ក្រុមជម្រើសជាតិប៊ូតង់ដែលស្ថិតនៅចំណាត់ថ្នាក់ទី២០៩ និងជាចំណាត់ថ្នាក់ចុងគេបំផុតនៃតារាង FIFA បានទទួលជ័យជម្នះជាប្រវត្តិសាស្ត្រក្នុងការប្រកួតជម្រុះ World Cup តាមរយៈការយកឈ្នះម្ចាស់ផ្ទះស្រីលង្កា ១-០ ។ ជ័យជម្នះលើកដំបូងដែលមិនធ្លាប់មានពីមុននេះ រកបានដោយកីឡាករ Tshering Dorji នៅរយៈពេល៦នាទីមុននឹងបញ្ចប់ការប្រកួត។
«Tashi Delek» នេះជាពាក្យដែលមានន័យអបអរសាទររបស់លោកនាយករដ្ឋមន្ត្រីប៊ូតង់ Tshering Tobgay ក្រោយក្រុមរបស់ខ្លួនទទួលជ័យជម្នះជាប្រវត្តិសាស្ត្រនាការប្រកួតជម្រុះជុំទីមួយនៃព្រឹត្តិការណ៍ World Cup ប្រចាំតំបន់អាស៊ីនៅទីក្រុងកូឡុំបូ ប្រទេសស្រីលង្កា។ លោកក៏បានជូនពរដល់ក្រុមទាំងពីរផងដែរសម្រាប់ជំនួបជើងទីពីរនៅថ្ងៃទី១៧ ខែមិនា នៅកីឡដ្ឋាន Changlimithang ប្រទេសប៊ូតង់វិញ។
សម្រាប់ លោក Seph Blatter ប្រធានសហព័ន្ធកីឡាបាល់ទាត់អន្តរជាតិ (FIFA) ជ័យជម្នះរបស់ប៊ូតង់ គឺព្រឹត្តិការណ៍ដ៏អស្ចារ្យ និងជាប្រវត្តិសាស្ត្រ។ ប៊ូតង់ដែលជាព្រះរាជាណាចក្រតូចមួយនៅតំបន់អាស៊ីខាងត្បូង ទើបតែបង្ហាញខ្លួនលើកដំបូងប៉ុណ្ណោះក្នុងការប្រកួតជម្រុះ World Cup បន្ទាប់ក្រុមជម្រើសជាតិមួយនេះ ក្លាយជាសមាជិក FIFA កាលពីឆ្នាំ២០០០ ៕