ជាតិ
គ្មានការប្រឡងបាក់ឌុបលើកទី២ទេ សម្រាប់ឆ្នាំនេះ
×
ក្រសួងអប់រំយុវជន និងកីឡា បានប្រកាសថា មិនចាំបាច់រៀបចំឲ្យមានការប្រឡង សញ្ញាបត្រមធ្យបសិក្សាទុតិយភូមិ(បាក់ឌុប)លើកទី២ទេ នៅឆ្នាំសិក្សា២០១៤-២០១៥នេះ លើកលែងតែមានករណីប្រធានសក្តិ។
បើតាមសេចក្តីប្រកាសព័ត៌មានរបស់ក្រសួងអប់រំចេញផ្សាយនៅថ្ងៃទី៩ខែមីនានេះ ក្រសួងបានកំណត់យកថ្ងៃទី២៤ ខែសីហា ជាថ្ងៃប្រឡង បាក់ឌុប ដោយបន្តការពង្រឹងការអនុវត្តតាមគោលការណ៍កំណែទម្រង់របស់ខ្លួនដូចឆ្នាំ២០១៤កន្លងទៅ ប៉ុន្តែកែលំអរចំណុចខ្វះខាតផ្នែកបច្ចេកទេសមួយចំនួន។
«បន្តប្រគល់សិទ្ធិអំណាច ការទទួលខុសត្រូវជូនគ្រូបង្រៀនដឹកនាំការប្រឡងតាមថ្នាក់ និងតាមមុខវិជ្ជាដែលខ្លួនបានបង្រៀន និងមិនយកពិន្ទុប្រឡងឆមាស ទៅបូកជាមួយពិន្ទុប្រឡងថ្នាក់ជាតិទេ ប៉ុន្តែយកជាបេក្ខភាពប្រឡង ចំពោះបេក្ខជនដែលមានពិន្ទុប្រចាំឆ្នាំធ្លាក់មធ្យមភាគមិនចាំបាច់ប្រឡងឡើងវិញទេ។ មណ្ឌលប្រឡងត្រូវប្រមូលផ្តុំនៅទីរួមខេត្ត-រាជធានី ដោយយកគ្រិះស្ថានទាំងសាធារណៈ និងឯកជន ចាប់ពីកម្រិតបឋមសិក្សា ធ្វើជាមណ្ឌលប្រឡង ក្នុងករណីណាខេត្តណាដែលមិនអាចអនុវត្តន៍បាន ត្រូវប្រមូលផ្តុំនៅទីរួមស្រុក ដែលនៅជិតទីរួមស្រុកជាងគេ។
បន្តរៀបចំប្រធានវិញ្ញាសាចំនួន៧មុខ និងមាន២ទម្រង់ គឺទម្រង់ចែកជូនបេក្ខជន និងទម្រង់កត់លើក្តារខៀន ហើយបេក្ខជនម្នាក់ត្រូវបានចែកជូនក្រដាសប្រឡងឲ្យ ដើម្បីសរសេរចម្លើយ។ បន្តស្នើសុំការសហការពីអង្គភាពប្រឆាំងអំពើពុករលួយ ក្នុងការចូលរួមអង្កេតការណ៍ដំណើរការប្រឡង ចាប់ពីដំណើរការសំណេររហូតដល់ចេញលទ្ធផលប្រឡង និងធ្វើការកែសម្រួលសមភាពនិយាមប្រើប្រាស់គណៈមេប្រយោគមួយចំនួន និងស្នើសុំគោលការណ៍ឧបត្ថម្ភមេប្រយោគយ៉ាងតិចឲ្យបានស្មើឆ្នាំមុន»។ នេះបើតាមខ្លឹមសារនៃសេចក្តីប្រកាសព័ត៌មានរបស់ក្រសួងអប់រំយុវជន និងកីឡាដដែល។
ដើម្បីឲ្យការប្រឡងនេះប្រព្រឹត្តទៅក្រកបដោយគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ក្រសួង ក៏បានអំពាវនាវឲ្យសិស្សានុសិស្សថ្នាក់ទី១២ទាំងអស់ខិតខំរៀនសូត្រ និងជឿជាក់លើសមត្ថភាពខ្លួនឯង ដើម្បីទទួលបានលទ្ធផលនៅពេលប្រឡងដែលនឹងប្រព្រឹត្តទៅនៅថ្ងៃទី ២៤ ខែសីហាឆ្នាំ២០១៥ខាងមុខ។
សូមបញ្ជាក់ថា កាលពីឆ្នាំ២០១៤ ក្រសួងអប់រំយុវជន និងកីឡា បានរៀបចំឲ្យមានកាប្រឡង សញ្ញាបត្រមធ្យមសិក្សាទុតិយភូមិ ចំនួន២លើក។ ការប្រឡងបាក់ឌុបទាំង២លើក មានបេក្ខជនប្រឡងជាប់ចំនួន៣៣,៧៩៩នាក់ ត្រូវជា៤០.៦៧ភាគរយ ក្នុងនោះការប្រឡងលើកទី១ មានបេក្ខជនប្រឡងជាប់មានចំនួន២៣,១២៦នាក់ត្រូវជា២៥.៧២ភាគរយ ក្នុងចំណោមបេក្ខជនប្រឡងចំនួន៨៩,៩៣៧នាក់ និងការប្រឡងលើកទី២ មានបេក្ខជនជាប់ចំនួន១០,៨៧១នាក់ ដែលស្មើនឹង១៧.៩៤ភាគរយ ក្នុងចំណោមបេក្ខជនប្រឡងចំនួន៦៦,៨១១នាក់៕
© រក្សាសិទ្ធិដោយ thmeythmey.com