ជាតិ
សង្គមជាតិ
អ្នកគ្រូ នាង ផល្លា កំពុងធ្វើដំណើរទៅកាន់ទីក្រុងឌូបៃ
×
ភ្នំពេញ៖ មុននឹងចាកចេញដំណើរទៅកាន់ទីក្រុងឌូបៃ ប្រទេសអេមីរ៉េត អារ៉ាប់រួម នៅថ្ងៃទី១៤ ខែមីនា នេះ អ្នកស្រី នាង ផល្លា បានថ្លែងអំណរគុណជាអនេក ចំពោះបងប្អូន ជនជាតិរួមជាតិដែលបោះឆ្នោតគាំទ្រអ្នកគ្រូតាមរយៈទំព័រហ្វេសបុក ដើម្បីទទួលបានជ័យ លាភីគ្រូឆ្នើមពិភពលោក និងប្រជែងយកប្រាក់រង្វាន់១លានដុល្លារអាមេរិកពីកម្មវិធី Global Teacher Prize ជាមួយគ្រូបង្រៀន៩នាក់ផ្សេងទៀត។
អ្នកស្រី នាង ផល្លា បានសម្តែងអារម្មណ៍រីករាយនឹងការចូលរួមក្នុងកម្មវិធី Global Teacher Prize ដែលបានរៀបចំការប្រជែងមួយផ្សេងទៀត តាមរយៈទំព័រហ្វេសប៊ុកផ្លូវការរបស់ខ្លួន ដែលមានឈ្មោះថា «Most Popular Teacher on Facebook» (គ្រូមានប្រជាប្រិយភាពជាងគេលើបណ្តាញសង្គមហ្វេសប៊ុក)។
មុននឹងចេញដំណើរដើម្បីទៅស្តាប់ការប្រកាសលទ្ធផលជ័យលាភីគ្រូឆ្នើមពិភពលោក នាទីក្រុងឌូប៉ៃ ប្រទេសអារ៉ាប់រួម ដែលនឹងធ្វើឡើងនៅថ្ងៃទី១៥ ខែមីនា ស្អែកនេះ អ្នកស្រី ផល្លា បានថ្លែងអំណរគុណជនរួមជាតិក្នុងទឹករីករាយថា៖«នាងខ្ញុំសូមថ្លែងអំណរគុណ លោកគ្រូ អ្នកគ្រូ សិស្សានុសិស្ស និងបុគ្គលិកគ្រួសារថ្មីគ្រប់ផ្នែកទាំងអស់ ដែលបានជួយបោះឆ្នោត និងជួយជ្រោមជ្រែង ដើម្បីពានរង្វាន់បម្រើការងារក្នុងអង្គការ។ ពិសេស ប្រជាជនទាំងក្នុង និងក្រៅប្រទេសដែលបានបោះឆ្នោតជូននាងខ្ញុំ»។
ក្រៅពីថ្លែងអំណរគុណជនរួមជាតិរួច អ្នកស្រី នាង ផល្លា ដែលបច្ចុប្បន្នជានាយិកាសាលាកុមារពិការភ្នែកភ្នំពេញថ្មី និងជាប្រធានសម្របសម្រួល កម្មវិធីអប់រំកុមារពិការភ្នែក និងគថ្លង់របស់អង្គការគ្រួសារថ្មី ដែលជាបេក្ខភាពតែម្នាក់គត់របស់កម្ពុជាដែលត្រូវប្រជែងយកប្រាក់ រង្វាន់១លានដុល្លារអាមេរិកពីកម្មវិធី Global Teacher Prize នោះ ក៏បានថ្លែងអំណរគុណដល់ លោកនាយករដ្ឋមន្ត្រី ហ៊ុន សែន និងភរិយា និងរដ្ឋមន្ត្រីក្រសួងអប់រំ លោក ហង់ ជួនណារ៉ុន ផងដែរ។
អ្នកស្រី នាង ផល្លា និងបេក្ខជន៩នាក់ទៀត មាន លោក Azizullah Royesh (អាហ្វហ្គានីស្ថាន) លោកស្រី Kiran Bir Sethi (ឥណ្ឌា) លោក Guy Etienne (ហៃទី) លោកស្រី Jacqueline Jumbekahura (កេនយ៉ា) លោកស្រី Nancie Atwell (អាមេរិក) លោក Richard Spencer (អង់គ្លេស) លោក Stephen Ritz (អាមេរិក) លោកស្រី Naomi Volain (អាមេរិក) និងលោក Madenjit Singh (ម៉ាឡេស៊ី) នឹងទទួលបានលទ្ធផលជ័យលាភីគ្រូឆ្នើមពិភពលោក នាទីក្រុងឌូប៉ៃ ប្រទេសអារ៉ាប់រួម នៅថ្ងៃទី១៥ ខែមីនា ស្អែកនេះ៕
© រក្សាសិទ្ធិដោយ thmeythmey.com