អន្តរជាតិ
ពលរដ្ឋចិនព្រួយបារម្ភពីសុវត្ថិភាពអគារ ៥៧ ជាន់ដែលសាងសង់រួចក្នុងរយៈពេល ១៩ ថ្ងៃ
×
ការកសាងអគារកម្ពស់បីជាន់ក្នុងរយៈពេលមួយថ្ងៃមិនមែនជាល្បែងសម្រាប់ក្មេងលេងរៀបផ្ទះនៅក្នុងកុំព្យូទ័រនោះទេប៉ុន្តែនេះការសាងសង់ពិតប្រាកដមួយ ដែលជាគម្រោងមួយរបស់ក្រុមហ៊ុនសំណង់មួយនៅក្នុងកណ្ដាលទីក្រុងរបស់ខេត្តហ៊ូណានប្រទេសចិន។
យោងតាមការផ្សាយរបស់ CCTV អគារកម្ពស់៥៧ ជាន់ស្ថិតនៅក្នុងទីក្រុងឆាងសាជាទីក្រុងធំរបស់ខេត្តហ៊ូណានត្រូវបានគេចែករំលែកនៅក្នុងប្រព័ន្ធផ្សព្វផ្សាយសង្គមរបស់ចិនបន្ទាប់ពីមានសេចក្ដីរាយការណ៍ថា អគារដ៏ខ្ពស់នេះត្រូវបានបញ្ចប់ការសាងសង់ ក្នុងរយៈពេលតែ ១៩ ថ្ងៃតែប៉ុណ្ណោះ។
ប៉ុន្តែក្នុងខណៈពេលដែលមានការសរសើរ ពីសមត្ថភាពក្នុងការសាងសង់ដោយប្រើពេលយ៉ាងឆាប់រហ័សនេះ ក៏មានប្រជាជនចិនជាអ្នកប្រើប្រាស់បណ្តាញសង្គមជាច្រើនលើកឡើងពីការព្រួយបារម្ភពីលើសុវត្ថិភាពរបស់អគារមួយនេះផងដែរ។
លោក Zhang Junសាស្ត្រាចារ្យពីសាកលវិទ្យាល័យTsinghua Universityបានប្រាប់បណ្តាញវិទ្យុចិនថា អគារនេះត្រូវបានគេសាងសង់ឡើង ដោយមានការរៀបចំរចនាសម្ព័ន្ធដែកថែបយ៉ាងត្រឹមត្រូវ ដូច្នេះគឺវាមានសុវត្ថិភាពប៉ុន្តែវាក៏អាចនឹងប្រឈមជាមួយនឹងបញ្ហា ក្នុងរយៈពេលវែងដូចជាការប្រេះស្រាំដោយសារកម្ដៅថ្ងៃនិងការជ្រាបទឹក។
ជាមួយគ្នានេះដែរ ក្រុមការងារសាងសង់អគារខាងលើនេះ ក៏បានពន្យល់ផងដែរថាពួកគេបានប្រើបច្ចេកវិទ្យាផ្គុំដ៏ទំនើបដែលក្នុងនោះ ៩៥ភាគរយនៃផ្នែករបស់អគារត្រូវបានគេសាងសង់នៅក្នុងរោងចក្រមួយដាច់ដោយឡែកផ្សេងមួយទៀត បន្ទាប់មកគេយកវាមកផ្គុំ ដូច្នេះវាមិនមែនជាការសាងសង់មួយតាមរបៀបធម្មតានោះទេ។
ដោយឡែកអ្នកជំនាញម្នាក់ទៀតបាននិយាយថា អគារនេះត្រូវបានគេសាងសង់ឡើងពីគ្រោងអគារធ្វើពីដែកថែបសុទ្ធ ដូច្នេះហើយបើទោះបីជាវាត្រូវគេសាងសង់រួចក្នុងរយៈពេល ១៩ ថ្ងៃក៏ដោយក៏គេត្រូវការពេលដ៏យូរដើម្បីសាងសង់គ្រឹះខាងក្រោមអគារឲ្យរឹងមាំផងដែរ។អគារនេះមានទំហំ ១៨ ម៉ឺន ម៉ែត្រការ៉េ ហើយវានឹងត្រូវគេរៀបចំជាសាលាមត្តេយ្យ កន្លែងតែទាំកុមារ មន្ទីរពេទ្យ មជ្ឈមណ្ឌលហាត់ប្រាណនិងកន្លែងផ្សេងជាច្រើនទៀត៕
© រក្សាសិទ្ធិដោយ thmeythmey.com