ជាតិ
សង្គមជាតិ
លោក បាន គីមូន សរសើរលោក ហ៊ុន សែន ដែលជំរុញវប្បធម៌សន្ទនានយោបាយ
×
ភ្នំពេញ៖ ក្នុងជំនួបពិភាក្សាការងារទ្វេភាគីរវាងលោកនាយករដ្ឋមន្ត្រី ហ៊ុន សែន និងលោក បាន គីមូន អគ្គលេខាធិការអង្គការសហប្រជាជាតិ នៅរសៀលថ្ងៃទី១៤ ម្សិលមិញនេះ លោក បាន គីមូន បានថ្លែង កោតសរសើរលោក ហ៊ុន សែន ដែលបានជំរុញឲ្យមានវប្បធម៌សន្ទនា នយោបាយ ពិសេសជាមួយគណបក្សប្រឆាំងនៅកម្ពុជា។ នេះបើតាមការសរសេរលើគណនី ហ្វេសប៊ុករបស់លោក កឹម គុណវឌ្ឍ អគ្គនាយកទូរទស្សន៍ជាតិកម្ពុជា ។
បើតាមការបង្ហោះលើគណនីហ្វេសប៊ុក លោក កឹម គុណវឌ្ឍ នៅក្នុងជំនួបជាមួយលោក នាយករដ្ឋមន្ត្រី ហ៊ុន សែន នៅរសៀលថ្ងៃទី១៤ មិនា អគ្គលេខាធិការអង្គការសហប្រជាជាតិ លោក បាន គីមូន បានថ្លែងអំណរគុណ ចំពោះលោកនាយករដ្ឋមន្ត្រី ដែលបានចំណាយ ពេលវេលាចូលរួមសន្និសីទពិភពលោកលើកទី៣ ស្តីពីការកាត់បន្ថយហានិភ័យនៃគ្រោះ មហន្តរាយ នៅទីក្រុងសេនដាយ ប្រទេសជប៉ុន។ ជាងនេះទៀត អគ្គនាយកទូរទស្សន៍ ជាតិកម្ពុជា (ទទក) ដែលបានទៅយកផ្ទាល់ព័ត៌មានផ្ទាល់នៅទីក្រុងសេនដាយរូបនេះ បានសរសេរបន្តថា លោក បាន គីមូន បានសំដែងនូវការវាយតម្លៃខ្ពស់ និងកោតសរសើរជូន ចំពោះលោកនាយករដ្ឋមន្ត្រី ដែលបានជំរុញឲ្យមានវប្បធម៌សន្ទនានយោបាយ ជាពិសេសជាមួយគណបក្សប្រឆាំងនៅកម្ពុជា។
បើតាម លោក គុណវឌ្ឍ ព្រមជាមួយគ្នានោះ អគ្គលេខាធិការអង្គការសហប្រជាជាតិ ក៏បានវាយតម្លៃខ្ពស់ចំពោះការរីកចំរើនទាំងនយោបាយ និងសេដ្ឋកិច្ចរបស់ប្រទេសកម្ពុជា ពិសេសការសម្រេចបាននូវលទ្ធផលជាផ្លែផ្កានៃការអនុវត្តសេចក្តីប្រកាស សហស្សវត្តន៍របស់អង្គការសហប្រជាជាតិលើចំណុចអាទិភាព ទាំង៩របស់ខ្លួន។
ក្នុងជំនួបពិភាក្សាគ្នានោះដែរ លោកនាយករដ្ឋមន្ត្រី ហ៊ុន សែន និងលោក បាន គីមូន បានពិភាក្សាយ៉ាងយកចិត្តទុកដាក់ ចំពោះសាលាក្តីកាត់ទោសមេដឹកនាំខ្មែរក្រហមផងដែរ។ អគ្គនាយកទូរទស្សន៍ជាតិកម្ពុជា បានសរសេរបន្តថា អគ្គលេខាធិការអង្គការសហប្រជាជាតិ បានសំដែងនូវការវាយតម្លៃខ្ពស់ ចំពោះការចូលរួមវិភាគទានរបស់រដ្ឋាភិបាលកម្ពុជា ក្នុងកិច្ចខិតខំជួយផ្តល់នូវថវិកាដល់ការបើកប្រាក់បៀវត្សរ៍ដល់បុគ្គលិកជាតិរបស់កម្ពុជា ហើយខាងផ្នែកអន្តរជាតិជាបន្ទុករបស់អង្គការសហប្រជាជាតិ ក្នុងការស្វែងរកថវិកា ដោយផ្ទាល់ ដើម្បីឲ្យមាននិរន្តរភាពនៅថ្ងៃអនាគត។
ជាមួយគ្នានោះ បើតាមប្រភពដដែល លោក បាន គីមូន ក៏បានអញ្ជើញលោកនាយករដ្ឋមន្ត្រី ចូលរួមក្នុងកិច្ចប្រជុំកំពូលរំលឹកខួប ៧០ឆ្នាំរបស់អង្គការសហប្រជាជាតិ ដែលនឹងប្រារព្ធឡើង នៅខែកញ្ញា ឆ្នាំ ២០១៥ នោះ ដែលជាកិច្ចពិភាក្សាកំពូលរវាងបណ្តាប្រទេសក្នុងពិភព លោកផងដែរ។
ជាការឆ្លើយតបនឹងការអញ្ជើញរបស់លោក បាន គីមូននោះ លោក គុណវឌ្ឍ បានសរសេរថា លោកនាយកដ្ឋមន្ត្រីមិនអាចចូលរួមក្នុងកិច្ចប្រជុំដែលពាក់ព័ន្ធទៅនឹងដំណាក់កាលក្រោយឆ្នាំ២០១៥ ដែលជាសេចក្តីប្រកាសសហស្សវត្សរ៍របស់អង្គការសហប្រជាជាតិនោះឡើយ ។ លោកសរសេរថា លោកនាយករដ្ឋមន្ត្រីមានប្រសាសន៍ឆ្លើយតបថា លោកមានកិច្ចការ ជាច្រើននៅក្នុងប្រទេស ដូចនេះលោកនឹងចាត់តាំងលោក គាត ឈន់ អញ្ជើញទៅចូលរួមកិច្ច ប្រជុំនោះជំនួសវិញ៕
© រក្សាសិទ្ធិដោយ thmeythmey.com