ជាតិ
នយោបាយជាតិ
×![]()
ដោយ: ធឿន បញ្ញាឬទិ្ធ
ភ្នំពេញ៖ លោក មាជ សុវណ្ណារ៉ា នៅតែទទូចស្នើឲ្យមានជំនួបថ្នាក់កំពូលរវាងលោក សម រង្ស៊ី និងលោកហ៊ុន សែន ក្នុងការអន្តរាគមន៍ដោះលែងរូបលោក។ នៅថ្ងៃទី១១មីនានេះ តុលាការកំពូលប្រកាសសាលដីកាបដិសេធបណ្តឹងសុំនៅក្រៅឃុំ បណ្តោះអាសន្នរបស់លោក មាជ សុវណ្ណារ៉ា និងសកម្មជនសង្គ្រោះជាតិម្នាក់ទៀត គឺលោក អ៊ុក ពេជ្រសំណាង ។
បន្ទាប់បើកសវនាការសុំនៅក្រៅឃុំបណ្តោះអាសន្នកាលពីថ្ងៃទី៤ ខែមីនាកន្លងមកនៅថ្ងៃទី១១ មីនានេះ តុលាការកំពូលបានសម្រេចមិនអនុញ្ញាតឲ្យមន្ត្រីគណបក្សសង្គ្រោះជាតិ លោក ម៉ាជ សុវណ្ណារ៉ា និងលោក អ៊ុក ពេជ្រសំណាង សកម្មជនគណបក្សនេះ នៅក្រៅឃុំឡើយ។ តុលាការកំពូលបានសម្រេចដាក់ឲ្យពួកគេ បន្តនៅឃុំខ្លួនក្នុងពន្ធនាគារព្រៃសដដែល។
ចំពោះការសម្រេចនេះលោក មាជ សុវណ្ណារ៉ា ថ្លែងថាមានតែថ្នាក់ដឹកនាំគណបក្សសង្គ្រោះជាតិ គឺលោក សម រង្ស៊ី ជួបជាមួយលោក ហ៊ុន សែនទេ ដែលអាចអន្តរាគមន៍ជួយឲ្យរូបលោកនៅក្រៅឃុំបាន «រឿងនយោបាយគឺមានអ្នកនយោបាយទេ ដែលអាចដោះស្រាយបាន ។ បើលោកសម រង្ស៊ី មិនជួបជាមួយលោក ហ៊ុន សែនទេ រូបលោកគឺគ្មានសង្ឃឹមបានចេញឡើយ » ។ នេះជាការទទូចរបស់លោក មាជ សុវណ្ណារ៉ា ។
ជុំវិញសេចក្ដីសម្រេចនេះមេធាវីការពាររឿងក្តីលោក មាជ សុវណ្ណារ៉ា គឺលោក ជូង ជូងី បានហៅការសម្រេចបន្តឃុំខ្លួនកូនក្តីរបស់លោកថា ជារឿងអយុត្តិធម៌ ព្រោះមិនមានភស្តុតាងដាក់បន្ទុកច្បាស់លាស់នោះទេ ។ ហើយលោកយល់ថា ការសម្រេចនេះ ស្ថិតនៅក្រោមឥទ្ធិពលនយោបាយពិតមែន ។
មន្ត្រីរបស់គណបក្សសង្គ្រោះជាតិ លោក មាជ សុវណ្ណារ៉ា និងសកម្មជនបក្សលោកអ៊ុក ពេជ្រសំណាង ត្រូវបានកម្លាំងសមត្ថកិច្ចចាប់ខ្លួនពាក់ព័ន្ធនឹងករណីអំពើហិង្សានៅទីលានប្រជាធិបតេយ្យ កាលពីថ្ងៃទី១៥ខែកក្កដា ឆ្នាំ២០១៤ ៕
© រក្សាសិទ្ធិដោយ thmeythmey.com
