ជាតិ
អ្នកស្រី នួន ភិមាន ជាបេក្ខភាពបីរូបចុងក្រោយសម្រាប់ពាន World’s Children’s Prize
×![]()
ដោយ: រួបរួម
អ្នកស្រី នួន ភិមាន ប្រធានអង្គការលើកស្ទួយប្រជាពលរដ្ឋ (PIO) បានជាប់ជាបេក្ខភាពបីនាក់ចុងក្រោយដើម្បីប្រជែងយកពានរង្វាន់ World’s Children’s Prize ឆ្នាំ២០១៥ របស់មូលនិធិ World’s Children’s Prize Foundation (WCPF) ដែលមានទីស្នាក់ការនៅទីក្រុង Mariefredប្រទេសស៊ុយអែត។
អ្នកស្រី នួន ភិមាន ជាស្ត្រីខ្មែរមួយរូបដែលបានចំណាយពេលជិត១៥ឆ្នាំ ក្នុងលើកកម្ពស់ជីវិតកុមារក្រីក្រដែលរស់នៅលើគំនរសំរាម តាមរយៈការផ្តល់ឱកាសពួកគេឲ្យបានរៀនសូត្រ។ អ្នកស្រី ក៏ធ្លាប់ជាបេក្ខភាពម្នាក់ក្នុងកម្មវិធីទូរទស្សន៍ CNN Heroes កាលពីឆ្នាំ២០០៨ ផងដែរ។
សម្រាប់ពានរង្វាន់ដែលមានទឹក១០ម៉ឺនដុល្លារអាមេរិកនេះ អ្នកស្រី នួន ភិមាន គឺជាបេក្ខនារីតែម្នាក់គត់ក្នុងចំណោម៣នាក់។ បេក្ខភាពពីររូបផ្សេងទៀតរួមមានលោក KailashSatyarthiម្ចាស់ជ័យលាភីពានរង្វាន់ណូបែលឆ្នាំ២០១៤ ដែលជាសកម្មជនការពារកុមារនៅប្រទេសឥណ្ឌា និងលោក JavirStauringសកម្មជនសិទ្ធិកុមារមកពីសហរដ្ឋអាមេរិក។
បេក្ខជនទាំងបីរូបនឹងត្រូវធ្វើដំណើរទៅចូលរួមក្នុងពិធីប្រកាសលទ្ធផលនៅប្រទេសស៊ុយអែត នាខែតុលា ខាងមុខ។ អ្នកស្រី នួន ភិមាន ត្រូវការការគាំទ្រពីសំណាក់ថ្នាក់ដឹកនាំតាមសាលារៀនទាំងរដ្ឋ និងឯកជន ដោយការបោះឆ្នោតនឹងចាប់ផ្តើមនៅខែមេសា តាមរយៈ www.worldchildrensprize.com។
បើគិតចាប់តាំងពីឆ្នាំ២០០០មក សកម្មជន និងអង្គការចំនួន៤១ហើយដែលបានទទួលពានរង្វាន់ World’s Children’s Prize ក្នុងមានដូចជា អតីតអគ្គលេខាធិការអង្គការសហប្រជាជាតិ លោក Kofi Annan អតីតប្រធានាធិបតីអាហ្វ្រិកខាងត្បូង Nelson Mandela និងសកម្មជនប៉ាគីស្ថាន កញ្ញា MalalaYousafzai ជាដើម។
អ្នកស្រី ម៉ម សូម៉ាលី ដែលជាអ្នកប្រឆាំងនឹងការជួញដូរមនុស្ស និងការរំលោភផ្លូវ គឺជាសកម្មជនទីមួយរបស់កម្ពុជាដែលទទួលពានរង្វាន់ប្រកបដោយកិត្យានុភាពនេះ កាលពី២០០៨ ៕
© រក្សាសិទ្ធិដោយ thmeythmey.com
