ជាតិ
លោក សៅ សុខា បង្កើតគណៈកម្មការចំពោះកិច្ច ស៊ើបអង្កេតករណីធ្វើទារុណកម្មអ្នកបើកឡានដឹកស្រូវ
×![]()
ដោយ: ថ្មីៗ
នាយឧត្ដមសេនីយ៍សៅ សុខា មេបញ្ជាការ អាវុធហត្ថលើផ្ទៃប្រទេស បានបង្កើតគណៈកម្មការ ចំពោះកិច្ចមួយនៅថ្ងៃទី២៣ ខែមីនានេះ ក្នុងគោលបំណងចុះធ្វើការស្រាវជ្រាវ និងស៊ើបអង្កេត ក្នុងករណីដេញបង្ក្រាប និងបាញ់ជាច្រើនគ្រាប់លើរថយន្តដឹកស្រូវមួយគ្រឿង និងការធ្វើទារុណកម្មយ៉ាងធ្ងន់ធ្ងរលើអ្នកបើកបររថយន្ថ នៅក្នុងទឹកដីខេត្ដត្បូង និងខេត្ដព្រៃវែង ។
លោក សៅ សុខា តែងតាំងសភាពចំនួន៩រូបក្នុងនោះរួមមាន លោកឧត្ដមសេនីយ៍ឯក ស៊ិន សុផាន្នី មេបញ្ជាការរងអាវុធហត្ថលើផ្ទៃប្រទេស និង ជាស្នងការ ស្នងការដ្ឋានយុត្ដិធម៌ ជាប្រធាន លោកវរសេនីយ៍ឯក គង់ សុត្ថារិន នាយការិយាល័យបទ ល្មើសព្រហ្មទណ្ឌ ជាអនុប្រធាន ព្រមទាំងមន្ដ្រីអាវុធហត្ថ ៧នាក់ ផ្សេងទៀតជាសមាជិក ។
គណៈកម្មការចំពោះកិច្ចនេះ មានភារកិច្ច ធ្វើអធិការកិច្ចនូវបាតុភាពដែលបានកើតឡើង ក្នុងពេលបំពេញភារកិច្ច របស់នាយទាហាន នាយទាហានរងនៃកងរាជអាវុធហត្ថខេត្ដត្បូង ឃ្មុំនិងខេត្ដព្រៃវែង កាលពីថ្ងៃទី១៩ ខែមីនា ឆ្នាំ២០១៥ កន្លងទៅ។ ត្រួតពិនិត្យកំហុសឆ្គងរបស់នាយទាហាន នាយទាហានរងនៃ កងរាជ អាវុធហត្ថ ខេត្ដត្បូងឃ្មុំ និងខេត្ដព្រៃ វែង ក្នុងការប្រតិបត្ដិតួនាទីភារកិច្ចកងរាជ អាវុធហត្ថ ការអនុវត្ដច្បាប់លក្ខ័ន្ដិកៈទូទៅ នៃកងយោធពលខេមរភូមិន្ទ និងបទវិន័យទូទៅ សម្រាប់កងយោធពលខេមរភូមិន្ទ ។គណៈកម្មការចំពោះកិច្ចនេះ ក៏មានសិទ្ធិជួបពិភាក្សាជាមួយអាជ្ញាធរ ស្ថាប័ននិងអង្គ ភាពពាក់ព័ន្ធផ្សេងៗនៅក្នុងខេត្ដទាំងពីរខាងលើ ។ មានសិទ្ធិចេញលិខិតកោះហៅអ្នកដែលមានការពាក់ព័ន្ធ ចំពោះបាតុភាពទាំងនោះ មកធ្វើការស្ដាប់ចំលើយ បំភ្លឺ ដើម្បីស្រាវជ្រាវរកឱ្យឃើញ ការពិតជាក់ស្ដែងនិងបូកសរុបលទ្ធផលការងារ ធ្វើរបាយការណ៍ រាយការណ៍ជូននាយឧត្ដម អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការអាវុធហត្ថលើផ្ទៃប្រទេស ។
ការបង្កើតគណៈកម្មការចំពោះកិច្ចនេះ ធ្វើឡើងក្រោយពីមានការរិះគន់តាមបណ្តាញសង្គមហ្វេសបុក ដែលបានបង្ហោះ រូបភាពបុរសអាក្រាតអាវម្នាក់ ត្រូវគេចងដៃទៅក្រោយ ឲ្យដេកផ្កាប់មុខទៅលើដី បង្កឡើងដោយមនុស្សមួយក្រុម មានឯកសណ្ឋានខ្លះ ជាកងរាជអាវុធហត្ថ ព្រួតគ្នាចាប់ចង និងយកជើងជាន់ករ បុរសអាក្រាតអាវនោះជាដើម ។សូមបញ្ជាក់ថា ករណីកម្លាំងអាវុធហត្ថ ខេត្ដត្បូងឃ្មុំ និងអាវុធហត្ថខេត្ដព្រៃវែង និងមន្ដ្រីពាក់ព័ន្ធមួយចំនួនទៀត បានដេញបង្ក្រាបនិង បាញ់ជាច្រើនគ្រាប់ទៅលើរថយន្ដដឹក ស្រូវមួយគ្រឿងកាលពីវេលា ម៉ោង១១ និង១៥នាទីយប់ថ្ងៃទី១៩ ខែមីនា ស្ថិតនៅក្នុងភូមិស្វាយអន្ទរ ខេត្ដព្រៃវែង ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ម៉ោង
