រប់ពេលវេលា និងគ្រប់សកម្មភាព។
អនុប្រធាននៃសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក សម ឡុង បានប្តេជ្ញាចិត្តហើយថាលោកនឹងរៀបចំកម្មវិធីដូចនេះ នៅឆ្នាំក្រោយទៀត។ សម្រាប់ លោក សម ឡុង ក្បួនដង្ហែមិនានេះ មិនសំដៅតែទៅលើការគោរពសិទ្ធិនារីក្នុងថ្ងៃ៨មិនានោះទេ។ តាមរយៈក្បួនដង្ហែនេះ លោកអំពាវនាវដល់បុរសឲ្យបញ្ឈប់អំពើហិង្សាគ្រប់ទម្រង់ទៅលើស្ត្រី។ ពីព្រោះ ចំពោះលោក ស្ត្រីគឺជាឆ្អឹងខ្នងនៃការអភិវឌ្ឍរបស់ប្រទេសជាតិ៕
© រក្សាសិទ្ធិដោយ thmeythmey.com