ជាតិ
សិស្សវិទ្យាស្ថាន AII ជោគជ័យក្នុងការរៀបចំកម្មវិធី “ទេពកោសល្យដើម្បីជំនួយឧបត្ថម្ភ” ដល់ជនក្រីក្រ
×![]()
ដោយ: ថ្មីៗ
សិស្សានុសិស្សជាង១១០នាក់ នៃវិទ្យាស្ថាន អន្តរទ្វីប អាមេរិកាំង ដែលមកពីក្លឹបចំនួន១១ មានដូចជា ក្លឹបរាំ ក្លឹបហ្គីតា ក្លឹបដូរតន្ត្រី ក្លឹបសម្តែងរឿង ក្លឹបសុន្ទរកថា ក្លឹបសៀករហ័សកម្ម ក្លឹបតស៊ូមតិ ក្លឹបអានសៀវភៅ ក្លឹបមិត្តជួយមិត្ត ក្លឹបនិយាយ និងក្លឹបសារពត៌មាន ព្រមទាំងក្រុមយុវសិស្សស្ម័គ្រចិត្តផ្សេងៗទៀតបានរួបរួមគ្នារៀបចំកម្មវិធីដែលមានឈ្មោះថា “ទេពកោសល្យដើម្បីជំនួយឧបត្ថម្ភ” លើកទី៥ (TALENTS FOR A CAUSE 5)។ កម្មវិធីនេះរៀបចំឡើងកាលពីថ្ងៃទី15 ខែមីនា ឆ្នាំ2015 កន្លងទៅនេះ នៅមជ្ឈមណ្ឌលសហប្រតិបត្តិការកម្ពុជា-កូរ៉េ ដែលមានការអញ្ជើញចូលរួមយ៉ាងច្រើនកុះករពី សំណាក់សិស្សានុសិស្ស និងភ្ញៀវកិត្តិយសប្រមាណ៦៩១នាក់។
លោកវេជ្ជបណ្ឌិត គួច ម៉េងលី បានមានប្រសាសន៍នៅក្នុងកម្មវិធីប្រគំតន្ត្រីនោះថា កម្មវិធីនេះរៀចំឡើង ដោយក្រុមសិស្សានុសិស្ស សម្រាប់កិច្ចការងារមនុស្សធម៌ក្នុងការជួយទ្រទ្រងដល់ជនក្រីក្រ ប្រជាជនជួបគ្រោះធម្មជាតិ កុមារ កំព្រាកម្ពុជារាប់ពាន់នាក់ដែលកំពុងប្រឈមមុខនឹងភាពខ្វះខាត និងត្រូវការអ្នកជួយឧបត្ថម្ភគាំទ្រ។
សកម្មភាព និងទឹកចិត្ត របស់សប្បុរសជនទាំងអស់ ពិតជាបានចូលរួមចំណែកយ៉ាងធំធេងក្នុងបេសកម្មមនុស្សធម៌ ដែលបានជួយកុមារកម្ពុជា ពិសេសធ្វើឲ្យសកម្មភាពសប្បុរសធម៌នេះកាន់តែមានសន្ទុះកាន់តែខ្លាំង។ តាមរយៈកម្មវិធីនេះបានបណ្តុះឲ្យយុវជនទាំងអស់ ក្លាយជាពលរដ្ឋល្អ មានស្មារតីចេះជួយទុក្ខធុរៈក្នុងគ្រាមានអាសន្ន ចេះចែករំលែក ចេះធ្វើការងារជាក្រុម ចេះទំនាក់ទំនងល្អ ជាមួយសាធារណជនទូទៅ ចេះគ្រប់គ្រងហិរញ្ញវត្ថុ និងជាគំរូល្អដល់យុវជនទូទៅ។យុវសិស្ស ឆែ ចំរើន ប្រធានសម្របសម្រួលកម្មវិធីទេពកោសល្យដើម្បីជំនួយឧបត្ថម្ភបានឱ្យដឹងថា ដោយទទួល បានអនុសាសន៍ និងបានឃើញនូវសកម្មភាពមនុស្សធម៌ ចុះចែកអំណោយដោយផ្ទាល់របស់ លោក ឧកញ៉ា វេជ្ជបណ្ឌិត គួច ម៉េងលី ប្រធាន និងប្រធានចាងហ្វាង នៃវិទ្យាស្ថាន និងសាលារៀន អន្តរទ្វីប អាមេរិកាំងកន្លងមក ទើបក្រុមរបស់គាត់ ទាំងអស់គ្នាជាសិស្សានុសិស្ស នៃវិទ្យាស្ថាន អន្តរទ្វីប អាមេរិកាំង (Aii) បង្កើតកម្មវិធីទេពកោសល្យដើម្បីជំនួយឧបត្ថម្ភ ដើម្បីរៃអង្គាសថវិកា និងសម្ភារៈសប្បុរសធម៌ផ្សេងៗ យកទៅជួយឧបត្ថម្ភដល់ជនក្រីក្រកុមារកំព្រា ទុរភិក្សជន និងជនរងគ្រោះ ដោយគ្រោះធម្មជាតិ។
កម្មវិធីនេះត្រូវបានចាប់ផ្តើមរៀបចំតាំងពីឆ្នាំ២០១០មកម្ល៉េះ។ នេះគឺជាលើកទី៥ហើយដែលក្រុមរបស់ សិស្សានុសិស្សបានរៀបចំឡើង។ កម្មវិធីនេះសម្តែងដោយផ្ទាល់ដោយក្រុមសិស្សានុសិស្ស ដែលជាសមាជិកនៃក្លឹបសិក្សានៃវិទ្យាស្ថាន អន្តរទ្វីប អាមេរិកាំង ដែលពួកគេម្នាក់ៗមានទេពកោសល្យខាងការសម្តែងក្បាច់រាំ ការច្រៀងចម្រៀងជាមួយនឹងការលេងហ្គីតា ការសម្តែងរឿងខ្លីជាលក្ខណៈកំប្លែងបែបអប់រំ ការសម្តែងសៀករហ័សកម្ម រួមជាមួយនឹងទស្សនីយភាពប្លែកៗជាច្រើនទៀត។
គួរបញ្ជាក់ផងដែរថា ថវិកាដែលប្រមូលបានពីកម្មវិធីសប្បុរសធម៌នេះសរុបចំនួន $៤៣៧១ ហើយក្រុមសិស្សានុ- សិស្សគ្រោងនឹងយកថវិកាទាំងនោះទៅទិញសម្ភារសិក្សា គ្រឿងឧបភោគបរិភោគ និងរបស់របរប្រើប្រាស់ ដើម្បីចែកជូនដល់ ប្អូនៗសិស្សានុសិស្សដែលកំពុងមានការខ្វះខាត នៅសាលាបឋមសិក្សាមួយចំនួនស្ថិតក្នុងខេត្តកំពង់ស្ពឺ៕
(អត្ថបទសាលា)
© រក្សាសិទ្ធិដោយ thmeythmey.com
