ជាតិ
សង្គមជាតិ
នាយករដ្ឋមន្ត្រីនឹងចូលរួមបើកព្រឹត្តិការណ៍អង្គរសង្ក្រាន្ត ២០១៥ ជាលើកដំបូង
×
ភ្នំពេញ៖ នេះជាលើកដំបូងដែលលោកនាយករដ្ឋមន្ត្រី ហ៊ុន សែន ប្រកាសថា លោកនឹងទៅ ចូលរួមបើកព្រឹត្តិការណ៍អង្គរសង្ក្រាន្ត ២០១៥ ដែលនឹងប្រារព្ធឡើងរយៈបីថ្ងៃ ចាប់ពីថ្ងៃទី១៤ ដល់ទី១៦ ខែមេសា លើទឹកដីអង្គរ ខេត្តសៀមរាប។
អង្គរសង្ក្រាន្តដែលរៀបចំឡើងដោយសហភាពសហព័ន្ធយុវជនកម្ពុជាដែលដឹកនាំលោក ហ៊ុន ម៉ានី នោះ នឹងប្រារព្ធជាលើកទី ៣ ក្នុងឆ្នាំ ២០១៥នេះ។ ពិធីបើកព្រឹត្តិការណ៍អង្គរសង្ក្រាន្ត ក្នុងឆ្នាំ ២០១៣ និង២០១៤ កន្លង ត្រូវបានប្រារព្ធឡើងដោយ លោក សុខ អាន ដែលតំណាងឲ្យប្រមុខរដ្ឋាភិបាល។ ដោយឡែក ពិធីបើកព្រឹត្តិការណ៍អង្គសង្ក្រាន្តឆ្នាំ ២០១៥នេះ ដែលគ្រោងប្រារព្ធកាន់តែធំ និងប្លែកជាងមុននោះ នឹងមានការអញ្ជើញចូលរួមដោយផ្ទាល់ ពីសំណាក់ លោកនាយករដ្ឋមន្ត្រី ហ៊ុន សែន។
ក្នុងពិធីបើកការដ្ឋានស្ថាបនាផ្លូវពីក្រុងប៉ោយប៉ែត ខេត្តបន្ទាយមានជ័យ ដល់ខេត្តឧត្តរមានជ័យនាព្រឹកថ្ងៃទី១៨ ខែមីនា នេះ លោកនាយករដ្ឋមន្ត្រី ហ៊ុន សែន មានប្រសាសន៍ថា៖«អង្គរសង្ក្រាន្តឆ្នាំទី៣ ខ្ញុំព្រះករុណាខ្ញុំនឹងទៅចូលរួមជាមួយនឹងការបើក អង្គរសង្ក្រាន្តនៅសៀមរាប។ ឆ្នាំទី១ ឯកឧត្តម សុខ អាន ឆ្នាំទី២ ឯកឧត្តម សុខ អាន ឆ្នាំទី៣ នាយករដ្ឋមន្ត្រីតែម្តង ដើម្បីលើកទឹកចិត្តយុវជនឲ្យចូលរួម»។
ព្រឹត្តិការណ៍អង្គរសង្ក្រាន្តលើកទី៣ គ្រោងនឹងផលិតនំអន្សមយក្សទម្ងន់រហូតដល់ជាង ៣តោន ដើម្បីបំបែកកំណត់ត្រាពិភពលោក(Guinness World Record)។ នំអន្សមជ្រូកយក្សដែលនឹងផលិតឡើងក្នុងព្រឹត្តិការណ៍នេះ ក៏ត្រូវបានលោកនាយករដ្ឋមន្ត្រីចាប់អារម្មណ៍ផងដែរ។ លោកថ្លែងអះអាងថា៖«កម្ពុជាឆ្នាំ ទៅធ្វើប្រមាណ ២តោន៨ ឥឡូវឆ្នាំនេះគ្រោងធ្វើ ៣តោន២ អន្សមយក្ស។ ប្រហែលត្រូវអញ្ជើញ ពួកកំណត់ត្រាពិភពលោកមកពិនិត្យមើល ហើយឲ្យគាត់ទៅពិនិត្យនៅកម្ពុជា នៅថៃ នៅឡាវ នៅវៀតណាម នៅចិន គឺពួកគេស៊ីអន្សមជ្រូក។ តើអន្សមណាដែលធំជាងគេ? តើអាចចូលGuinnessបានអត់?»។
នៅក្នុងសន្និសីទសារព័ត៌មានស្តីពី ការរៀបចំអង្គរសង្ក្រាន្តឆ្នាំ២០១៥ នៅទីស្នាក់ការកណ្តាល សហភាពសហព័ន្ធយុវជនកម្ពុជា កាលពីថ្ងៃទី១២ មីនាកន្លងមក អ្នកនាំពាក្យព្រឹត្តិការណ៍ លោក សោម រតនា បានឲ្យសារព័ត៌មានថ្មីៗដឹងថា យុវជនជាង ៣ពាន់នាក់ទូទាំង បានស្ម័គ្រចិត្តចូលរួមរៀបចំព្រឹត្តិការណ៍អង្គសង្ក្រាន្តឆ្នាំ ២០១៥ ជាមួយសហភាពសហព័ន្ធយុវជនកម្ពុជា៕
© រក្សាសិទ្ធិដោយ thmeythmey.com