ជាតិ
សង្គមជាតិ
ខ្មែរឥស្លាមក៏ត្រៀមចូលរួមក្នុងព្រឹត្តិការណ៍អង្គរសង្ក្រាន្តដែរ
× សៀមរាប៖ មិនមែនមានតែជនជាតិខ្មែរ ឫបរទេសនោះទេ ដែលចាប់អារម្មណ៍នឹងព្រឹត្តិការណ៍អង្គរសង្ក្រាន្ត ដែលស្ទើរក្លាយជាប្រពៃណីទៅហើយនោះ។ ខ្មែរឥស្លាមដែលមានវប្បធម៌ផ្សេងគ្នាពីប្រជាជនកម្ពុជា ក៏ត្រៀមខ្លួនជាស្រេច ដើម្បីចូលរួមសប្បាយ អបអរ ក្នុងព្រឹត្តិការណ៍អង្គរសង្ក្រាន្ត ដែលនឹងធ្វើនៅអំឡុងពេលបុណ្យចូលឆ្នាំប្រពៃណីខ្មែរ នាពេលខាងមុខនេះ។
ព្រឹត្តិការណ៍អង្គរសង្ក្រាន្ត បានទាញចំណាប់អារម្មណ៍ប្រជាជនខ្មែរ និងភ្ញៀវទេសចរជាច្រើនមកកម្សាន្តក្នុងខេត្តសៀមរាប។ ព្រឹត្តិការណ៍នេះ បានបង្ហាញពីវប្បធម៌ ប្រពៃណី ទំនៀមទម្លាប់ដ៏ល្អផូរផង់របស់ខ្មែរ ដែលមានតាំងពីបុរាណកាលមក និងមានកម្មវិធីលេងកម្សាន្តជាច្រើនទៀត។ ចាប់ពីឆ្នាំ២០១៣ នៃការបង្កើតព្រឹត្តិការណ៍អង្គរសង្ក្រាន្ត មានប្រជាជនជាច្រើន បានធ្វើដំណើរមកចូលរួមយ៉ាងផុសផុង អំឡុងពេលនៃការឈប់សម្រាករបស់ពួកគេ។
យ៉ាងណាមិញ ក្រៅពីវត្តមានប្រជាជនខ្មែរ ក្នុងនោះខ្មែរឥស្លាមមួយចំនួនធំ ក៏បានបង្ហាញវត្តមាន ក្នុងព្រឹត្តិការណ៍ដ៏អស្ចារ្យនេះដែរ។ ពួកគេចង់ស្វែងយល់ពីវប្បធម៌ អរិយធម៌ និងប្រពៃណីខ្មែរ ក្នុងនាមប្រជាជនរស់នៅក្នុងទឹកដីតែមួយ បើទោះជាមានប្រពៃណី និងវប្បធម៌ផ្សេងគ្នាយ៉ាងណាក្តី។
លោក សុះ រ៉ូហ្សាលី ខ្មែរឥស្លាមមួយរូប បានបង្ហាញពីការពេញចិត្តចំពោះការរៀបចំព្រឹត្តិការណ៍អង្គរសង្ក្រាន្ត របស់សហភាពសហព័ន្ធយុវជនកម្ពុជា។ លោក រ៉ូហ្សាលី ដែលរស់នៅខេត្តបន្ទាយជ័យនោះ គ្រោងនឹងធ្វើដំណើរមកខេត្តសៀមរាប ដើម្បីចូលរួមព្រឹត្តិការណ៍អង្គរសង្ក្រាន្ត។ លោកថា ព្រឹត្តិការណ៍នេះ បានគាស់កកាយសម័យកាលបុរាណ មកបច្ចុប្បន្នកាល ដើម្បីឲ្យកូនខ្មែរ និងជាតិសាសន៍ដទៃ បានដឹង និងបានស្គាល់កាន់តែច្បាស់ ថាអ្វីជាខ្មែរពិតប្រាកដ។ លោក រ៉ូហ្សាលី បានបន្ថែមថា៖« ខ្ញុំគាំទ្រយ៉ាងខ្លាំងចំពោះកម្មវិធីអង្គរសង្ក្រាន្ត។ វាបានដាស់អារម្មណ៍ប្រជាជនខ្មែរ ដឹងពីវប្បធម៌ អរិយធម៌ ដែលបាត់ទៅហើយនោះ ឲ្យរស់ឡើងវិញ»។
ងាកទៅចាប់អារម្មណ៍នឹងកញ្ញា លី អាមី វិញ។ ស្ត្រីខ្មែរឥស្លាមរូបនេះ ក៏មានបំណងចូលរួមក្នុងព្រឹត្តិការណ៍អង្គរសង្ក្រាន្តលើកទី៣នេះដែរ។ អាមី ជាអ្នកខេត្តពោធិ៍សាត់ និងបច្ចុប្បន្នកំពុងត្រៀមបញ្ចប់ថ្នាក់បរិញ្ញាបត្រនៅរាជធានីភ្នំពេញនោះ បានឲ្យដឹងថា នាងឮពីព្រឹត្តិការណ៍អង្គរសង្ក្រាន្តនេះយូរហើយ តែមិនទាន់មានឳកាសចូលរួម។ យ៉ាងណា នាងថាឆ្នាំនេះ នឹងបបួលក្រុមគ្រួសារ មកដើរកម្សាន្តក្នុងព្រឹត្តិការណ៍អង្គរសង្ក្រាន្ត ដែលនាងយល់ថា ធ្វើឲ្យនាងអាចយល់ដឹងច្រើនពីព្រឹត្តិការណ៍នេះ។
មិនមែនមានតែ លោក រ៉ូហ្សាលី កញ្ញា អាមី ទេ ដែលពេញចិត្តពេញថ្លើមនឹងព្រឹត្តិការណ៍អង្គរសង្ក្រាន្ត។ លោក នាក់ សើគីរីន ពីភ្នំពេញនោះវិញ ក៏ត្រៀមរួចរាល់ក្នុងការចូលរួមក្នុងព្រឹត្តិការណ៍លើកទី៣នេះដែរ។ លោក សើគីរីន ដែលជាយុវជនស្ម័គ្រចិត្តសហភាពយុវជនមួយរូប បានរម្លឹកពីអនុស្សាវរីយ៍ក្នុងព្រឹត្តិការណ៍អង្គរសង្ក្រាន្ត ដែលលោកបានចូលរួមនាពេលកន្លងមកថា៖« ព្រឹត្តិការណ៍នេះ បានរិតចំណងមិត្តភាពក្រុមយុវជន ដែលមកពីបណ្តាខេត្តផ្សេងៗ ឲ្យចេះសាមគ្គីគ្នាក្នុងការធ្វើការងារជាក្រុម»។ កម្មវិធីដែលលោក សើគីរីនចាប់អារម្មណ៍មានរបាំកន្សែងស្នេហ៍ ល្បែងប្រជាប្រិយខ្មែរ និងល្បែងកម្សាន្តដែលបង្ហាញពីអរិយធម៌អរូបិយរបស់ខ្មែរជាដើម។
មានកម្មវិធីប្រពៃណីជាច្រើន នៅក្នុងព្រឹត្តិការណ៍អង្គរសង្ក្រាន្ត។ ក្នុងនោះ របាំជនជាតិចាម ក៏មានលើកមកសម្តែងផងដែរ ដែលគេឲ្យឈ្មោះថា របាំកន្សែងស្នេហ៍ នោះ។ របាំនេះបើត្បិតជារបាំជនជាតិចាម ឫខ្មែរឥស្លាមយ៉ាងណាក្តី ប៉ុន្តែសម្តែងឡើងដោយយុវជនខ្មែរ ដែលបានរៀនសូត្រពីរបាំនេះ។ យុវជនខ្មែរឥស្លាម ចង់ឲ្យមានការបង្ហាញវប្បធម៌ ប្រពៃណី និងទំនៀមទម្លាប់របស់សហគមន៍ខ្មែរឥស្លាមក្នុងព្រឹត្តិការណ៍អង្គរសង្ក្រាន្ត។ ពួកគេយល់ថា វានឹងបង្ហាញពីការចូលរួមគ្រប់ជាតិសាសន៍ក្នុងប្រទេសកម្ពុជា។
លោក រ៉ូហ្សាលី យល់ថា៖« ក្នុងនាមខ្មែរឥស្លាមរស់នៅក្នុងប្រទេសកម្ពុជាតែមួយ ខ្ញុំគិតថា គួរតែបញ្ជ្រាបវប្បធម៌ ប្រពៃណីឥស្លាមចូលរួម។ ឧទាហរណ៍ដូចការ «ពាង» ដែលមានន័យថា ដល់ពេលថ្វាយបង្គំក្នុងសាសនាឥស្លាម ប៉ុន្តែបងប្អូនខ្មែរ គាត់យល់ថា ចាមលូទៅវិញ។ប្រសិនបើយើងធ្វើបាន ខ្ញុំគិតថាថ្នាក់ដឹកនាំព្រឹត្តិការណ៍អង្គរសង្ក្រាន្តក៏សប្បាយចិត្ត ហើយសហគមន៍ខ្មែរឥស្លាមក៏សប្បាយចិត្ត ព្រោះវាបង្ហាញពីការចូលរួមគ្រប់ជាតិសាសន៍»។ ចំណែកលោក សើគីរីន៖« វាជាការល្អមួយ។ ព្រោះថា ខ្មែរឥស្លាមយើងមានវប្បធម៌ និងប្រពៃណីល្អម្យ៉ាងដែរ។ វានឹងរិតតែឆ្លុះបញ្ចាំងឲ្យឃើញថា ប្រទេសកម្ពុជា ជាប្រទេសដែលមានវប្បធម៌ និងអរិយធម៌ចម្រុះជាតិសាសន៍ មិនប្រកាន់និន្នាការជាតិសាសន៍ណាមួយឡើយ។ល»។
អ្នកនាំពាក្យព្រឹត្តិការណ៍អង្គរសង្ក្រាន្ត បានគាំទ្រចំពោះការឲ្យមានកម្មវិធីទាក់ទងនឹងសហគមន៍ខ្មែរឥស្លាម។ លោក សោម រតនា មានប្រសាសន៍ថា វាជាការល្អបំផុត ដែលរបាំប្រពៃណីខ្មែរឥស្លាម សម្តែង និងរៀបចំឡើងដោយសហគមន៍ខ្មែរឥស្លាម។ លោក សោម រតនា៖« ខ្ញុំគិតថា វាល្អ។ នៅឆ្នាំក្រោយ ខ្ញុំនឹងលើកយកចំណុចនេះមកនិយាយ ដើម្បីឲ្យមានកម្មវិធីប្រពៃណីខ្មែរឥស្លាមចូលរួមឲ្យបានច្រើន»។
ព្រឹត្តិការណ៍អង្គរសង្ក្រាន្ត ក្រៅពីធ្វើឡើងក្នុងបំណងអបអរពិធីបុណ្យចូលឆ្នាំប្រពៃណីជាតិខ្មែរហើយនោះ ព្រឹត្តិការណ៍នេះបង្ហាញពីមហាគ្រួសារខ្មែរតែមួយ ការរិតចំណងមិត្តភាព និងជាពិសេស បានចូលរួមផ្សព្វផ្សាយវិស័យទេសចរណ៍ នៅក្នុងខេត្តសៀមរាប បានទូលំទូលាយផងដែរ។ កាលពីឆ្នាំ២០១៣ ព្រឹត្តិការណ៍នេះមានអ្នកចូលរួមប្រមាណជាង ១៨ម៉ឺននាក់ ឆ្នាំ២០១៤ មានចំនួនជាង ៣៨ម៉ឺននាក់ និងលើកទី៣ ឆ្នាំ២០១៥ នេះ អ្នករៀបចំ រំពឹងថា នឹងមានអ្នកចូលរួមកន្លះលាននាក់។ ព្រោះថានៅឆ្នាំនេះ មានព្រឹត្តិការណ៍ធំៗជាច្រើន ដូចជាការតាំងបង្ហាញនំអន្សមយក្ស ដែលមានទំហំជាងឆ្នាំទៅ មួកត្នោតយក្ស អង្រុតយក្ស ព័ត្រយក្ស និងការបង្ហាញផ្ទាំងទស្សនីយភាពជាច្រើនទៀត ដូចជាការប្រណាំងរទេះគោ ល្បែងប្រជាប្រិយ។ល៕
© រក្សាសិទ្ធិដោយ thmeythmey.com