ជាតិ
×![]()
ដោយ: ថ្មីៗ
ភ្នំពេញ៖ អ្នកស្រាវជ្រាវបញ្ហាសង្គមឯករាជ្យ លោក អ៊ូ វីរៈ ទទួចឲ្យរដ្ឋមន្ត្រីក្រសួងសុខាភិបាល លោក ម៉ម ប៊ុនហេង លាលែងចេញពីដំណែង បន្ទាប់ពីមានករណីឆ្លងមេរោគអេដស៍នៅ ភូមិរកា ខេត្តបាត់ដំបូងរួចមក។ នេះបើយោងតាមការបង្ហាញគំនិតរបស់លោកនៅលើគេហទំព័រ ហ្វេសប៊ុកផ្ទាល់ខ្លួន។ ប៉ុន្តែរហូតមកដល់ពេលនេះ លោករដ្ឋមន្ត្រីក្រសួងសុខាភិបាលមិនទាន់ប្រតិកម្មយ៉ាងណានោះទេ។
បន្ទាប់ពីមានករណីឆ្លងមេរោគអេដស៍នៅភូមិរកា ខេត្តបាត់ដំបង ដែលធ្វើឲ្យភូមិរាប់រយនាក់ផ្ទុកមេរោគអេដស៍ និងមួយចំនួនទៀតបានស្លាប់ជាបន្តបន្ទាប់ លោក អ៊ូ វីរៈ អ្នកស្រាវជ្រាវបញ្ហាសង្គម បានទទួចឲ្យរដ្ឋមន្ត្រីក្រសួងសុខាភិបាលលោក ម៉ម ប៊ុនហេង លាលែងចេញពីតំណែងភ្លាមៗ ដោយលោកយល់ឃើញថា រដ្ឋមន្ត្រីក្រសួងសុខាភិបាលរូបនេះ ពុំមានសមត្ថភាព និងមិនអាចដឹកនាំឲ្យទៅរកភាពរីកចំម្រើនបានឡើយ។
ថ្លែងប្រាប់វិទ្យុស្ត្រី និងសារព័ត៌មានអេឡិចត្រូវនិកថ្មីៗ នៅថ្ងៃពុធនេះ លោក អ៊ូ វីរៈ បញ្ជាក់ថា បញ្ហាឆ្លងមេរោគអេដស៍នៅភូមិរកានេះ គឺជារឿងធំបំផុត ដែលសមល្មមឲ្យលោក ម៉ម ប៊ុនហេង លាលែងចេញពីដំណែងបានហើយ។ លោក វីរៈ ចាត់ទុកថា រដ្ឋមន្ត្រីក្រសួងសុខាភិបាលរូបនេះ មិនមានសមត្ថិភាព គ្រប់គ្រងបញ្ហា និងមិនទទួលខុសត្រូវរាល់ករណីដែលបានកើតឡើង ក្រោមការដឹកនាំរបស់ខ្លួនឡើយ។ លោក អ៊ូ វីរៈ ប្រៀបធៀបបញ្ហានេះ ទៅប្រទេសមហាអំណាចមួយចំនួននៅលើពិភព លោកថា ប្រសិនបើមានករណីកើតឡើងដូចកម្ពុជានេះ ថ្នាក់ដឹកនាំប្រទេសគេ នឹងលាលែងចេញពីតំណែងភ្លាម។ ដោយឡែកនៅកម្ពុជាវិញ គេមិនទាន់ឃើញមានវប្បធម៌នេះនៅឡើយ។ តាមការសង្កេតរបស់លោក អ៊ូ វីរៈ
សព្វថ្ងៃនេះ ក្រសួងសុខាភិបាលហាក់មិនមានយន្តការណាមួយ ឲ្យបានល្អប្រសើរ ដើម្បីធ្វើកំណែទម្រង់ឲ្យមានភាពរីកចំម្រើននៅឡើយនោះទេ។
ករណីពលរដ្ឋឆ្លងមេរោគអេដស៍នៅភូមិរកា ស្រុកសង្កែខេត្តបាត់ដំបង រហូតមកដល់ពេលនេះ កើនឡើងដល់ ២៧៧នាក់ហើយ និងមានអ្នកស្លាប់ ៦នាក់ ក្នុងនោះ ភាគច្រើនជាមនុស្សចាស់ ដែលមានអាយុចាប់ពី ៦០ឡើងទៅ។
ទាក់ទងបញ្ហានេះ សង្គមស៊ីវិលតែងតែរិះគន់រដ្ឋាភិបាលមិនសំចៃមាត់ ជាពិសេសក្រសួងសុខាភិបាល ដែលធ្វើការពាក់ព័ន្ធថា មិនបានយកចិត្តទុកដាក់ ត្រួតពិនិត្យទៅលើ គ្លីនិកនានា ដែលគ្មានអាជ្ញាប័ន ឲ្យបានត្រឹមត្រូវ ទើបបណ្តាលឲ្យមានបញ្ហានេះ កើតឡើង។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា មិនធ្វើការអធិប្បាយយ៉ាងណាទៅលើបញ្ហានេះឡើយ។ ប៉ុន្តែលោកថា ប្រសិនបើរដ្ឋមន្ត្រីក្រសួងសុខាភិបាល មានឆន្ទៈចង់លាលែងពីតំណែងដោយសាររឿងនេះ ក៏ជាការល្អប្រសើរផងដែរ ព្រោះដើម្បីទុកជាបទពិសោធន៍សម្រាប់ថ្នាក់ដឹកនាំក្រោយៗទៀត។
នៅថ្ងៃពុធទី១២នេះ គេមិនអាចសុំការឆ្លើយតបពីរដ្ឋមន្ត្រីក្រសួងសុខាភិបាលលោក ម៉ម ប៊ុនហេង បាននៅឡើយទេដោយឆ្លើយថា លោកជាប់រវល់។
នៅក្នុងពិធីបិទសិក្ខាសាលាបូកសរុបការងារនៃក្រសួងសុខាភិបាល នាពេលថ្មីៗនេះ លោកនាយករដ្ឋមន្ត្រី ហ៊ុន សែន បានសំដែងការសោកស្តាយយ៉ាងខ្លាំងចំពោះករណីឆ្លងមេរោគអេដស៍ទ្រង់ទ្រាយធំនៅក្នុងភូមិរកា ស្រុកសង្កែ ខេត្តបាត់ដំបង។ ចំពោះលោកនាយករដ្ឋមន្ត្រី នេះគឺជារឿងដ៏គួរឲ្យសោកសៅ ហើយថា រដ្ឋាភិបាលត្រូវរៀបចំវិធានការលម្អិតដើម្បីគ្រប់គ្រង និងដោះស្រាយបញ្ហា៕
លោក ទួន សុផល
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
9 ម៉ោង
